Amainhama 17 - Baibuli Ekibono kya Katonda 2014

Okukeketebwa ng'akamanhiso ak'Endagaano

¹ Aburamu bweyali ng'agheza emyaka kyenda na mwenda (99) egy'obukulu, Musengwa Katonda yamubonekera, yamukoba ati: “Ninze Katonda Aghanga Ebintu Byonabyona. Mpuliranga era okolenga ebituufu buliidho.

² Ndidha kukola endagaano yange n'iwe, era nkughe abaidhukulu kamaala.”

³ Aburamu yaakutama n'ekyeni kyatuuka ku itaka. Katonda yaamukoba ati:

⁴ “Bona, eno n'endagaano yange n'iwe: oidha kufuuka dhaadha ow'amaghanga kamaala.

⁵ Tokairayo kwetebwa Aburamu, aye oidha kwetebwanga Aburahamu, kuba nkufiire dhaadha ow'amaghanga kamaala.

⁶ Ndidha kukugha abaidhukulu kamaala inho, baveemu amaghanga mangi era ni bakyabazinga baliva mu iwe.

⁷ Era ndidha kutaagho endagaano yange n'iwe, era ni baidhukulu bo ab'omu nse dhoonadhoona edhiriiragho, ebenga ndagaano etawaagho. Ndidha kubanga Katonda wo, era Katonda wa baidhukulu bo.

⁸ Ndidha kukugha iwe ni baidhukulu bo ensi eno buti y'olimu ng'omusenze. Ensi yoonayoona Kanaani eidha kubanga ya baidhukulu bo ebyanda n'ebyanda era nze ndidha kubanga Katonda waibwe.”

⁹ Katonda yaakoba Aburahamu ati: “Agho ni, iwe oteekwa okukuuma endagaano yange, iwe mwene era ni baidhukulu bo ab'omu nse edhiriiragho.

¹⁰ Eno n'endagaano iwe y'oteekwa okukuuma ni baidhukulu bo abalikwiririra: buli musaadha mu imwe anaakeketebwanga.

¹¹ Anaakeketebwanga oluwutu olw'omubiri gwe ako n'akanaabanga akamanhiso ak'endagaano yange n'imwe.

¹² Kiisi mwana mulenzi azaalibwa mu imwe mu nse dhoonadhoona, bw'anaaghezanga enaku omunaana munaamukeketanga, ni bw'anaabanga omwiru eyazaalirwa mu ndhu dhaimwe oba omwiru ye mwagula obugule ku bantu ab'endha.

¹³ Oyo anaazaalirwanga mu ndhu dhaimwe era n'oyo ye munaagulanga obugule, boonaboona bateekwa okukeketebwa. Ako kabe akamanhiso ak'oku mubiri akooleka ng'endagaano yange n'imwe bw'etaliwaagho.

¹⁴ Omusaadha yeenayeena atali mukekete, ataakeketebwa luwutu lwa mubiri gwe, aidha kwawulwanga ku bantu be, kuba anaabanga amenhie endagaano yange.”

¹⁵ Era Katonda yaakoba Aburahamu ati: “Ate mukazi wo Sarai, tokaamweta Sarai, aye oidha kumwetanga Sara.

¹⁶ Ndidha kumugha enkabi akuzaalire omwana omulenzi. Ndidha kumugha enkabi abe inhina ow'amaghanga era bakyabazinga baidha kusimukanga mu oyo.”

¹⁷ Aburahamu yaakutama, n'ekyeni kyatuuka ku itaka. Era yaaseka yeebuuza mule ati: “Bwenebwene omusaadha ow'emyaka ekikumi aghanga okuzaala omwana? Era ni Sara ow'emyaka ekyenda anaaghanga okuzaala?”

¹⁸ Agho yaakoba Katonda ati: “Wo, ngoli oghaire Ishimaeli enkabi.”

¹⁹ Aye Katonda yairamu ati: “Busa. Mukazi wo Sara aidha kukuzaalira omwana mulenzi, iwe omutuume eriina Isaaka. Ndidha kukola naye endagaano yange etakoma, era ni baidhukulu be abalimwiririra.

²⁰ Era Ishimaeli yeena ndidha kumugha by'osabye: ndidha kumugha enkabi azaale abaana kamaala, era afune n'abaidhukulu kamaala. Aidha kuzaala abalangira ikumi na babiri, era ndidha kumufuulamu eighanga ery'amaani.

²¹ Aye endagaano yange ndidha kugitaagho ni Isaaka, oyo Sara y'aidha okukuzaalira mu biseera bino, mu mwaka ogwidha.”

²² Olwamala okwogera ni Aburahamu, Katonda yaavaagho, yaaja ghaigulu.

²³ Ku lunaku lwene olwo Aburahamu yaatuukiriza ekiragiro kya Katonda, yaatwala omwana we Ishimaeli yaamukeketa oluwutu olw'oku mubiri gwe. Era yaakola atyo ni ku basaadha boonaboona ab'omu ndhu ye omwo nga n'omuli n'abairu abaazaalirwa mu ndhu ye, era n'abairu abo be yagula obugule.

²⁴ Aburahamu ghe baamukeketera yali ng'agheza emyaka kyenda na mwenda egy'obukulu

²⁵ ate omwana we Ishimaeli yali ng'agheza emyaka ikumi n'esatu.

²⁶ Bombi baakeketebwa ku lunaku lwene olwo,

²⁷ ghalala n'abasaadha boonaboona ab'omu ndhu ya Aburahamu omwo nga n'omuli n'abairu abaazaalirwa mu ndhu ye, era n'abairu abo be yagula obugule ku bantu ab'endha.