Amainhama 21 - Baibuli Ekibono kya Katonda 2014

Okuzaalibwa kwa Isaaka

¹ Musengwa Katonda yagemerwa Sara ekivunika era yaamukolera nga bweyamusuubiza.

² Kale Sara yaatoola enda era yaazaalira Aburahamu omwana mulenzi mu myaka egyo egy'obukaire, mu biseera byene Katonda bye yamusuubiza.

³ Aburahamu yaatuuma omwana we oyo Sara ye yamuzaalira, eriina Isaaka.

⁴ Era yaamukeketa ng'agheziiza enaku omunaana, nga Katonda bweyamulagira.

⁵ Isaaka yazaalibwa ng'Aburahamu agheziiza emyaka kikumi egy'obukulu.

⁶ Sara yaakoba ati: “Katonda andeeteire okuseka. Kiisi anaakiwulirangaku aidha kusekeranga ghalala ninze.”

⁷ Era yaakoba ati: “Naani eyandikobye Aburahamu ati Sara alyonsa ku baana? Aye mmuzaaliire omwana mu bukaire bwe.”

Hagari ni Ishimaeli babingibwa

⁸ Omwana yaakula, era ku lunaku lwe yava ku mabeere, Aburahamu yaafumba embaga nnene.

⁹ Lwali lulala Sara yaabona Ishimaeli, omwana Hagari Omumisiri ye yazaalira Aburahamu, ng'ali kuzaanha ni Isaaka mutabane we.

¹⁰ Agho yaakoba Aburahamu ati: “Binga omukazi omwiru ono n'omwana we. Kuba omwana ow'omwiru ono tagwaine kugabana ku bintu mwana wange Isaaka by'aja kusikira.”

¹¹ Kino kyanakughaza inho Aburahamu, kuba Ishimaeli yeena yali mutabane.

¹² Aye Katonda yaakoba Aburahamu ati: “Loba kunakughala olw'omwisuka oyo n'olw'omwiru oyo. Kola ekyo kyonakyona Sara ky'akukoba, kuba mu Isaaka eizaire lyo mwe lineeyongereranga okwala.

¹³ Era n'omwana ow'omukazi omwiru yeena ndimugha abaidhukulu kamaala baafuuka ighanga, kuba yeena mwana wo.”

¹⁴ Bwe bwakya enkyo, Aburahamu yaazuuka mu nkyo, yaamusibirira eby'okulya, yaamuteera n'amaadhi mu nsawo ey'oluwu, yaabigha Hagari. Era yaamuta n'omwana ku mugongo, memale yaamusiibula. Hagari yaaja ng'atambulatambula eyo atyo mu irungu ery'e Beerisheba.

¹⁵ Ensawo ey'oluwu bweyawaamu amaadhi, yaalekulira agho omwana ghansi mu kisaka.

¹⁶ Yaaja yaatyama ghalaku, mu buleeyi bwa mita nga kikumi. Yaakoba mule ati: “Leka ndobe kubona mwana oyo ng'afa.” Bwe yali ng'atyaime eyo, omwana yaalira.

¹⁷ Aye Katonda yaawulira omwana ng'ali kulira, era malaika wa Katonda, ng'ali mu igulu, yaakoba Hagari ati: “Hagari, obaire otya? Otatya, kuba Katonda awuliire omwana ng'ali kulira eyo y'ali.

¹⁸ Situka, oje obbeedegho omwana era omukuume bukalamu, kuba baidhukulu be ndibafuula eighanga ery'amaani.”

¹⁹ Agho Katonda yaazibula amaiso ga Hagari, yaabona ensulo. Kale yaaja yaidhuza ensawo ey'oluwu amaadhi era yaanhwesa n'omwana.

²⁰ Katonda yaaba ku mwisuka oyo, yaaja ng'akula, era ng'aba mu irungu, era yaafuuka muyiizi atawunhikamu.

²¹ Yaabanga mu irungu ery'e Parani, era inhina yaamufunira omukazi Omumisiri.

Aburahamu akola endagaano ni Abimeleki

²² Agho mu biseera ebyo, Abimeleki ng'ali ghalala ni Fikoli omuduumizi w'eigye lye, baidha ye Aburahamu. Abimeleki yaakoba Aburahamu ati: “Katonda aba n'iwe mu byonabyona by'okola.

²³ Kale layira mu maiso ga Katonda oyo nga toidha kunguyaguyanga nze, waire abaana bange oba abaidhukulu bange. Era nga bwembairenga mwesigwa y'oli, weena obenga mwesigwa ye ndi, era n'eri ensi eno y'olimu.”

²⁴ Aburahamu yaakoba ati: “Ndayiire.”

²⁵ Aburahamu yeemuluguunhiza Abimeleki olw'ensulo ye abairu ba Abimeleki ye baali nga banhaze obunhage.

²⁶ Abimeleki yaakoba ati: “Tiidhi muntu yakola kintu ekyo. Iwe tiwankoberaku ku kintu ekyo, era guno n'omukuzi gwange ogusooka okukiwulira.”

²⁷ Aburahamu yaatoola entaama n'ente, yaadhigha Abimeleki; bombi baakola endagaano.

²⁸ Aburahamu yaayawula ku kisibo entaama enduusi musanvu, yaadhita gha dhonka.

²⁹ Abimeleki yaamubuuza ati: “Lwaki oyawire entaama enduusi dhino omusanvu ku dhiinaadho?”

³⁰ Aburahamu yairamu ati: “Twala entaama enduusi dhino omusanvu, ako kabe akamanhiso akooleka kati iwe ondhulira nga ninze eyasima ensulo eyo.”

³¹ Kyova ekifo ekyo kyayetebwa Beerisheba, kuba eyo bombi ye baalayirira.

³² Bwe baamala okukola endagaano e Beerisheba, Abimeleki yaagolola ni Fikoli omuduumizi ow'amagye ge, bairayo mu nsi ey'Abafilisiti.

³³ Aburahamu yaasimba omuti omutamarisiki mu Beerisheba, era yaasinziza eyo Musengwa Katonda, Katonda oyo atawaagho.

³⁴ Aburahamu yaaba mu nsi ey'Abafilisiti okumala entangama endeeyiku.