Amainhama 29 - Baibuli Ekibono kya Katonda 2014

Yakobo atuuka mu maka ga Labani

¹ Agho Yakobo yeeyongera okutambula, yaatuuka mu nsi y'abantu ab'e buvandhuba.

² Yaja okulinga ati, yaabona ensulo mu nsiko n'ebighaso eby'entaama bisatu, nga dhirambaire agho aghali ensulo; kuba mu nsulo omwo mwe baanhwesanga entaama. Ku nsulo eyo nga basandikiraku eibaale eikologho.

³ Ebighaso eby'entaama byonabyona buli lwe byesolozanga, ng'olwo abaayi bagalangula eibaale eryo okuva ku munwa gw'ensulo, nga banhwesa entaama; kabiri nga baliizaagho okusandikira ensulo.

⁴ Yakobo yaabuuza abaayi ab'ebighaso eby'entaama bire ebisatu, ati: “Bakagwa, muviira gha?” Bairamu bati: “Tuviira Harani.”

⁵ Yaababuuza ati: “Mwidhi Labani mwidhukulu wa Nahori?” Bairamu bati: “Tumwidhi.”

⁶ Yaabuuza ati: “Aliyo mukalamu?” Bairamu bati: “Aliyo mukalamu era bona, mughala we Rakeli wuuyo ali kwidha n'entaama.”

⁷ Yakobo yaakoba ati: “Bona, bukaali musana, ekiseera eky'okwingiza ebyayo mu bisibo kikaali kutuuka. Kale munhwese entaama, mudhiizeeyo mudhaaye.”

⁸ Baakoba bati: “Titughanga kukola tutyo, okutoolaku ng'ebighaso by'entaama byonabyona byesoloiza, twagalangula eibaale okusandukula ku nsulo, memale twanhwesa entaama.”

⁹ Yakobo yali akaayogera nabo, Rakeli yaatuuka n'entaama dha ise, kuba n'eyadhaayanga.

¹⁰ Yakobo bweyabona Rakeli mughala wa Labani ng'ali n'entaama dha Labani ise, yaaja yaagalangula eibaale okusandukula ensulo, yaanhwesa entaama edho. Labani oyo yali mwanhina wa inhina wa Yakobo.

¹¹ Agho yaagwa Rakeli mu kifuba, yaasangaala inho, era yaakuba n'omuzira.

¹² Yakobo yaakobera Rakeli ati: “Nze ndi waluganda ni lata wo, ndi mwana wa songa wo Rebekka.” Rakeli yaalumuka okukobera ise.

¹³ Labani bweyawulira ati Yakobo omwana wa mwanhina aidhie, yaalumuka, yaaja okumusangaaza. Yaamugwa mu kifuba era yaamwevumba, yamwingiza mu ndhu ye. Yakobo yaakobera Labani ebimufaaku byonabyona.

¹⁴ Labani yaakoba ati: “Bwenebwene oli musaayi gwange era wa mu nda.” Yakobo yaamala naye omwezi mulamba.

Yakobo akolera Labani olw'okufuna Rakeli ni Leeya

¹⁵ Agho Labani yaakoba Yakobo ati: “Toidha kunkoleranga mirimo ku bwereere, waire oli waluganda lwange. Nkobera empeera ye wandyenze?”

¹⁶ Mpegaano, Labani yali ni baghala be babiri; eriina ery'omukulu nga ni Leeya, ate ery'omuto nga ni Rakeli.

¹⁷ Leeya tiyali mulungi inho, aye enkula ya Rakeli yali ng'esanhusa okubona.

¹⁸ Yakobo yali ayenda inho Rakeli, kale yaakoba ati: “Ndidha kukukolera okumala emyaka musanvu ompe Rakeli mughala wo omuto.”

¹⁹ Labani yaakoba ati: “Okumugha iwe kisinga okumugha omusaadha owundi yeenayeena. Kale ba ghano ninze.”

²⁰ Yakobo yaakolera emyaka musanvu afune Rakeli, era gyamubonekera ng'oti nnaku bunaku entono dhiti, olw'okumwenda okungi kwe yali nakwo.

²¹ Agho Yakobo yaakoba Labani ati: “Mpa mughala wo mmubayize, kuba mmazeeyo ekiseera kyange.”

²² Kale Labani yaayeta abantu boonaboona ab'omu kiketezo ekyo, yaakola embaga.

²³ Aye obwire obwo yatoola mughala we Leeya yaamutwalira Yakobo, yaaba naye mu buliri.

²⁴ Labani yaatoola omwiru we omukazi ayetebwa Zilipa yaamugha mughala we Leeya, okumugheereza.

²⁵ Bwe bwakya enkyo, Yakobo yaja okubona ati, nga ye baamugha ni Leeya. Agho yaaja yaakoba Labani ati: “Kiki kino ky'onkoze? Tyakukolera lwa kwenda kufuna Rakeli? Kale lwaki wanguyiiya?”

²⁶ Labani yairamu ati: “Tikikolebwa mu nsi yaife, okughaayo omuto n'asooka omukulu okubayira.

²⁷ Sooka omaleku enaku omusanvu edh'embaga y'oyo, memale tulikugha owundi, ng'onkoleire kabiri okumala emyaka egindi musanvu.”

²⁸ Yakobo yaaganha, era enaku omusanvu bwe dhaawaaku, Labani yaamugha mughala we Rakeli okuba mukazi we.

²⁹ Labani yaatoola omwiru we omukazi ayetebwa Biliha yaamugha mughala we Rakeli, okumugheereza.

³⁰ Yakobo yaaba ni Rakeli yeena era yaamwenda inho okusinga Leeya. Agho Yakobo yaakolera Labani okumala emyaka egindi musanvu.

Abaana ba Yakobo

³¹ Musengwa Katonda bweyabona nga Yakobo ayenda inho Rakeli okusinga Leeya, yaagha Leeya okuzaala, aye Rakeli yaasigala nga mugumba.

³² Leeya yaatoola enda, yazaala omwana mulenzi, yaamutuuma eriina Reubeni, kuba yakoba ati: “Musengwa Katonda aboine okudaazibwadaazibwa kwange, mpegaano baze aidha kuunhenda.”

³³ Kabiri yaatoola enda, yaazaala omwana mulenzi, yaakoba ati: “Musengwa Katonda yawulira nga tyendebwa kyaviire era n'ampa omwana ono.” Kale yaamutuuma eriina Simeoni.

³⁴ Era yaatoola enda, yaazaala omwana mulenzi, yaakoba ati: “Ku mukuzi guno baze aidha kugumira ku nze, kuba mmuzaaliire abaana abalenzi basatu.” Kyeyava n'amutuuma eriina Levi.

³⁵ Era yaatoola enda kabiri yaazaala omwana mulenzi. Yaakoba ati: “Ku mukuzi guno ndidha kusaaka Musengwa Katonda.” Kyeyava n'amutuuma eriina Yuda. Agho yaakoma okuzaala.