Amainhama 18 - Baibuli Ekibono kya Katonda 2014

Katonda asuubiza Aburahamu Omwana

¹ Musengwa yabonekera Aburahamu kumpi n'emiti gya Mamure, nga Aburahamu atyaime ku mulyango gwa weema ye, mu biseera eby'omu kasana ghagati.

² Bwe yalinga ati, yaabona abasaadha basatu nga beemereire agho. Era olwababona ati, yaayangughaku okuja okubasangaaza. Agho yaakutama n'ekyeni kyatuuka ku itaka,

³ yaakoba ati: “Musengwa wange, bw'obona nga ngwaniire iwe okuba ghe ndi, otambitaku bubite nze omugheereza wo.

⁴ Ka mbaleetere ku tuudhi munaabeku ku bigere, era muwoleereku agho mu kimpombye eky'omuti.

⁵ Ndidha kuleeta ni ku kamere, mulyeku mufune amaani memale mweyongereyo, kuba mukyaliire omugheereza waimwe.” Bale bairamu bati: “Kola nga bw'okobye.”

⁶ Aburahamu yaayangugha, yaingira mu weema eri Sara, yaamukoba ati: “Tegeka ebigero bisatu eby'engaano enungi, ogikande era ogifumbemu emigaati.”

⁷ Kabiri Aburahamu yaalumuka, yaaja mu lugo yaatoolayo ente ento ey'emamba egonda era ensavu, yaagigha omugheereza we, era omugheereza oyo yaayanguyaaku okugifumba.

⁸ Agho yaaleeta amata ga bbongo, n'amata agatali ga bbongo, era n'emamba eyali efumbiibwa, yaabibateera agho mu maiso byonabyona ghansi mu muti mwene yaasigala ng'ayemereire, nga bale bali kulya.

⁹ Baamubuuza bati: “Mukazi wo Sara ali gha?” Yaabairamu ati: “Ali munda mu weema.”

¹⁰ Musengwa yaakoba ati: “Omwaka ogwidha tiriroba kukukyalira kabiri, era mu biseera bino mukazi wo Sara aliba ng'azaire omwana mulenzi.” Sara yali inhuma wa Aburahamu, ku lwigi lwa weema, ng'ali kuwulira.

¹¹ Aburahamu ni Sara baali nga bakuze inho, nga babitiriire obukaire Sara yali yakoma n'okulwala.

¹² Sara yaaseka mule ng'akoba ati: “Buti nga mmaze okukairigha nti, era nga ni baze yeena mukaire atyo, mbo bwenebwene nnairayo okunhumirwa.”

¹³ Agho Musengwa Katonda yaabuuza Aburahamu ati: “Lwaki Sara asese era ni yeebuuza oba nga bwenebwene asobola okuzaala omwana nga mukaire atyo?

¹⁴ Ghaligho ekintu ekikalangufu einho Musengwa Katonda ky'atasobola? Nga bwe nkukobye, omwaka ogwidha mu biseera bino, ndikukyalira kabiri era mukazi wo Sara aliba ng'azaire omwana mulenzi.”

¹⁵ Olw'okuba Sara yatya, agho yeegaana ng'akoba ati: “Nze tiseseeku.” Aye Musengwa yaamukoba ati: “Busa! Bwenebwene osese.”

Aburahamu awolerezaayo Sodoma

¹⁶ Agho abasaadha baavaagho baaja mu kifo gh'olengerera Sodoma. Aburahamu yaabagherekeraku okubasiibula.

¹⁷ Musengwa Katonda yaakoba mule ati: “Tiidha kugisa Aburahamu ekyo kye ndi kuja okukola

¹⁸ kuba oyo n'aja okusimukamu eighanga eikologho ery'amaani, era mu oyo amaghanga goonagoona ag'omu nsi mwe galigheerwa enkabi.

¹⁹ Namulonda asobole okulagira abaana be n'abaidhukulu be abaliiragho, bangonderenga nga bakola ebyo ebyoleka obutuufu era eby'amazima. Memale olwo mmukolere ebyo byonabyona bye nasuubiza.”

²⁰ Agho Musengwa Katonda yaakoba ati: “Mpulira ebintu ebibi kamaala nga byogerwa ku Sodoma ni Gomorra, era okwonoona kwaibwe kubitiriire!

²¹ Ndidha kwikayo eyo mbone oba nga ebibi ebiboogerwaku bwene babikola oba busa, memale olwo mmanhe ekituufu.”

²² Agho abasaadha baava eyo, baaja e Sodoma. Aye Aburahamu yaasigala ng'akaayemereire aghali Musengwa Katonda.

²³ Aburahamu yaaseeta ye Musengwa Katonda, yaamubuuza ati: “Bwenebwene oidha kuzikiriza abantu abatuufu ghalala n'aboonooni?

²⁴ Aye bwe kiba nga mu kibuga omwo mulimu abantu abatuufu amakumi ataanu, era onaakizikiriza? Tookireke olw'okuwonia abantu abo abatuufu amakumi ataanu abalimu?

²⁵ Ekyo tikikoleka! Okwitira abantu abatuufu ghalala n'aboonooni olwo abatuufu ni baba nga baagayaga n'aboonooni! Ekyo tikikoleka! Omulamuzi ow'ensi yoonayoona ali n'okusala omusango mu butuufu.”

²⁶ Musengwa Katonda yairamu ati: “Bwe nnaayagaana abantu abatuufu amakumi ataanu mu kibuga Sodoma, tiidha kukizikiriza olw'abo.”

²⁷ Aburahamu yaayogera kabiri ati: “Wo Musengwa, nsonigha okukana ni ndhogera n'iwe ntyo, ate nga nze ndi nkungu bukungu era eivu obuvu.

²⁸ Aye bwe kiba nga ku bantu abatuufu amakumi ataanu kubulaku abataanu? Bwenebwene onaazikiriza ekibuga ekyo olw'abantu abataanu abo ababuzeeku?” Musengwa Katonda yairamu ati: “Tiidha kukizikiriza bwe nnaayagaanayo abatuufu amakumi ana n'abataanu.”

²⁹ Kabiri Aburahamu yaakoba ati: “Aye bwe kiba ng'eriyo makumi ana.” Musengwa Katonda yairamu ati: “Tiidha kukizikiriza olw'abatuufu amakumi ana abo.”

³⁰ Aburahamu yaakoba ati: “Wo Musengwa Katonda otansungughalira, ndidha kwogera kabiri: Aye bwe kiba nga eriyo makumi asatu?” Musengwa Katonda yairamu ati: “Tiidha kukizikiriza bwe nnaayagaanayo amakumi asatu.”

³¹ Aburahamu yaakoba ati: “Wo Musengwa, nsonigha okukana ni ndhogera n'iwe ntyo. Aye bwe kiba ng'eriyo amakumi abiri?” Musengwa yairamu ati: “Tiidha kukizikiriza olw'abatuufu amakumi abiri.”

³² Aburahamu yaakoba ati: “Wo Musengwa, otansungughalira, ndidha kwogera mukuzi guno gwonka. Aye bwe kiba ng'eriyo ikumi bonka?” Musengwa yairamu ati: “Tiidha kukizikiriza olw'abatuufu eikumi abo.”

³³ Musengwa Katonda bweyamala okwogera ni Aburahamu, yaaja. Ni Aburahamu yeena yaira ewuwe.