Amainhama 27 - Baibuli Ekibono kya Katonda 2014

Isaaka asabira Yakobo enkabi

¹ Agho Isaaka bweyali ng'akairiighe, era ng'amaiso ge gaidhieku ekifu, nga takaaghanga kubona, yaayeta Esau mutabane we omukulu. Yaamukoba ati: “Mwana wange!” Yaavugira ati: “Ndi ghano.”

² Isaaka yaamukoba ati: “Bona, nkairiighe, tiidhi lunaku lwe ndifiiraku.

³ Kale, mpegaano gema akalaso ko n'obusaale bwo, oje mu nsiko ondhiigire ensolo,

⁴ onfumbire emamba ey'akawoowo ye nhenda, ogindeetere ndye, memale nkusabire enkabi nga nkaali kufa.”

⁵ Rebekka yaawulira nga Isaaka ali kwogera ni mutabane Esau. Kale Esau bweyaja mu nsiko okuyiiga ensolo agireete,

⁶ Rebekka yaakoba omwana we Yakobo ati: “Mpuliire lata wo ng'akoba muganda wo Esau ati,

⁷ ‘Ndhiigira ensolo, onfumbire emamba ey'akawoowo ngirye, memale nkusabire enkabi mu maiso ga Musengwa Katonda nga nkaali kufa.’

⁸ Mpegaano ni, mwana wange, mpulirisa era okole kye nja okukukoba.

⁹ Ja mu kisibo ky'embuzi ondeetereyo embuzi ento enungi ibiri, ndhirongoose, nfumbire lata wo emamba ey'akawoowo y'ayenda.

¹⁰ Iwe oidha kugimutwalira alye, memale akusabire enkabi ng'akaali kufa.”

¹¹ Aye Yakobo yaakoba Rebekka inhina ati: “Oidhi nga muganda wange Esau aliku obuviiri ku mubiri gwe, aye nze nziraku.

¹² Tomanha bbaaba bw'angemaku n'azuula nga ndi kumulimba, olwo ni neereetaku okukolimirwa mu kifo ky'okusabirwa enkabi.”

¹³ Inhina yaamwiramu ati: “Mwana wange, ekikolimo ekyo kiiriranga ku nze. Aye kola nga bwendi kukukoba, oje ondeetere embuzi.”

¹⁴ Kale Yakobo yaaja yaadhinona, yaadhireetera inhina. Inhina yaafumba emamba ey'akawoowo lata we y'ayenda.

¹⁵ Rebekka yaatoolayo ebivaalo bya Esau omwana we omukulu, ebisinga okuba ebirungi bye yali atereike mu ndhu, yaabivaaza omwana we omuto Yakobo.

¹⁶ Yaata amawu g'embuzi dhire ento ku mikono gya Yakobo, ni mu nkoto aghataali buviiri.

¹⁷ Agho yaagemya omwana we Yakobo emamba ey'akawoowo n'omugaati, bye yali afumbye.

¹⁸ Yakobo yaaja eri ise, yaakoba ati: “Bbaaba!” Yaavugira ati: “Ndi ghano. Niiwe ani mwana wange?”

¹⁹ Yakobo yaakoba ise ati: “Ninze Esau omwana wo omuberi. Nkoze nga bwe wankobye. Mpegaano ni situka otyame, olye ku mamba ye ndhiize, olwo onsabire enkabi.”

²⁰ Isaaka yaakoba mutabane ati: “Ogizwire otya amangu otyo, mwana wange?” Yakobo yaamwiramu ati: “Musengwa Katonda wo n'anhambye.”

²¹ Isaaka yaakoba Yakobo ati: “Kale seeta ghano, mwana wange, nkugemeku mbone oba nga bwene niiwe omwana wange Esau.”

²² Yakobo yaaseeta eri Isaaka ise, Isaaka yaamugemaku, yaakoba ati: “Amamiro ga Yakobo, aye emikono gya Esau!”

²³ Yaaloba kumutegeera, kuba emikono gye gyaliku obuviiri ng'oti n'egya muganda we Esau; kale yaaganha okumusabira enkabi.

²⁴ Aye era yaamubuuza kabiri ati: “Bwenebwene niiwe omwana wange Esau?” Yairamu ati: “Ninze.”

²⁵ Isaaka yaakoba ati: “Ndeetera ebyo by'oyiize, mwana wange, ndye olwo nkusabire enkabi.” Yakobo yaabimuleetera, yaalya. Era yaamuleetera n'omwenge ogw'emizabbibu, yaanhwa.

²⁶ Agho lata we yaamukoba ati: “Seeta ongwe mu kifuba, mwana wange.”

