Amainhama 35 - Baibuli Ekibono kya Katonda 2014

Katonda agha Yakobo enkabi e Betheli

¹ Katonda yaakoba Yakobo ati: “Ja e Betheli, obe eyo, onzimbireyo alutaari nze Katonda eyakubonekera bwe wali ng'oli kulumuka muganda wo Esau.”

² Agho Yakobo yaakoba ab'omu ndhu ye, n'abo boonaboona abaali naye ati: “Musuule ere emisambwa egy'abamaghanga agandi gye muli nagyo mwetukuze, mukyuse ebivaalo, muvaale ebitukula.

³ Mukole tuje e Betheli, eyo ye nja okuzimbira Katonda alutaari, kuba yawuliranga okusaba kwange yantoola mu buzibu, era yaabanga ghalala ninze kiisi ghe najanga.”

⁴ Kale, baagha Yakobo emisambwa egy'abamaghanga agandi gyonagyona gye baali nagyo, n'empeta edhaali mu matu gaibwe. Yakobo yaabiziika ghansi gh'omuti omukologho kumpi ni Shekemu.

⁵ Yakobo n'abaana be bwe baatoolera okutambula, entiisa enene yaagema ab'omu bibuga ebibeezungulwire, baaloba kubalumba.

⁶ Agho Yakobo aghalala n'abantu be boonaboona abaali naye, baatuuka e Luzi, era ekyetebwa Betheli, ekiri mu nsi y'e Kanaani.

⁷ Yaazimba agho alutaari, ekifo ekyo yaakituuma eriina Eli Betheli, kuba agho Katonda ghe yamweyolekera, ng'ali kulumuka muganda we.

⁸ Debora omulezi wa Rebekka yaafa, baamuziika ghansi gh'omuti omukologho, kumpi n'e Betheli. Omuti ogwo baagutuuma eriina: “Omuti ogw'okulira amaziga.”

⁹ Yakobo bweyava mu Paddanarama, Katonda yaamubonekera kabiri, yaamugha enkabi.

¹⁰ Yaamukoba ati: “Eriina lyo niiwe Yakobo aye, okuva ni mpegaano tokaayetebwa Yakobo. Oidha kwetebwanga Isiraeli.”

¹¹ Era yaamukoba ati: “Ninze Katonda Aghanga ebintu byonabyona. Zaala abaana kamaala, mweyongere obungi amaghanga kamaala galisimuka mu iwe, era oliba dhaadha wa bakyabazinga.

¹² Era ensi ye nagha Aburahamu ni Isaaka, ndigikugha iwe, naagigha ni baidhukulu bo abaliiragho.”

¹³ Agho Katonda yaava aghali Yakobo, yaaja ghaigulu.

¹⁴ Yakobo yaasimba eibaale libe ekiidhukizo mu kifo Katonda mwe yayogerera naye, yaalifukaku ekigheebwayo eky'ebyokunhwa, era n'omuzigo okulitukuza.

¹⁵ Yakobo yaatuuma ekifo ekyo eriina Betheli.

Okufa kwa Rakeli

¹⁶ Agho Yakobo n'ab'omu maka ge baava mu Betheli, baatambula. Bwe baali nga babuzaayo katono okutuuka mu Efuratha, ebiseera bya Rakeli eby'okuzaala byatuuka era yaalumwa inho.

¹⁷ Bwe yali ng'ali kulumwa inho, omuzaalisa yaamukoba ati: “Otatya kuba ozaire omwana omulenzi owundi.”

¹⁸ Bwe yali ng'ali kumpi okufa, kuba yali ali kufa, yaatuuma omwana eriina Benoni, ekitegeeza, “Omwana ye nzaaliire mu bulumi.” Aye ise w'omwana yaamutuuma eriina Benjamini, ekitegeeza, “Omwana aliba ow'enkabi.”

¹⁹ Agho Rakeli yaafa, baamuziika ku mbali okw'engira eja mu Efuratha, ekyo era nga ni Bethelehemu.

²⁰ Yakobo yaasimba eibaale ku magombe ge libe ekiidhukizo. Eibaale eryo n'eryoleka amagombe ga Rakeli okutuusa ni ye buli eno.

²¹ Isiraeli yeeyongerayo mu lugendo lwe, yaasimba weema ye kumpi n'ekituuti ekirengererwaku ekya Ederi.

Batabane ba Yakobo

²² Agho Isiraeli bweyali ng'akaali mu nsi eyo, Reubeni yaaja, yaaba ni Biliha omukazi wa ise ow'embali. Isiraeli yaakimanha. Batabane ba Yakobo baali ikumi na babiri.

²³ Batabane ba Leeya ni bano: Reubeni omwana wa Yakobo omuberi, ni Simeoni, ni Levi, ni Yuda, ni Issakari, ni Zebuluni.

²⁴ Batabane ba Rakeli ni bano: Yosefu, ni Benjamini.

²⁵ Batabane ba Biliha omwiru omukazi owa Rakeli, ni bano: Dani ni Nafutali.

²⁶ Batabane ba Zilipa omwiru omukazi owa Leeya, ni bano: Gadi ni Asheri. Abo ni batabane ba Yakobo, abaamuzaalirwa mu Paddanarama.

Okufa kwa Isaaka

²⁷ Agho Yakobo yaja eri ise Isaaka e Mamure, oba Kiriatharaba, ekyo era nga ni Heburoni, Aburahamu ni Isaaka mwe baabanga.

²⁸ Isaaka yaghangaala emyaka kikumi na kinaana (180),

²⁹ yaafa ng'akairiighe inho, yaatwalibwa eri badhaadha be. Batabane be, Esau ni Yakobo, baamuziika.