Amainhama 19 - Baibuli Ekibono kya Katonda 2014

Obubi obw'abantu ab'e Sodoma

¹ Bamalaika ababiri bwe baatuuka e Sodoma eigulo eryo, Loti yali ng'atyaime ku mulyango gwa Sodoma. Olwababona ati, yaasituka okuja okubasangaaza. Yaakutama n'ekyeni kyatuuka ku itaka,

² yaakoba ati: “Basengwa bange, mbeeghembye mwidheku ewange nze ndi mugheereza waimwe. Munaabeku ku bigere era musule ghano. Munaawuuna ku nkyo mweyongerayo.” Aye bairamu bati: “Busa, ife twidha kusula ghano mu ngira.”

³ Loti yaayongera okubakoba, okutuusa lwe baaja naye ni baingira mu ndhu ye. Yaabategekera embaga, yaafumba omugaati ogutazimbulukusiibwa, baalya.

⁴ Aye nga bakaali kutenduka, abasaadha ab'omu kibuga ekyo Sodoma baazingiza endhu eyo; abasaadha boonaboona abato n'abakulu nga baweekereireyo.

⁵ Baayeta Loti, baamubuuza bati: “Abasaadha abaidhie okusula ewuwo obwire buno bali gha? Batufulumikize tube nabo.”

⁶ Loti yaafuluma ku luya ye bali, yaigalagho olwigi einhuma we.

⁷ Yaabakoba ati: “Bakagwa, mbeeghembye mutakola kibi kyaga agho!

⁸ Bona, ndi ni baghala bange babiri abakaali kumanha musaadha. Leka mbabaleetere kuliya, memale mubakole byonabyona bye mwenda. Aye abasaadha abo mutabakola kintu kyonakyona, kuba baidhie mu ndhu yange nga bageni bange.”

⁹ Aye baakoba bati: “Vaayo!” Era bati: “Ono omusaadha eyaidha kuno okusenga obusenge, mpegaano n'ayenda okutusaliragho eky'okukola! Kale twidha kukubisa bubi inho okusinga ni bale.” Agho baasindiikiriza Loti ekyeinhumainhuma, era baaseeta okumenha olwigi.

¹⁰ Aye abasaadha bale ababiri baaghaaniriza emikono, baagema Loti, bamusikula baamwingiza mu ndhu mwe baali, baigalagho olwigi.

¹¹ Era baatuluwaza abasaadha, abato n'abakulu abaali ku luya ku lwigi, baaloba kulubona.

¹² Abasaadha baabuuza Loti bati: “Oligho n'abantu bo abandi ghano? Ka tukobe nga bakoirume bo, batabane bo, baghala bo, oba omuntu wo owundi yeenayeena ali mu kibuga? Bafulumye mu kibuga

¹³ kuba tuli kumpi okukizikiriza. Musengwa Katonda awuliire ebintu ebibi kamaala nga byogerwa ku kibuga kino, era atutumye okukizikiriza.”

¹⁴ Agho Loti yaafuluma, yaakoba abasaadha abaali ab'okubayiza baghala be ati: “Musitukiremu, muve mu kifo kino, kuba Musengwa Katonda ali kumpi okuzikiriza ekibuga.” Aye bale baadhuuba bati ali kudhondha budhondhe.

¹⁵ Bwe bwakya enkyo, bamalaika baayanguyiriza Loti nga bamukoba bati: “Situkiramu, otwale mukazi wo ni baghala bo bombi, mufulume muve mu kibuga mulobe kuzikirizibwa mu kibonerezo kyakyo.”

¹⁶ Aye Loti yaalwa. Kale abasaadha kye baava bamugema ku mukono ni mukazi we era ni baghala be bombi, ni babafulumya era ni babata kuliya kw'ekibuga; kuba Musengwa Katonda yamugemerwa ekivunika.