²⁷ Yaaseeta, yaamugwa mu kifuba. Isaaka yaawunhiza akawoowo k'ebivaalo bye, yaamusabira enkabi, ng'akoba ati: “Akawoowo ak'omwana wange kali ng'oti n'akawoowo ak'enimiro Musengwa Katonda gy'aghaire enkabi!

²⁸ Katonda akughenga ku musulo oguva mu igulu, era agimusenga enimiro dho. Akughenga engaano kamaala, n'omwenge ogw'emizabbibu mungi!

²⁹ Abantu aba buli nsambo bakugheerezenga, n'amaghanga kamaala gakukubirenga amakiryaivu! Ofugenga baganda bo, era abaana ba inhoko bakukubirenga amakiryaivu! Kiisi akukolimira akolimirwenga, era kiisi akusabira enkabi, yeena agheebwenga enkabi!”

Esau asaba Isaaka okumusabira enkabi

³⁰ Isaaka bweyali nga yaakamala okusabira Yakobo enkabi, era nga Yakobo akaali na kuva ghali lata we, muganda we Esau yaingira ng'ava okuyiiga.

³¹ Era yeena yaafumba emamba ey'akawoowo, yaagitwalira ise, yaamukoba ati: “Bbaaba, situka otyame, olye ku mamba nze omwana wo ye ndhiize, olwo onsabire enkabi.”

³² Lata we Isaaka yaamubuuza ati: “Niiwe ani?” Yairamu ati: “Ninze Esau omwana wo omuberi.”

³³ Isaaka yaadhugumira inho, yaabuuza ati: “Ate ole abaire nga naani, eyayiize ensolo, n'andeetera emamba ni ndya, ng'okaali kwidha, era ni mmusabira enkabi? Era bwenebwene aligheebwa enkabi.”

³⁴ Esau bweyawulira ise by'akobye, yaawowoola inho olw'okunakughala. Yaakoba ise ati: “Bbaaba, nkweghembye zeena onsabire enkabi.”

³⁵ Aye Isaaka yaakoba ati: “Muganda wo aidhie yanguya, yaatwala enkabi dho.”

³⁶ Esau yaakoba ati: “Ti kyeyava n'atuumibwa eriina Yakobo? Bwenebwene lyamutuukaaniraku bukalamu, kuba guno omukuzi gwakubiri ng'atwala ekifo kyange. Yantoolaku obukulu bwange obw'okuba omwana omuberi, ni mpegaano bona atoireku enkabi dhange.” Agho yaakoba ati: “Nze tonterekeireyooku ku nkabi?”

³⁷ Isaaka yairamu ati: “Mmufiire musengwa wo, era mmughaire baganda be boonaboona babenga bagheereza be, era naamugha engaano n'omwenge ogw'emizabbibu. Kale kiki kye naakukolera iwe, mwana wange.”

³⁸ Esau yeeghemba ise ati: “Bbaaba, enkabi oli na ndala eti yonka? Wo bbaaba nkweghembye zeena nsabira enkabi!” Agho yaatoolera okuwowoola.

³⁹ Agho lata we Isaaka yaamwiramu ati: “Enimiro dho tidhiibengamu bugimu, era toofunenga musulo guva mu igulu.

⁴⁰ Oidha kufunanga eky'okulya ng'okozesa mpiima yo, era oidha kubanga mugheereza wa muganda wo. Aye bw'olimulwanisa n'omughangula, oliwona okufugibwa kwe.”

⁴¹ Esau yaakyagha Yakobo olw'enkabi ise dhe yamusabira. Esau yaakoba mule ati: “Enaku edh'okulira nga bbaaba afiire, dhiri kumpi kutuuka. Bwe dhirituuka, ndiita muganda wange Yakobo.”

⁴² Aye Rebekka bweyawulira ebyo Esau omwana we omukulu bye yali ali kutegeka okukola, yaayesa Yakobo omwana we omuto, yaamukoba ati: “Bona, muganda wo ali kutegeka okukwita yeemale ekiruyi.

⁴³ Kale mpegaano mwana wange, kola nga bwendi kukukoba. Situkiramu olumukire ye mwanhinaze Labani mu kibuga Harani,

⁴⁴ obe n'oyo okumala entangama, okutuusa obusungu bwa muganda wo lwe buliikaikana,

⁴⁵ ni yeerabira kye wamukola. Olwo ndituma, naakutoolayo eyo. Tyenda kubafiirwa mwembi ku lunaku lulala.”

⁴⁶ Rebekka yaakoba Isaaka ati: “Obulamu bwange bwesiniirwa abakazi ba Esau Abahitti. Yakobo yeena bw'aba ow'okubayiza omukazi Omuhitti, nze mmala gafa.”