Amainhama 26 - Baibuli Ekibono kya Katonda 2014

Isaaka aja okuba e Gerari

¹ Agho endhala eyindi yaagwa mu nsi, okuleka ere eyagwa mu biseera bya Aburahamu. Isaaka yaaja eri Abimeleki, kyabazinga w'Abafilisiti mu Gerari.

² Musengwa Katonda yaabonekera Isaaka, yaakoba ati: “Otaikirira mu Misiri; sigala mu nsi eno, obe ghe nnaakukoba.

³ Senga mu nsi eno, ndidha kubanga n'iwe era nkughenga enkabi. Ndidha kukugha iwe ni baidhukulu bo, ebiketezo eby'ensi bino byonabyona, era ntuukirize ekirayiro kye nalayirira lata wo Aburahamu.

⁴ Ndidha kukugha abaidhukulu kamaala inho ng'oti n'emuunienie edh'oku igulu, era mbaghe ebiketezo eby'ensi bino byonabyona. Era mu baidhukulu bo, amaghanga goonagoona ku nsi mwe galigheerwa enkabi;

⁵ kuba Aburahamu yawulira bye namusikiriranga, era yaagondera amateeka gange goonagoona n'ebiragiro byange.”

⁶ Kale Isaaka yaaba mu Gerari.

⁷ Abasaadha baayo bwe baamubuuza ku mukazi we, yaakoba ati mwanhina. Kuba yatya okukoba ati mukazi we, abasaadha baayo balobe kumwita olwa Rebekka, eyali ng'aboneka obulungi einho.

⁸ Isaaka bweyali ng'amazeeyo entangama, Abimeleki, kyabazinga w'Abafilisiti, yaalengera okuva mu dinisa ye, yaabona Isaaka ng'ali kuzaanha ni mukazi we Rebekka.

⁹ Abimeleki yaayeta Isaaka, yaakoba ati: “Bwenebwene ono mukazi wo, kale lwaki wakoba oti mwanhoko?” Isaaka yaamwiramu ati: “Nze nadhuuba nti baidha kundhita bwe nkoba nti oyo mukazi wange.”

¹⁰ Abimeleki yaakoba ati: “Kiki kino ky'otukoze? Owundi ku basaadha bange yandisoboire okuba ni mukazi wo, era olwo wandibaire otuleeseeku omusango.”

¹¹ Kale Abimeleki yaasikirira abantu boonaboona ati: “Kiisi agema ku musaadha ono, oba ku mukazi we, wa kwitibwa.”

¹² Agho Isaaka yaasiga ensigo mu nsi eyo, yaakungulamu emikuzi kikumi ku bye yasiga mu mwaka ogwo gwene, kuba Musengwa Katonda yamugha enkabi.

¹³ Era yaafuna ebintu kamaala, nga byeyongera bweyongere, yaafuuka mukombe.

¹⁴ Yali n'engo edh'ente, n'entaama, n'embuzi, era n'abagheereza kamaala. Kino kyaleetera Abafilisiti okumugemerwa ensaalwa.

¹⁵ Abafilisiti bano baali nga basembye ensulo dhoonadhoona baadhiidhuzaamu eitaka. Ensulo dhino dhaali nga dhisimiibwa abagheereza ba lata we Aburahamu, nga Aburahamu akaali mulamu.

¹⁶ Agho Abimeleki yaakoba Isaaka ati: “Va mu nsi yaife oje, kuba ofuuse wa maani inho okutusinga.”

¹⁷ Kale Isaaka yaavaayo, yaasimba weema dhe mu kiiko eky'e Gerari, yaaba eyo.

¹⁸ Era yaayerula buyaaka ensulo edhaali dhisimiibwa nga Aburahamu ise akaali mulamu, Abafilisiti dhe baasemba nga Aburahamu amaze okufa. Isaaka yadheeta amaina geene ago ise ge yadhituuma.

¹⁹ Aye abagheereza ba Isaaka bwe baasima ensulo mu kiiko, ni baazuula amaadhi amalungi,

²⁰ abaayi ab'e Gerari baakaayana n'abaayi ba Isaaka, nga bakoba bati: “Amaadhi gano gaife.” Isaaka yaatuuma ensulo eyo eriina Eseki, kuba baakaayana naye.

²¹ Abagheereza ba Isaaka baasima ensulo eyindi, era yoona baagikaayanira. Kale yaagituuma eriina Sitina.

²² Eyo yaavaayo, yaasima ensulo eyindi, baaloba kugikaayanira; yaagituuma eriina Rehobothi. Yaakoba ati: “Mpegaano Musengwa Katonda atughaire aghagazi, twidha kwala mu nsi.”

²³ Olwava eyo, yaaniinaniina e Beerisheba.

²⁴ Musengwa Katonda yaamubonekera obwire obwo, yaakoba ati, “Ninze Katonda wa lata wo Aburahamu. Otatya, kuba ndi n'iwe. Ndikugha enkabi, era naakugha abaidhukulu kamaala, olw'omugheereza wange Aburahamu.”

²⁵ Kale, Isaaka yaazimba eyo alutaari, yaasinza Musengwa Katonda. Yaazimbayo weema ye, era abagheereza be baasimayo ensulo.

Isaaka akola endagaano ni Abimeleki

²⁶ Agho Abimeleki yaava mu Gerari ng'ali ghalala ni Ahuzzathi amugha amagezi, ni Fikoli omuduumizi w'amagye ge, baaja eri Isaaka.

²⁷ Isaaka yaababuuza ati: “Kiki ekibaleese ye ndi, ate nga mwankyagha era mwaminga mu nsi yaimwe?”

²⁸ Bairamu bati: “Tuboine nga bwenebwene Musengwa Katonda ali n'iwe, kye tuva ni tukoba tuti ghabeegho ekirayiro ghagati wo n'ife, era tukole endagaano n'iwe,

²⁹ tuti iwe tootukolengaku kabi, nga ife twena bwe tutaakukolaku kabi. Twakukolera bikalamu byereere, era twakuleka waaja miraala. Mpegaano Musengwa Katonda niiwe y'aghaire enkabi.”

³⁰ Agho Isaaka yaabafumbira embaga, baalya era baanhwa.

³¹ Enkyo bwe baazuuka, baakola ekirayiro ku buli luuyi. Isaaka yaabasiibula, baayawukana naye nga bali miraala.

³² Ku lunaku lwene olwo, abagheereza ba Isaaka baidha, baamukoberaku ku nsulo ye baali nga basimye, baakoba bati: “Tuzwire amaadhi.”

³³ Ensulo eyo yaagyeta Shiba. Okwo n'okwava ekibuga okutuumibwa eriina Beerisheba, n'okutuusa mpegaano.

Baka Esau abaava endha

³⁴ Esau bweyagheza emyaka amakumi ana (40) egy'obukulu, yaabayiza Yuditha mughala wa Beeri Omuhitti. Era yaabayiza ni Basemathi mughala wa Eloni, nga yeena Muhitti.

³⁵ Abakazi bano bombi baaleetera Isaaka ni Rebekka okuba mu bulamu obuzibu.