Amainhama 3 - Baibuli Ekibono kya Katonda 2014

Omuntu adheemera Katonda

¹ Omusota gwali gwa lugezigezi okusinga ensolo edh'omu nsiko edhindi dhoonadhoona Musengwa Katonda dhe yakola. Agho gwabuuza omukazi guti: “Obwo bwenebwene Katonda yakoba ati mutalyanga kibala kya ku muti gwa mu nimiro waire omulala guti?”

² Omukazi yairamu ati: “Tuli ba idembe okulya ebibala eby'oku miti gyonagyona

³ okutoolaku ebyo eby'oku muti oguli ghagati mu nimiro. Katonda yatukoba obutalyanga kibala kya ku muti ogwo, oba waire okugugemaku; ati lwe tulikiryaku lwe tulifa.”

⁴ Aye omusota gwakoba guti: “Busa naire! Timwidha kufa.

⁵ Katonda yakoba atyo kuba aidhi nga bwemulirya ku muti ogwo, amaiso gaimwe galizibuka, mwaba ng'oti ni mwene, mwamanha obulungi n'obubi.”

⁶ Omukazi yaabona ng'omuti gusanhusa amaiso era nga mulungi okulyaku, era yaagwegomba olw'amagezi ge gwali guja okubaleetera. Agho yaanoga ku bibala byagwo yaalya, era yaagha ni ku musaadha we, yeena yaalya.

⁷ Olwo amaiso gaibwe bombi gaazibuka, baategeera nga bali madu. Kale baatunga amakaba ag'omuti omutiini, baagakolamu ebivaalo beeghemba.

⁸ Agho baawulira Musengwa Katonda ng'ali kutambula mu nimiro eigulo nga kuwoze era beegisa mu miti egy'omu nimiro nga tibenda ababone.

⁹ Aye Musengwa Katonda yaayeta omusaadha yaamubuuza ati: “Oli gha?”

¹⁰ Yaamwiramu ati: “Nkuwuliire ng'oli mu nimiro, naatya, kuba mbaire madu kye nviire ni neegisa.”

¹¹ Katonda yaamubuuza ati: “Naani akukobeire ati oli madu? Oliire ku kibala eky'oku muti gwe nakukoba obutalyangaku?”

¹² Omusaadha yairamu ati: “Omukazi ye wampa okubanga ninze n'ampaire ekibala ekyo zeena naalyaku.”

¹³ Musengwa Katonda yaabuuza omukazi ati: “Kiki kino ky'okoze?” Omukazi yairamu ati: “Omusota n'ogunkemenkereiza naalya.”

Katonda asala omusango

¹⁴ Musengwa Katonda yaakoba omusota ati: “Olw'okuba okoze ekyo, okolimiirwa okusinga ensolo dhoonadhoona enfuge n'edh'omu nsiko. Okuva n'olwaleero oidha kutambulanga nga weekululira ku nda yo, era olyenga enkungu enaku dhoonadhoona edh'obulamu bwo.

¹⁵ Ndidha kutaagho enzigu ghagati wo n'omukazi, ni ghagati gh'eizaire lyo n'eizaire ery'omukazi. Eizaire ery'omukazi eryo liidha kukubanga omutwe ligutentene, era weena oidha kulimoodhanga ebigere.”

¹⁶ Yaakoba omukazi ati: “Ndidha kwongeranga obulumi bungi mu biseera byo ng'oli nda; mu bulumi mw'onaazaaliranga abaana. Ate nga oidha kwendanga inho okuba aghali balo, era aidhanga kukufuga.”

¹⁷ Yaakoba omusaadha ati: “Olw'okuba wawulirisa mukazi wo bye yakukoba, waalya ku kibala eky'omuti gwe nabalobera okulyaku, eitaka likolimiirwa. Mu kufaabiikana mw'onaatoolanga eky'okulya, enaku dhoonadhoona edh'obulamu bwo.

¹⁸ Eitaka eryo liidha kumerangaku amawa n'ebindi ebikufumita; era oidha kulyanga ebimera eby'omu nsiko.

¹⁹ Oidha kufaabiikananga era ogezimulenga, memale ofunenga eky'okulya, okutuusa lw'oliirayo mu itaka mwe wakolebwa. Mu itaka mwe wava, era mu itaka mw'oliira.”

²⁰ Omusaadha yaatuuma mukazi we eriina Eva, kuba n'eyali inhina w'abalamu boonaboona.

²¹ Musengwa Katonda yaakolera Adamu ni mukazi we ebivaalo eby'amawu, yaabavaaza.

Adamu ni Eva babingibwa mu Edeni

²² Agho Musengwa Katonda yaakoba ati: “Bona, omuntu afuuse ng'oti niife, okumanhanga obulungi n'obubi. Tutamuganha kunoga kibala ku muti ogw'obulamu, na kukirya, n'aghangaala byanda na byanda.”

²³ Kale Musengwa Katonda yaamutoola mu nimiro ey'e Edeni, alimenga eitaka mwe yakolebwa,

²⁴ yaamubingira kuliya. Ku luuyi olw'enimiro olw'e buvandhuba yataayo ebitonde ebiri n'amaghagha ebyetebwa kerubi, era n'empiima eyaka, era ng'ekyukira ku ndhuyi dhoonadhoona okukuumanga engira eja ku muti ogw'obulamu.