Amainhama 20 - Baibuli Ekibono kya Katonda 2014

Ebigema ku Aburahamu ni Abimeleki

¹ Aburahamu yaava e Mamure, yaaja ng'ayolekeire ekiketezo kya Buyudaaya ekikalukalu ku luuyi olw'omukono omusaadha olw'e buvandhuba, yaasenga ghagati gha Kadeshi ni Shuri yaamala entangama ng'ali mu Gerari.

² Yaakoberanga abantu nga mukazi we Sara bw'ali mwanhina. Kale Abimeleki kyabazinga wa Gerari, yaayesa Sara baamumutwalira.

³ Aye Katonda yaabonekera Abimeleki mu kirooto obwire, yaamukoba ati: “Bona, oidha kufa olw'okutwala omukazi oyo, kuba muka musaadha.”

⁴ Aye Abimeleki yali ng'akaali kuseeta eri Sara kale yaakoba ati: “Musengwa, onaita n'abantu abaziraku musango?

⁵ Aburahamu mwene ti n'eyankobye ati oyo mwanhina? Era ni Sara mwene yeena tiyankobye ati Aburahamu mwanhina? Ekyo nakikoze mu mwoyo mulungi era nziraku musango.”

⁶ Katonda yaamwiramu mu kirooto ati: “Ndidhi ng'ekyo wakikoze mu mwoyo mulungi, era nga ninze nkulobeire okukola ekibi ye ndi, kale kye naviire ni ndoba okukuganha okumugemaku.

⁷ Mpegaano ni, izaayo muka beene; kuba omusaadha oyo mulanzi, era aidha kukusabira obe mulamu. Aye bw'otaizeeyo mukazi, manha ng'oteekwa kufa, iwe n'abantu bo boonaboona.”

⁸ Abimeleki yaazuuka mu nkyo yaayeta abagheereza be, yaabakobera ebintu ebyo byonabyona, era baatya inho.

⁹ Agho yaayeta Aburahamu yaamubuuza ati: “Kiki kino ky'otukoze? Nakukola kibi ki memale ondeetere nze n'obwakyabazinga bwange ekibi ekyaga agho? Kye wakoze ti n'ekigwaine okukolwa.

¹⁰ Kiki ekyakutuusiisa ku kukola kino?”

¹¹ Aburahamu yairamu ati: “Kuba nabaire ndowooza nti eno ezira atya Katonda, kale nga basobola okundhita olwa mukazi wange.

¹² Aye era oyo mwanhinaze, mwana wa lata, aye ti wa maama era yafuuka mukazi wange.

¹³ Kale Katonda bweyantambuzatambuza eyo atyo okuva mu ndhu ya lata, naakoba Sara nti, ‘Oti bw'oidha okwolekanga nga bw'oli omwesigwa ye ndi: mu buli kifo mwe tunaatuukanga obakobanga oti nze ndi mwanhoko.’ ”

¹⁴ Agho Abimeleki yairiza Aburahamu mukazi we Sara, era yaamugha entaama, n'ente, n'abairu abasaadha n'abakazi.

¹⁵ Era yaakoba Aburahamu ati: “Bona ensi yange yiiyo; londa gh'onaaba oyenze okuba woonawoona.”

¹⁶ Ate yaakoba Sara ati: “Bona, mpaire mwanhoko ebitundu bya feeza lukumi (1,000) ng'ekirabo, okwoleka boonaboona b'oli nabo ng'oziraku musango; abantu boonaboona baidha kumanha bati ozira kibi kye wakola.”

¹⁷ Aburahamu yaasaba Katonda, era Katonda yaawonia Abimeleki, ni mukazi we, n'abairu be abakazi, boonaboona baaba nga baghanga okuzaala.

¹⁸ Kuba Musengwa Katonda yali ng'asibye abakazi boonaboona ab'omu ndhu y'Abimeleki okuzaala, olwa Sara muka Aburahamu.