Amainhama 32 - Baibuli Ekibono kya Katonda 2014

Yakobo yeetegekera okwagaanana ni Esau

¹ Yakobo yeeyongerayo mu lugendo lwe, bamalaika ba Katonda baayagaanana naye.

² Yakobo bweyababona, yaakoba ati: “Lino igye lya Katonda!” Yaatuuma ekifo ekyo eriina Mahanaimu.

³ Agho Yakobo yaatuma abakwenda bamukulemberemu, baje ye muganda we Esau mu kiketezo eky'e Seiri, mu nsi ey'Edomu.

⁴ Yaabalagira ati: “Mukobe musengwa wange Esau, muti Yakobo omugheereza wo akoba ati, ‘Nasenga ewa Labani era ye mbairenga naye okutuusa ni mpegaano.

⁵ Era ndi n'ente, n'endogoyi, n'ebighaso by'entaama n'embuzi, era n'abairu abasaadha n'abakazi. Nkutumiire okukukobera, musengwa wange, ongemerwe ekivunika.’ ”

⁶ Abakwenda bwe baira eri Yakobo, baakoba bati: “Twaja ye muganda wo Esau, era ali mu ngira ali kwidha okukwagaana. Ali kwidha n'abasaadha ebikumi bina.”

⁷ Yakobo yaatya inho era yeeraliikirira. Yaayawulamu ebikunsu bibiri mu bantu be yali nabo, era yaayawula ni mu byayo bye yali nabyo: entaama, n'embuzi, n'ente, n'engamiya.

⁸ Yaakoba mule ati: “Esau bw'anaatuukira ku kikunsu ekisooka n'akikuba, ekikunsu ekinaasigalagho kinaawona.”

⁹ Agho Yakobo yaasaba ati: “Wo Katonda wa dhaadha wange Aburahamu, era Katonda wa lata wange Isaaka, wulira okusaba kwange! Wo Musengwa Katonda, niiwe eyankoba oti, ‘Irayo mu nsi ey'ewaimwe ni y'aboluganda lwo, ndidha kukugha buli kintu okukujiiranga obukalamu.’ ”

¹⁰ Nze tigwaniire kivunika kyo na bwesigwa bwo, bye wandholeka nze omugheereza wo. Nasomoka omwiga guno Yorudani, nga ndi na mwigo gwonka. Aye mpegaano ndhize, nga ndi n'ebikunsu bibiri.

¹¹ Nkweghembye mponia muganda wange Esau, kuba mmutya; asobola okwidha yaatwita twenatwena, era yaatwalizaamu n'abakazi n'abaana.

¹² Ate nga wakoba oti, “Ndikugha buli kintu okukujiiranga obukalamu, era naakwaliza abaidhukulu kamaala ng'oti n'omusenho ogw'oku nhandha, ogutaghanga kubalika olw'obungi.”

¹³ Yakobo yaasula agho obwire obwo, yaatoola ku bye yali nabyo okugha muganda we Esau ekirabo:

¹⁴ nga n'omuli embuzi enkazi ebikumi bibiri, n'enume amakumi abiri entaama enkazi ebikumi bibiri, n'enume amakumi abiri.

¹⁵ Era nga n'omuli engamiya edhikamwa amakumi asatu n'enhana dhaadho; ente enkazi amakumi ana n'enume ikumi; endogoyi enkazi amakumi abiri n'enume ikumi.

¹⁶ Ensolo dhino yaadhaawulayawulamu ebikunsu, yaadhigemya abairu be, nga buli mulala atwalaku ekikunsu kirala. Yaabakoba ati: “Munkulemberemu nga buli kikunsu kyeswire ku kiinaakyo akata.”

¹⁷ Yakobo yaalagira eyakulemberamu ati: “Muganda wange Esau bw'anaakwagaana n'akubuuza ati, ‘Iwe oli muntu w'ani? Oli kuja gha? Era ensolo edho dh'okulembeizaamu dh'ani.’

¹⁸ Oiramu oti, ‘Dha mugheereza wo Yakobo; nga kino n'ekirabo ky'agheereiza musengwa wange Esau. Era ni mwene ali kutuvaaku einhuma.’ ”

¹⁹ Era yaalagira n'owokubiri, n'owokusatu, n'abandi boonaboona abaatwala ebikunsu by'ensolo, yaabakoba ati: “Mutyo bwe munaakoba Esau nga mumwagaine.

²⁰ Munaamukoba muti ‘Bwenebwene omugheereza wo Yakobo ali kutuvaaku einhuma!’ Kuba Yakobo yakoba mule ati, ‘Ndidha kumuwooyawooya n'ebirabo ebinkulembeiremu, olwo bwe nnaamwagaana, katyo anaatusangaalira.’ ”

²¹ Kale yaamukulembezaamu ekirabo, aye mwene yaasula agho obwire obwo.

Yakobo atuulana ekigwo e Penieli

²² Yakobo yaazuuka obwire bwene obwo, yaatwala abakazi bombi, n'abairu be abakazi bombi, n'abaana be eikumi n'omulala, yaasomoka omwiga Yabboki.

²³ Yaabatwala, yaabasomosa omwiga era yaasomosa ni byonabyona bye yali nabyo.

²⁴ Aye mwene yaasigala eyo yenka. Ghaidhagho omusaadha, yaatuulana naye ekigwo, okutuusa obwire okukya.

²⁵ Omusaadha bweyabona nga taidha kumughangula, yaakuba Yakobo ku kisambi, kyawogoka ng'ali kutuulana naye.

²⁶ Yaakoba Yakobo ati: “Ndeka nje, kuba obwire buli kukya.” Yakobo yaakoba ati: “Tiidha kukuleka okutoolaku ng'ompaire enkabi.”

²⁷ Omusaadha yaamubuuza ati: “Eriina lyo niiwe ani?” Yairamu ati: “Ninze Yakobo.”

²⁸ Omusaadha yaakoba ati: “Tokaayetebwanga Yakobo, aye onaayetebwanga Isiraeli, kuba otuulaine ni Katonda era n'abantu, waaghangula.”

²⁹ Yakobo yaakoba ati: “Nkweghembye, nkobera eriina lyo.” Aye ole yairamu ati: “Lwaki oyenda okumanha eriina lyange?” Agho yaagha Yakobo enkabi agho mu kifo ekyo.

³⁰ Yakobo yaatuuma ekifo ekyo eriina Penieli, ng'akoba ati: “Mbonagaine ni Katonda maiso ku maiso, aye naasigala nga nkaali mulamu.”

³¹ Endhuba yaja okuvaayo okumwakaku, ng'ali kuva e Penieli, ng'aghenhera olw'ekisambi kye.

³² N'okutuusa mpegaano Abaisiraeli kye bava ni batalya muziisa gwa ku buyungiro bwa kisambi, kuba ku muziisa ogw'oku kisambi kya Yakobo, omusaadha kwe yakuba.