Amainhama 31 - Baibuli Ekibono kya Katonda 2014

Yakobo alumuka ku Labani

¹ Agho Yakobo yaawulira batabane ba Labani nga bakoba bati: “Yakobo atwaire ebyayo byonabyona ebyali ebya iseife. Era mu ebyo mw'afuniire obukombe obwo bwonabwona.”

² Era Yakobo yaabona nga Labani takaamusangaalira nga bweyakolanga eira.

³ Agho Musengwa Katonda yaakoba Yakobo ati: “Irayo mu nsi ya badhaadha bo, era y'aboluganda lwo. Ndidha kubanga n'iwe.”

⁴ Kale, Yakobo yaayesa Rakeli ni Leeya baje bamwagaane mu kyayiro aghaali ebyayo bye.

⁵ Yabakoba ati: “Mboine nga iseimwe takansagaalira nga bweyakolanga eira. Aye Katonda wa lata wange abairenga ninze buliidho.

⁶ Mwidhi bukalamu nga nkoleire iseimwe n'amaani gange goonagoona.

⁷ Aye iseimwe yanguyaguya, yaakyusakyusa empeera yange emikuzi ikumi, aye Katonda yaaloba kumuganha kunkolaku kabi.

⁸ Iseimwe oyo bweyakobanga ati, ‘Ensolo edh'obudholodhondho n'edhinaaba empeera yo,’ ng'olwo ensolo dhoonadhoona dhizaala dha budholodhondho. Ate bweyakobanga ati, ‘Edh'emyalaala n'edhinaaba empeera yo,’ ng'olwo dhoonadhoona dhizaala dha myalaala.

⁹ Mu nsambo ng'oti n'eyo, Katonda yaatoola ku iseimwe ebyayo, yaabimpa.

¹⁰ “Mu biseera ensolo mwe dhighakira, okuja okulinga nti nga mbona mu kirooto embuzi enume edhaali dhiri kuniina ku nkazi; dhaali edh'emyalaala, edh'obudholodhondho n'edha bitanga.

¹¹ Malaika wa Katonda yandheta ati, ‘Yakobo!’ Naavugira nti, ‘Ndi ghano!’

¹² Yankoba ati, ‘Bona, embuzi dhoonadhoona enume edhiri kuniina ku nkazi, dha myalaala, n'edh'obudholodhondho, era n'edha bitanga; kuba mboine byonabyona Labani by'ali kukukola.

¹³ Ninze Katonda eyakubonekera e Betheli, ye wafukira omuzigo ku ibaale ni liba ekiidhukizo. Era ninze Katonda oyo ye wagha obweyamo ku olwo. Mpegaano situka oireyo mu nsi ye wazaalibwamu.’ ”

¹⁴ Rakeli ni Leeya baamwiramu bati: “Memale ife tukaali n'omugabo oba obusika mu ndhu ya iseife?

¹⁵ Mpegaano atutwala ng'abagwira. Yamala okututunda, era mpegaano aliire n'ebintu ebyatugula, yaabimalagho.

¹⁶ Obukombe bwonabwona Katonda bw'atoire ku iseife, mpegaano bwaife n'abaana baife. Kale, iwe mpegaano kola kyonakyona Katonda ky'akukobye.”

¹⁷ Agho Yakobo yaasitula olugendo, yaatyamya abaana be ni bakazi be ku ngamiya.

¹⁸ Yaatwala ebyayo bye byonabyona, era n'ebintu byonabyona bye yali afunie mu Paddanarama, yaaja mu nsi ey'e Kanaani ye lata we Isaaka.

¹⁹ Labani yali ng'ajiire okusala ku ntaama obuviiri, Rakeli yaiba emisambwa gya ise egy'omu maka.

²⁰ Yakobo yeiba bweibe ku Labani Omuaramea; tiyamukoberaku ng'aja kumulumukaku.

²¹ Yalumuka n'ebibye byonabyona, yaasomoka omwiga Eufurate, yaayolekera ensi ey'ensozi, Gileadi.

Labani abingirira Yakobo

²² Nga ghabiseegho enaku isatu, baakobera Labani bati Yakobo yalumuka.

²³ Labani yaaja n'ab'ekika kye, yaabingirira Yakobo, olugendo lwa nnaku musanvu, yaamutuukaku mu nsi ey'ensozi, Gileadi.

²⁴ Aye Katonda yaidhira Labani Omuaramea obwire mu kirooto, yaamukoba ati: “Weegendereze olobe kubaaku kintu kyonakyona ky'okoba Yakobo, kya kumutiisatiisa.”

²⁵ Labani bweyatuuka ku Yakobo, Yakobo yali ng'asimbye weema ye mu nsi ey'ensozi. Labani yeena yaasimba eyo weema ye n'ab'ekika kye.

²⁶ Labani yaakoba Yakobo ati: “Lwaki waneibaku n'otwala baghala bange ng'oti n'abanhage mu lutalo?

²⁷ Lwaki waanumukaku mu ngiso, ni weiba nga tonkobeire. Nandibaire nkusiibwire nga tuli kusagamba era nga tuli kwembera ku bugoma ni ku ndingidi.

²⁸ Tiwanganha na kwevumba ku baidhukulu bange ni baghala bange nga mbasiibula. Ekyo wakola kya busiru.

²⁹ Mbaire nsobola okukukolaku akabi. Aye Katonda wa lata wo yankobye obwire ati, ‘Weegendereze, olobe kubaaku kintu kyonakyona ky'okoba Yakobo, kya kumutiisatiisa.’

³⁰ Ndidhi nti wayendanga inho okuja, kuba ng'olumirwa inho endhu ya lata wo. Aye lwaki waiba emisambwa gyange egy'omu maka?”

