Amainhama 25 - Baibuli Ekibono kya Katonda 2014

Baidhukulu ba Aburahamu abandi

¹ Aburahamu yabayiza omukazi owundi, eriina lye nga ni Ketura.

² Yaamuzaalira Zimurani, ni Yokoshani, ni Medani, ni Midiani, ni Ishibaki era ni Shua.

³ Yokoshani yazaala Sheba ni Dedani. Abaana ba Dedani ni bano: Ashurimi, ni Letushimi, ni Leunimi.

⁴ Abaana ba Midiani ni bano: Efa, ni Eferi, ni Hanoka, ni Abida, ni Elida. Abo boonaboona baidhukulu ba Ketura.

⁵ Aburahamu yalekera Isaaka ebintu byonabyona bye yali nabyo.

⁶ Aye Aburahamu oyo bweyali ng'akaali mulamu, yagha abaana be ab'abakazi ab'embali ebirabo. Yabasindika mu nsi ey'e buvandhuba, bave aghali omwana we oyo Isaaka.

Okufa n'okuziikibwa kwa Aburahamu

⁷ Aburahamu yaghangaala emyaka kikumi na nsanvu n'etaanu (175),

⁸ era yaafa nga musaadha mukaire ow'emyaka emiidhuvu; yaatwalibwa eri badhaadha be.

⁹ Batabane be, Isaaka ni Ishimaeli, baamuziika mu mpuku ya Makipela e buvandhuba bwa Mamure, mu nimiro eyali ey'Efuroni, omwana wa Zohara Omuhitti.

¹⁰ Eyo n'enimiro Aburahamu ye yagula ku Bahitti era omwo mwe yaaziikibwa ni mukazi we Sara.

¹¹ Aburahamu bweyamala okufa, Katonda yaagha Isaaka enkabi. Isaaka yaabanga kumpi ni Beerilahairoi.

Baidhukulu ba Ishimaeli

¹² Bano ni baidhukulu ba Ishimaeli omwana wa Aburahamu eyamuzaalirwa Hagari Omumisiri eyali omwiru wa Sara.

¹³ Gano n'amaina gaibwe nga bwe bairaganwaku mu kuzaalibwa kwaibwe: Omwana omuberi, ni Nebaiothi, memale kwairaku Kedari, ni Adubeeli, ni Mibusamu,

¹⁴ ni Mishima, ni Duma, ni Massa,

¹⁵ ni Hadadi, ni Tema, ni Yeturi, ni Nafishi, era ni Kedema.

¹⁶ Abo n'abaana ba Ishimaeli, nga badhaadha ba bika ikumi na bibiri. Era ebyalo byaibwe, n'ebifo mwe baasimba weema dhaibwe byatuumibwa amaina gaibwe.

¹⁷ Ishimaeli yaghangaala emyaka kikumi n'asatu na musanvu (137), yaafa era yatwalibwa eri badhaadha be.

¹⁸ Baidhukulu ba Ishimaeli baabanga mu kiketezo ekiri ghagati gha Havila ni Shuri, e buvandhuba bwa Misiri, ng'oja mu Assiria. Baabanga eyo nga beeswireku akata ku baidhukulu ba Aburahamu abandi.

Okuzaalibwa kwa Esau ni Yakobo

¹⁹ Bano n'abaana ba Isaaka omwana wa Aburahamu:

²⁰ Isaaka bweyagheza emyaka amakumi ana (40) egy'obukulu, yaabayiza mughala wa Bethueli Omuarami ow'e Paddanarama, ayetebwa Rebekka, mwanhina Labani.

²¹ Isaaka yaasabira mukazi we, eyali omugumba. Musengwa Katonda yairamu okusaba kwe, Rebekka yaatoola enda.

²² Enda eyo yali ya balongo, era bwe baali nga bakaali kuzaalibwa, baakontaganira mule mu nda ye. Rebekka yaakoba ati: “Oba nga kiti bwekiri, kingasa ki okusigala nga ndi mulamu?” Agho yaaja okwebuuzaaku ku Musengwa Katonda.

²³ Musengwa Katonda yaamukoba ati: “Amaghanga abiri gali mu nda yo; olizaala ebika bibiri ebyawukaine. Ekindi kinaasinzanga kiinaakyo amaani; omukulu n'anaagheerezanga omuto.”

²⁴ Agho enaku edh'okuzaala dhaatuuka nga bwenebwene ali n'abaana balongo mu nda.

²⁵ Omuberi yaafuluma ng'omubiri gwe gwa kasaayisaayi era nga gwidhwire buviiri ng'oti luwu; kale baamutuuma eriina Esau.

²⁶ Owokubiri yaafuluma, ng'omukono gwe gugemereire ekibbonge kya Esau kale baamutuuma eriina Yakobo. Rebekka yaja okuzaala nga Isaaka agheziiza emyaka nkaaga (60) egy'obukulu.

Esau agaba obukulu bwe obw'okuba omwana omuberi

²⁷ Abaisuka abo bombi baakula. Esau yaafuuka omuyiizi omukugu, era omusaadha anhumirwa obulamu obw'omu nsiko. Aye Yakobo yaaba musaadha musirise, era eyasigalanga ghaka.

²⁸ Isaaka yasinga kwenda Esau, kuba yalyanga ku nsolo Esau dhe yayiiganga. Aye Rebekka yaasinga kwenda Yakobo.

²⁹ Lwali lulala Yakobo yaafumba ebidhandhaali, Esau yaira eka ng'ava mu nsiko, endhala ng'eri kumuluma inho.

³⁰ Yaakoba Yakobo ati: “Endhala eyenda kundhita! Mpa ndye ku bidhandhaali byo ebimyuse bityo.” Kyebaava bamweta Edomu.

³¹ Yakobo yairamu ati: “Mpaamu obukulu bwo obw'okuba omwana omuberi memale mbikughe.”

³² Esau yaakoba ati: “Mbona ndi kumpi kufa obukulu bulingasa ki?”

³³ Yakobo yaakoba ati: “Layira memale.” Esau yaalayira, yaagha Yakobo obukulu bwe.

³⁴ Agho Yakobo yaagha Esau emere n'ebidhandhaali. Esau yaalya era yaanhwa, era yaasituka, yaaja. Atyo Esau bweyanhoomoola obukulu bwe.