Amainhama 34 - Baibuli Ekibono kya Katonda 2014

Dina akakibwa

¹ Agho Dina, omwana omughala Leeya ye yazaalira Yakobo, yaaja okukyalira abakazi Abakanaani.

² Shekemu, mutabane wa Hamori Omuhivi omufuzi mu nsi eyo bweyamubona, yaamugema era yaamukaka yaaba naye mu buliri.

³ Omwoyo gwe gwatwalirizibwa inho Dina oyo mughala wa Yakobo, yaamwenda inho era yaayogera naye n'ekisa.

⁴ Shekemu yaakoba Hamori ise ati: “Nfunira omughala oyo mmubayize.”

⁵ Yakobo yaawulira nga Shekemu yasobya ku mughala we Dina, aye olw'okuba batabane baali bakaali mu kyayiro n'ensolo dhe, yaasirika okutuusa lwe baira.

⁶ Hamori, lata wa Shekemu, yaaja eri Yakobo okwogera naye.

⁷ Batabane ba Yakobo baira nga bava mu kyayiro. Bwe baakiwulira baanakughala era baasungughala inho, kuba Shekemu kye yali akoze eky'okukaka mughala wa Yakobo, nga kya muzizo mu Baisiraeli.

⁸ Hamori yaayogera nabo ati: “Mutabane wange Shekemu ayenda mughala waimwe. Mbeeghembye mumumughe amubayize.

⁹ Era ka tukole endagaano, ife tubayizenga baghala baimwe, mwena mubayizenga abaife.

¹⁰ Munaabanga ghalala n'ife mu nsi yaife, munaajanga yoonayoona ye mwenda. Munaasuubuliranga muno, era mwefunira ebintu.”

¹¹ Shekemu yaakoba lata wa Dina ni baanhina ati: “Muunhambe mu kino, kyonakyona kye munansalira ndidha kukibagha.

¹² Omwandu n'ebirabo bye munansalira ni bwe binaayaga gha obungi, ndidha kubibagha, kasita mumpa omughala okumubayiza.”

¹³ Aye batabane ba Yakobo bairamu Shekemu ni ise Hamori nga baguya, kuba Shekemu yali asobiiza ku mwanhinaibwe Dina.

¹⁴ Baakoba bati: “Titusobola kukola ekyo: okugha mwanhinaife omusaadha atali mukekete, kuba ekyo kiba nga kitunhoomoola inho.

¹⁵ Twidha kubaganha lwa kino kyonka: muli n'okuganha okuba nga ife nga kiisi musaadha mu imwe akeketebwa.

¹⁶ Olwo ni tunaabaganha imwe okubayizanga baghala baife, n'ife okubayizanga abaimwe. Twidha kubanga ghalala n'imwe, tufuuke eighanga irala.

¹⁷ Aye bwe mutaaganhe kyaife ni mukeketebwa, twidha kutwala mughala waife twejiire.”

¹⁸ Hamori ni mutabane Shekemu ekyo baakibona nga kikalamu.

¹⁹ Era omwisuka yaayangugha okukola ekyo, kuba yali ng'ayenda inho mughala wa Yakobo. Omwisuka oyo yali wa kitiibwa okusinga abandi boonaboona ab'endhu ya ise.

²⁰ Hamori ni mutabane Shekemu baaja mu kifo eky'olwekobaano ku mulyango gw'ekibuga kyaibwe, baayogera n'abantu ab'omu kibuga ekyo bati:

²¹ “Abasaadha bano balungi ye tuli. Tubaleke babenga mu nsi eno ghalala n'ife era basuubulirengamu, kuba ensi ngazi ekimala. Ife tubayizenga baghala baibwe, boona tubaghenga baghala baife bababayize.

²² Aye abasaadha bano okuganha okubanga aghalala n'ife, n'okufuuka eighanga eirala n'ife, batwendaku ekintu kirala kyonka: kiisi musaadha mu ife akeketebwenga, nga beene bwe bakeketebwa.

²³ Ente dhaibwe n'ebintu byaibwe era n'ensolo dhaibwe dhoonadhoona dhiriba dhaife. Kale twisanie nabo, babenga ghalala n'ife.”

²⁴ Abasaadha boonaboona abaaligho mu lwekobaano olwo, baaganha Hamori ni mutabane we Shekemu bye baakoba, kiisi musaadha yaakeketebwa.

²⁵ Agho ku lunaku olwokusatu, abasaadha bwe baali nga bali mu bulumi obw'ebibwa eby'okukeketebwa, batabane ba Yakobo babiri, Simeoni ni Levi baanhina Dina, baagema empiima dhaibwe baazinduukiriza ekibuga baita abasaadha boonaboona.

²⁶ Baitiramu Hamori era ni mutabane Shekemu baatoola Dina mu ndhu ya Shekemu, baavaayo.

²⁷ Batabane ba Yakobo abandi bwe baayagaana ng'abasaadha baitiibwa, baanhaga eby'omu kibuga nga beesasuuza olwa mwanhinaibwe ye baasobyaku.

²⁸ Baanhaga entaama, n'embuzi, n'endogoyi, n'ebintu byonabyona ebyali mu kibuga n'ebyali mu nimiro.

²⁹ Era baatwala eby'obukombe byonabyona, baanhaga abaana boonaboona abato, n'abakazi boonaboona, ni byonabyona ebyali mu mayumba.

³⁰ Yakobo yaakoba Simeoni ni Levi ati: “Mundeeteire obuzibu. Mpegaano Abakanaani n'Abaperizzi n'abandi boonaboona ab'omu nsi eno baja kunkyagha. Ndi n'abantu batono. Kale bale boonaboona bwe balyesoloza ni baanumba, balinsaaniagho n'amaka gange goonagoona.”

³¹ Aye baamubuuza bati: “Obwo yakola bulungi okubisa mwanhinaife nga malaaya?”