Amainhama 2 - Baibuli Ekibono kya Katonda 2014

¹ Olwo ni, eigulu n'ensi, ni byonabyona ebirimu, byamalirizibwa okukolebwa.

² Ku lunaku olwomusanvu Katonda yaamaliriza omulimo, gwe yali ng'ali kukola. Yaawuumula ku lunaku olwo olwomusanvu, ng'amaze emirimo gye gyonagyona, gye yali ng'ali kukola.

³ Yaagha olunaku olwo olwomusanvu enkabi era yaalutukuza. Kuba olwo lwe yawuumuliraku emirimo gye gyonagyona egy'okutonda.

⁴ Kale ni eyo n'ensambo eigulu n'ensi ye byatondebwamu. Ku lunaku Musengwa Katonda lwe yakoleraku ensi n'eigulu,

Enimiro ey'Edeni

⁵ ku nsi tikwaliku kimera kyonakyona waire ekirala, era nga ghazira na isubi eryali limezeeku. Kuba Musengwa Katonda yali akaali kugwisa maadhi ku nsi, era nga ghazira muntu alima ku nsi.

⁶ Aye oluudhiruudhi lwavanga mu itaka lwaboza ensi yoonayoona.

⁷ Agho Musengwa Katonda yaawumba omuntu mu itaka, yaamufuuwa mu nhindo omuuka ogw'obulamu olwo omuntu yaatoolera okuba omulamu.

⁸ Musengwa Katonda yaataagho enimiro mu Edeni ku luuyi olw'e buvandhuba yaata omwo omuntu ye yali amaze okuwumba.

⁹ Musengwa Katonda yaameza mu nsi kiisi muti ogusanhusa okubona era omulungi okulyaku ebibala. Ghagati mu nimiro nga ghaligho omuti ogw'obulamu era ogw'okumanha obulungi n'obubi.

¹⁰ Omwiga gwakuuluulanga nga gubita mu Edeni era gwafukiriranga enimiro eyo. Nga bwe gumala gweyawulamu gwafuuka emiiga ena.

¹¹ Eriina ery'omwiga ogusooka nga ni Pishoni guno nga gukuuluula okwezungulula ekiketezo kyonakyona ekya Havila ekirimu zaabu.

¹² Zaabu ow'omu nsi eyo mukenenule, era eyo eriyo n'obuwoowo bwa bedeliyamu n'amabaale ga onikisi.

¹³ Eriina ery'omwiga ogwokubiri nga ni Gihoni; guno nga gukuuluula okwezungulula ekiketezo kyonakyona ekya Kushi.

¹⁴ Eriina ery'omwiga ogwokusatu nga ni Tiguri; guno nga gukuuluulira ku luuyi lw'e buvandhuba bw'e Assiria. N'omwiga ogwokuna ni Eufurate.

¹⁵ Musengwa Katonda yaatoola omuntu, yaamuta mu nimiro ey'e Edeni, agirimenga era agirabirirenga.

¹⁶ Yaamukoba ati: “Oli wa idembe okulya ekibala kyonakyona ekya kiisi muti oguli mu nimiro.

¹⁷ Aye otalyanga ku kibala kya ku muti ogw'okumanha obulungi n'obubi, kuba olunaku lwene lw'olikirya, olifa.”

¹⁸ Musengwa Katonda yaakoba ati: “Ti kirungi omuntu okubanga yenka. Ndidha kumukolerayo omubeezi amugwanira.”

¹⁹ Agho yaawumba mu itaka ensolo dhoonadhoona era n'enhonhi dhoonadhoona yaabireeta eri omuntu abone bw'anaabyetanga. Era omuntu kye yayetanga buli kiramu ekyatondebwa, n'eryafuuka eriina lyakyo.

²⁰ Kale, omuntu yaatuuma ensolo dhoonadhoona n'enhonhi dhoonadhoona amaina, aye ku ebyo byonabyona nga ghazira kyali kigwaine kuba mubeezi wa muntu.

²¹ Agho Musengwa Katonda yaaleetera omuntu endoolo enhingi einho era bweyali ng'atendwike, yaamutoolamu olubavu lulala yaizaagho emamba mu kifo kyalwo.

²² Yalukolamu omukazi, era yaamuleeta eri omuntu.

²³ Omuntu yaakoba ati: “Otyo! Ono buti n'eigumba eriviire mu magumba gange, omubiri oguviire mu mubiri gwange; aidha kwetebwanga mukazi, kuba atooleibwa mu musaadha.”

²⁴ N'olw'ensonga eyo, kyova omusaadha alekanga ise n'inhina, ni yeeyimba ghalala ni mukazi we, ababiri ni baafuuka omuntu omulala.

²⁵ Omusaadha n'omukazi bombi baali madu, aye nga tibagemwa nsoni.