Amainhama 23 - Baibuli Ekibono kya Katonda 2014

Okufa n'okuziikibwa kwa Sara

¹ Sara yaghangaala emyaka kikumi n'abiri na musanvu (127),

² yaafiira mu Kiriatharaba, ng'ekyo n'e Heburoni, mu nsi ey'e Kanaani. Aburahamu yaakola emikolo egy'okulira mukazi we.

³ Agho Aburahamu yaasituka yaava aghali omufu we, yaaja y'Abahitti, yaakoba ati:

⁴ “Nze ndi wa ndha mu imwe era omusenze. Munganhe nfune ekifo mu nsi yaimwe, eky'okuziikamu mukazi wange afiire.”

⁵ Abahitti baamwiramu bati:

⁶ “Musengwa, wulira kye tuli kukoba Iwe oli mukungu mukologho mu ife. Ziika omufu wo mu magombe g'oneerobozaamu ku ago goonagoona ge tuli nago. Ghazira waire omulala ku ife, anaakwima amagombe ge, oba okukulobera okuziikamu omufu wo.”

⁷ Agho Aburahamu yaakubira Abahitti amakiryaivu beene nsi,

⁸ yaabakoba ati: “Oba nga munganhie okuziika omufu wange, mumpulirise muneegayiriregho Efuroni mutabane wa Zohara,

⁹ ampe empuku ye eri e Makipela, ku nkomerero y'enimiro; agingulize ghano ku mughendo gwayo omwidhuvu nga mwena mubona, ebe ekifo kyange eky'okuziikangamu abafu.”

¹⁰ Efuroni mwene yali ng'atyaime ghalala n'Abahitti abandi, mu kifo eky'olwekobaano ku mulyango gw'ekibuga agho yairamu nga n'abaligho boonaboona bawulira ati:

¹¹ “Busa musengwa, wulira kye nkoba. Enimiro yoonayoona n'empuku egirimu, mbikughaire. Mbikugheereire ghano ng'abantu bange boona babona, oziikemu omufu wo.”

¹² Aye Aburahamu yaakubira Abahitti amakiryaivu.

¹³ Yaakoba Efuroni nga beene nsi abo bawulira ati: “Nkweghembye, wulira kye nkoba. Enimiro yoonayoona ndidha kugigula bugule. Nganha ngisasulire, memale nziikemu omufu wange.”

¹⁴ Efuroni yairamu Aburahamu ati:

¹⁵ “Musengwa wulira kye nkoba. Eitaka erigula ebitundu bya feeza ebikumi ebina byonka (400), ni ki ghagati ghange n'iwe? Ziikamu omufu wo.”

¹⁶ Aburahamu yaaganha Efuroni kye yakoba. Agho yaapimira Efuroni oyo feeza ye yakoba, ng'Abahitti bawulira ebitundu ebikumi ebina, ng'akozesa ekipimo eky'abasuubuzi.

¹⁷ Kale etyo enimiro ya Efuroni ey'e Makipela, ku luuyi olw'e buvandhuba olw'e Mamure, bweyafuuka eya Aburahamu yoonayoona okutuukira irala y'ekoma. Enimiro eyo yalimu empuku era n'emiti.

¹⁸ Abahitti boonaboona abaali mu kifo eky'olwekobaano ku mulyango gw'ekibuga, baakakasa ng'enimiro eyo ya Aburahamu.

¹⁹ Ebyo olwawa, Aburahamu yaaziika mukazi we Sara mu mpuku ey'omu nimiro ey'e Makipela, ku luuyi olw'e buvandhuba olw'e Mamure, ng'ekyo ni Heburoni, mu nsi ey'e Kanaani.

²⁰ Kale enimiro n'empuku yaamu ebyali eby'Abahitti, byafuukira irala ekifo kya Aburahamu eky'okuziikangamu abafu be.