³¹ Yakobo yairamu Labani ati: “Nakulumukaku kuba natya nga ndhuuba nti wandintoireku baghala bo bya ntaka.

³² Aye omuntu yeenayeena y'onaayagaana n'emisambwa gyo, aidha kwitibwa. Mpegaano ni, nga n'aboluganda lwaife bali kubona, yawulamu buli kikyo kye ndi nakyo okitwale.” Yakobo yali taidhi nga Rakeli yaiba emisambwa gya Labani.

³³ Kale Labani yaingira, yaayagaaza mu weema ya Yakobo, ni mu weema ya Leeya, ni mu weema ey'abairu abakazi bombi, aye yaaloba kuzuula misambwa gye. Yaava mu weema ya Leeya, yaingira mu ya Rakeli.

³⁴ Rakeli yali atoire emisambwa egy'omu maka egyo, yaagita mu nsawo ey'oku kintu ekityamibwaku ku ngamiya, yaagityamaku. Labani yaayagaaza mu weema mwonamwona, aye yaaloba kugizuula.

³⁵ Rakeli yaakoba ise ati: “Isebo, otansungughalira olw'obutasobola kwemerera mu maiso go, kuba ndi mulwaire.” Labani yaayagaaza aye yaaloba kuzuula misambwa gye egy'omu maka.

³⁶ Yakobo yasungughala, yaanenia Labani. Yaamukoba ati: “Nkoze kibi ki, era ndhiziiza musango ki, memale omingirire otyo?

³⁷ Waire ng'oyagaaziiza mu bintu byange byonabyona, kiki ku by'omu ndhu yo ky'ozwiremu? Kite ghano mu maiso g'aboluganda lwange n'iwe, beene batusaliregho omutuufu ku twembi.

³⁸ Mu myaka egyo amakumi abiri gye mbaire n'iwe, entaama dho n'embuzi dho enkazi tidhisondholangaku, era enume edhiba mu byayo byo, ghazira waire ndala ye ndyangaku.

³⁹ Entaama eyaitibwanga ensolo tyagikuleeteranga, aye nze neefiirizanga naakwirizaagho enamu ku dhange. Era eyo eyaibibwanga waire omusana oba obwire, wandagiranga okugikwirizaagho.

⁴⁰ Kale omusana gwampwerangaku, ate obwire empewo yanfuuwanga, era endoolo dhambulanga mu maiso.

⁴¹ Mu myaka egyo amakumi abiri gye mbaire mu maka go, nakukolera emyaka ikumi n'ena okufuna baghala bo bombi. Era naakukolera mu byayo byo emyaka mukaaga, aye iwe waakyusakyusa empeera yange emikuzi ikumi.

⁴² Nguli Katonda wa lata wange, Katonda wa Aburahamu era Katonda wa Isaaka tiyali ku luuyi lwange, wandibaire mpegaano ng'ominze nga nzira kantu. Aye Katonda yabona nga bwe nadaazibwadaazibwanga era nga bwe nakolanga einho, kye yaviire n'akunenia obwire buno obwabise.”

Yakobo ni Labani bakola endagaano

⁴³ Labani yairamu Yakobo ati: “Bano baghala bange, n'abaana baibwe bange, era n'ebyayo bino byange, era n'ebyo byonabyona by'oli kubona ghano byange. Aye olwaleero nsobola kukolera ki baghala bange bano, oba abaana be baazaala?

⁴⁴ Kale ni mpegaano, ka tukole endagaano nze n'iwe, ebenga obukakafu ghagati wo ninze.”

⁴⁵ Agho Yakobo yaatoola eibaale, yalisimbagho libe ekiidhukizo.

⁴⁶ Era yaakoba aboluganda lwe ati: “Musoloze amabaale.” Baasoloza amabaale baagatuuma entuumo, baaliira agho kumpi n'entuumo eyo ekiiwulo.

⁴⁷ Labani yaagituuma eriina Yegari Sahadutha, aye Yakobo yaagituuma Galeedi.

⁴⁸ Labani yaakoba ati: “Entuumo eno, n'obukakafu ghagati wo ninze olwaleero.” Kyeyava n'etuumibwa eriina Galeedi,

⁴⁹ era n'etuumibwa Mizipa, kuba Labani yakoba ati: “Musengwa Katonda alamulenga ghagati wo ninze bwe tuliba nga titukaabonagana.

⁵⁰ Bw'onaadaazadaazanga baghala bange oba n'obayiza abakazi abandi, waire tighaliba muntu wundi ali n'ife, idhukira nga Katonda n'omudhulizi ghagati wo ninze.”

⁵¹ Labani yaakoba Yakobo ati: “Bona entuumo eno ey'amabaale, era n'eibaale lino erisimbiibwagho ghagati wo ninze.

⁵² Entuumo eno era n'eibaale lino, binaabanga ekikakasa nti: nze tirituuma ntuumo eno kwidha kukulumba, era weena nga tolituuma ntuumo eno n'eibaale lino, kwidha kuunumba.

⁵³ Katonda wa Aburahamu era Katonda wa Nahori, atusalirenga omusango nze n'iwe.” Yakobo yaalayira mu liina lya Katonda wa Isaaka ise, ati aidha kukuumanga endagaano eyo.

⁵⁴ Yakobo yaagheera eyo omusengo ku lusozi olwo, yaayeta aboluganda lwe okulya emere. Baalya era baasula eyo ku lusozi.

⁵⁵ Bwe bwakya ku nkyo, Labani yaazuuka, yaagwa baidhukulu be ni baghala be mu kifuba, yabasabira enkabi. Yaasitula okwirayo ewuwe.