Amainhama 30 - Baibuli Ekibono kya Katonda 2014

¹ Rakeli bweyabona nga tazaalira Yakobo baana, yaagemerwa muganda we ensaalwa, yaakoba Yakobo ati: “Mpa abaana, oba ti n'ekyo ntuuse okufa.”

² Yakobo yaasungughalira Rakeli, yaakoba ati: “Ninze Katonda eyakwima okuzaala.”

³ Rakeli yaakoba ati: “Omwiru wange omukazi Biliha wuuyo, ba naye asobole okunzaalira abaana olwo zeena mbe muzaire nga mbita mu oyo.”

⁴ Kale yaamugha omwiru we Biliha, abe mukazi we. Yakobo yaaba ni Biliha mu buliri.

⁵ Biliha oyo yaatoola enda, yazaalira Yakobo omwana mulenzi.

⁶ Rakeli yaakoba ati: “Katonda asaze mu butuufu. Era awuliire okusaba kwange, yampa omwana mulenzi.” Kyeyava n'amutuuma eriina Dani.

⁷ Biliha kabiri yaatoola enda, yaazaalira Yakobo omwana omulenzi owokubiri.

⁸ Rakeli yaakoba ati: “Ntuulaine inho ni muganda wange naamukuba ekigwo eky'amaani.” Kyeyava n'amweta eriina Nafutali.

⁹ Leeya bweyabona ng'akomye okuzaala, yaatoola omwiru we Zilipa, yaamugha Yakobo abe mukazi we.

¹⁰ Zilipa oyo yaazaalira Yakobo omwana mulenzi.

¹¹ Leeya yaakoba ati: “Mbaire n'enkabi!” Kyeyava n'amutuuma eriina Gadi.

¹² Zilipa yaazaalira Yakobo omwana omulenzi owokubiri.

¹³ Leeya yaakoba ati: “Ndi musangaavu, kuba abakazi baidha kundhetanga musangaavu.” Kyeyava n'amweta eriina Asheri.

¹⁴ Mu biseera eby'amakungula g'engaano, Reubeni yaja mu nimiro yaazuulayo ebimera ebyetebwa mandurake, yaabireetera Leeya inhina. Agho Rakeli yaakoba Leeya ati: “Nkweghembye, mpa ku mandurake w'omwana wo.”

¹⁵ Leeya yairamu ati: “Wamala okuntoolaku baze. Ekyo tikikumala? Mpegaano oyenda na kuntoolaku mandurake w'omwana wange.” Rakeli yaamukoba ati: “Bw'ompa mandurake w'omwana wo, Yakobo anaaba n'iwe obwire buno.”

¹⁶ Yakobo bweyaira ng'ava mu nimiro eigulo eryo, Leeya yaafuluma yaaja y'ali yaakoba ati: “Oli n'okuba ninze obwire buno, kuba mpaireyo mandurake w'omwana wange okukugula.” Kale yaaba naye obwire obwo.

¹⁷ Katonda yaawulira okusaba kwa Leeya. Leeya yaatoola enda, yaazaalira Yakobo omwana mulenzi owokutaanu.

¹⁸ Leeya yaakoba ati: “Katonda ampaire empeera yange, kuba nagha baze omwiru wange omukazi.” Kyeyava n'amutuuma eriina Issakari.

¹⁹ Leeya yaatoola enda kabiri, yazaalira Yakobo omwana omulenzi owomukaaga.

²⁰ Leeya yaakoba ati: “Katonda ampaire ekirabo ekirungi. Mpegaano baze aidha kuntaamu ekitiisa, kuba mmuzaaliire abaana abalenzi mukaaga.” Kyeyava n'amweta eriina Zebuluni.

²¹ Olumaliira yaazaala omwana omughala, yaamutuuma eriina Dina.

²² Agho Katonda yaidhukira Rakeli, yaawulira okusaba kwe, yaamugha okuzaala.

²³ Rakeli yaatoola enda, yaazaala omwana mulenzi. Yaakoba ati: “Katonda antoireku okuvumwa.”

²⁴ Yaamutuuma eriina Yosefu ng'akoba ati: “Musengwa Katonda agwananga yaanhongera omwana omulenzi owundi.”