¹⁷ Bwe baamala okubafulumya, owundi ku bamalaika yaakoba Loti ati: “Lumuka olobe kufa! Tolinga inhuma, era otayemereraku mu kiiko naire. Lumukira mu nsozi olobe kuzikirizibwa.”

¹⁸ Loti yairamu ati: “Busa, nkweghembye Musengwa.

¹⁹ Iwe onsaasiire era wandholeka ekisa ekitaloodheka ng'owonia obulamu bwange. Aye ensozi dhiri ghala inho tisobola kudhituukaku ng'akabi kakaali kuntuukaku, ni nfa.

²⁰ Bona, ekibuga kire ere kiri kumpi era kitono. Leka numukire omwo; aye ti kitono, ndidha kuwonera omwo.”

²¹ Yairamu ati: “Kale nkwikiriiza era tiidha kuzikiriza kibuga ekyo ky'oyogeireku.

²² Ja mangu, olumukire eyo! Ezira kye ndidha kukola ng'okaali kutuukayo.” Kyova ekibuga ekyo kyatuumibwa Zoari, kuba Loti yakyeta ati: kitono.

Okuzikirizibwa kwa Sodoma ni Gomorra

²³ Loti ghe yatuukira e Zoari endhuba yali ng'eviireyo.

²⁴ Agho Musengwa Katonda yaagwisa obuganga bwa salufa, ng'oti maadhi, ku Sodoma ni Gomorra, nga buva mu igulu.

²⁵ Era yaabizikiriza ghalala n'ekiiko kyonakyona, n'abantu abaalimu, era n'ebisimbe ebyalimu.

²⁶ Aye muka Loti yaalinga einhuma, yaakaliragho yaafuuka empango ey'omuunhu eyeesimbye.

²⁷ Enkyo lyaku Aburahamu yaayangughaku okuja mu kifo ghe yayemerera ni Musengwa Katonda.

²⁸ Yaalinga e Sodoma n'e Gomorra, era ni mu biketezo eby'ekiiko yaabona omwosi nga gunioka ogugemye okuva mu biketezo ebyo, nga guli ng'oti n'omwosi ogw'oluyiira.

²⁹ Kale ni kyaba nti Katonda bweyali ng'azikiriza ebibuga eby'omu kiiko tiyeerabira Aburahamu, kyeyava n'awonia Loti akabi okumutuukaku, yaamuleka yaavaamu.

Ensimuko ey'Abamoabu n'Abammoni

³⁰ Loti ni baghala be bombi baava mu Zoari baaniina mu nsozi, baasulanga eyo mu mpuku, kuba Loti yatya okuba mu Zoari.

³¹ Omughala omukulu yaakoba muke we ati: “Iseife akairiighe, ate ghazira musaadha mu nsi aidha kutubayiza kutuzaalamu baana.

³² Kale, ka tutamiize iseife omwenge ogw'emizabbibu, tughange okuba naye, memale olwo tuzaale naye abaana.”

³³ Obwire obwo baamutamiiza, era omughala omukulu yaaba naye. Aye Loti yaaloba kukimanha, kuba yali ng'atamiire inho.

³⁴ Olunaku olwairaku, omughala omukulu yaakoba muke we ati: “Nze nabaire naye obwire. Ka tumutamiize kabiri obwire buno, weena obe naye memale olwo tuzaale naye abaana.”

³⁵ Kale obwire obwo baatamiiza iseibwe, era omughala omuto yaaba naye. Era ni ku mukuzi guno Loti yaaloba kukimanha, kuba yali ng'atamiire inho.

³⁶ Mu nsambo eyo baghala ba Loti bombi baatoola enda nga bamaze okuba n'iseibwe.

³⁷ Omukulu yaazaala omwana mulenzi, yaamutuuma eriina Moabu. Oyo ni dhaadha ow'Abamoabu okutuusa ni mpegaano.

³⁸ Omuto yeena yaazaala omwana mulenzi, yaamutuuma eriina Benammi. Oyo ni dhaadha ow'Abammoni okutuusa ni mpegaano.