Amainhama 22 - Baibuli Ekibono kya Katonda 2014

Isaaka agheebwayo ye Katonda ng'omusengo

¹ Ebyo nga biwoire, Katonda yaaleba Aburahamu yaamweta ati: “Aburahamu!” Aburahamu yaavugira ati: “Ndi ghano.”

² Katonda yaamukoba ati: “Twala Isaaka omwana wo omulala ati bedengedenge era y'ogonza, oje mu nsi ey'e Moria. Eyo y'oidha okumugheerayo ng'ekigheebwayo ekyokebwa ku lusozi lwe ndikulaga.”

³ Bwe bwakya enkyo, Aburahamu yaawuuna yaayasaaga enku edh'okwokya ekigheebwayo, yaatwika endogoyi ye. Yaatwalaku babiri ku bagheereza be, n'omwana we Isaaka, yaatoolera okuja mu kifo Katonda kye yali amukobye.

⁴ Ku lunaku olwokusatu bweyalinga ati, yaalengera ekifo ekyo.

⁵ Yaakoba abagheereza be ati: “Musigale ghano n'endogoyi, nze n'omwisuka tweyongereyo ere tusinze, memale twire ye muli.”

⁶ Aburahamu yaatoola enku edh'okwokya ekigheebwayo, yaadhitwika omwana we Isaaka, mwene yaagema omuliro n'akambe, baaja bombi.

⁷ Isaaka yaayeta ise Aburahamu ati: “Bbaaba!” Aburahamu yaavugira ati: “Ndi ghano, mwana wange.” Isaaka yaamubuuza ati: “Ndi kubona omuliro n'enku biibino, aye entaama ento ey'okwokebwa ng'ekigheebwayo eri gha?”

⁸ Aburahamu yaamwiramu ati: “Mwana wange, Katonda mwene n'aidha okutugha entaama ento ey'okwokebwa ng'ekigheebwayo.” Agho baaja bombi nga beeyongerayo.

⁹ Bwe baatuuka mu kifo Katonda kye yali amaze okumukoberaku, Aburahamu yaazimba agho alutaari, yaayaliiraku enku. Agho yaasiba omwana we Isaaka yaamuta ku nku ku alutaari.

¹⁰ Bwe yamala, yaagema akambe aite omwana we.

¹¹ Aye malaika wa Musengwa Katonda ng'ali mu igulu yaamweta ati: “Aburahamu, Aburahamu!” Aburahamu yaavugira ati: “Ndi ghano!”

¹² Yaamukoba ati: “Otaita mwisuka oyo oba okumukolaku akabi koonakoona. Mpegaano ntegeire ng'otya Katonda, kuba toonhimye mwana wo omulala bedengedenge.”

¹³ Aburahamu yaja okulinga ati einhuma we, ng'abona entaama enume ng'amayiga gaayo galaaliire mu kisaka. Yaaja, yaagitoolayo, yaagighaayo ng'ekigheebwayo ekyokebwa, mu kifo ky'omwana we.

¹⁴ Aburahamu yaatuuma ekifo ekyo eriina “Musengwa Katonda atugha.” Era ni leero abantu bakoba bati ku lusozi lwa “Musengwa atugha.”

¹⁵ Agho malaika wa Musengwa Katonda ng'ali mu igulu yaayeta Aburahamu omukuzi ogwokubiri,

¹⁶ yaakoba ati: “Musengwa Katonda akoba ati ndayiire mu liina lyange nti, kuba okoze otyo n'oloba kuunhima mwana wo omulala ati bedengedenge,

¹⁷ bwenebwene ndikugha enkabi, era ndikwaliza abaidhukulu baaba kamaala inho ng'oti n'emuunienie edh'oku igulu, era ng'oti n'omusenho oguli ku mbali okw'enhandha. Era baghangulenga ebibuga by'abazigu baibwe.

¹⁸ Mu baidhukulu bo, amaghanga goonagoona ag'oku nsi mwe galigheerwa enkabi, kuba ogondeire ekiragiro kyange.”

¹⁹ Agho Aburahamu yairayo eri abagheereza be, baasituka bairayo boonaboona ghalala e Beerisheba, era Aburahamu yaabanga eyo.

Baidhukulu ba Nahori

²⁰ Nga ghabiseegho ekiseera, Aburahamu baamukobera bati ni Milika yeena yali yazaalira muganda we Nahori abaana bano:

²¹ Uzi omwana omuberi, ni Buza muganda we; ni Kemueli lata wa Aramu,

²² ni Kesedi, ni Hazo, ni Pilidashi, ni Yidilafi, era ni Bethueli.

²³ Bethueli oyo n'eyazaala Rebekka. Abo n'abaana omunaana, Milika be yazaalira Nahori muganda wa Aburahamu.

²⁴ Era Nahori yali n'omukazi we ow'embali ng'ayetebwa Reuma. Yeena yaazaala abaana bano: Teba, ni Gahamu, ni Tuhashi, era ni Maaka.