Yakobo aisania ni Labani

²⁵ Rakeli ng'amaze okuzaala Yosefu, Yakobo yaakoba Labani ati: “Nsiibula ndhireyo eka mu nsi ey'ewaife.

²⁶ Mpa abakazi bange n'abaana bange, be nakolereranga okufuna, bwenalinga nga nkugheereza. Ondeke nje kuba oidhi nga bwe nakugheereza obukalamu.”

²⁷ Labani yaamukoba ati: “Nganha nkukobere nti naja naalagulwa, bankobera bati Musengwa Katonda yampa enkabi olwa iwe.

²⁸ Kale nsalira empeera y'oyenda, ndidha kugikugha.”

²⁹ Yakobo yaakoba ati: “Iwe mwene oidhi bwe mbairenga nga nkugheereza, era n'ebyayo byo nga bwe bibairenga nga byeyongera nga nze mbirabirira.

³⁰ Kuba wali na bitono nga nkaali kwidha, aye mpegaano byeyongeire inho, era Musengwa Katonda yakugha enkabi ku lwange. Aye olwo mpegaano nze ndifuna li zeena eby'amaka agange.”

³¹ Labani yaabuuza ati: “Kiki kye mbe nkughe?” Yakobo yairamu ati: “Ozira ky'oidha kumpa. Aye ndidha kwongera okulabirira ebyayo byo, bw'onaaganha kino kye nja okukoba:

³² Ka mbite mu byayo byo byonabyona olwaleero, nje nga ntoolamu buli ntaama na buli mbuzi ya bitanga n'ey'obudholodhondho, na buli ntaama nto endhirugavu. Edho n'edhinaaba empeera yange.

³³ Olumaliira olimanha nga mbaire wa mazima. Bw'oliidha okwekebeedha empeera yange, n'oyagaanamu embuzi etali ya bitanga oba ya budholodhondho, n'entaama etali ndhirugavu, eyo eribalibwa nga ndhibe.”

³⁴ Labani yaakoba ati: “Kale ndhikiriiza tukole nga bw'okobye.”

³⁵ Aye ku lunaku olwo, Labani yatoolamu embuzi enume edh'emyalaala n'edha bitanga, n'embuzi enkazi dhoonadhoona edhaali edh'ebitanga n'obudholodhondho, na kiisi eriku kimyamya kyeru, era n'entaama dhoonadhoona endhirugavu, yaadhigemya batabane be okudhirabirira.

³⁶ Yaaja nadho ghalala nabo, obuleeyi bwa lugendo lwa nnaku isatu okuva ku Yakobo. Yakobo yaalabirira ebyayo bya Labani ebyasigalagho.

³⁷ Yakobo yaatoola ensaga embisi edh'emiti gino: omupopulari, omwalumondi era n'omupulane. Yaadhisisibulaku ebiwutu ebindi, dhaabaamu emyalaala emyeru.

³⁸ Ensaga edho dh'asisibwire, yaadhisimba emberi w'ensolo aghali ebintu ensolo mwe dhinhwera, kuba ensolo dhaaghakanga nga dhiidhye okunhwa.

³⁹ Kale ensolo bwe dhaaghakanga nga dhiringiriire ensaga edho, nga dhizaala obwana obulimu emyalaala n'obulimu ebitanga, n'obulimu obudholodhondho.

⁴⁰ Yakobo yaayawula entaama ku mbuzi, yaadhiringiriza ensolo edh'emyalaala n'endhirugavu dhoonadhoona edh'omu lugo lwa Labani. Mu nsambo eyo yazaalagania ebyayo bye, era yaaloba kubiyimba na bya Labani.

⁴¹ Ensolo edh'amaani bwe dhaabanga nga dhiri kughaka, nga Yakobo ata ensaga mu bintu ensolo mwe dhinhwera emberi ghaadho, dhisobole okughakira aghali ensaga edho.

⁴² Aye ensolo enafu bwe dhaabanga nga n'edhiri kughaka, nga tataayo nsaga. Kale ensolo enafu edhaazaalibwanga dhaabanga dha Labani, ate edh'amaani dhaabanga dha Yakobo.

⁴³ Mu nsambo eyo Yakobo yaafuuka mukombe inho, yaaba n'ebyayo kamaala, n'abairu abakazi n'abasaadha, n'engamiya era n'endogoyi.