Amainhama 16 - Baibuli Ekibono kya Katonda 2014

Hagari ni Ishimaeli

¹ Sarai muka Aburamu, yali tazaire mwana naire. Aye yali n'omwiru omukazi Omumisiri, ng'ayetebwa Hagari.

² Kale yaakoba Aburamu ati: “Bona, Musengwa Katonda anhimye okuzaala. Ja obe n'omwiru wange omukazi, oba katyo ananzaaliragho abaana.” Aburamu yaaganha Sarai kye yamukoba.

³ Kale Sarai yaatoola Hagari, omwiru we Omumisiri, yaamugha Aburamu abe mukazi we. Kino kyaligho nga Aburamu yaakamala emyaka ikumi mu Kanaani.

⁴ Agho Aburamu yaaba ni Hagari, yaatoola enda. Era Hagari bweyakizuula ng'atoire enda, yaatoolera okwekuluntaza n'okunhooma Sarai.

⁵ Sarai yaakoba Aburamu ati: “Ebibi ebiri kunkolwaku bikwirirengaku! Nze nakugha omwiru wange obe naye, aye olwakizuula ng'atoire enda, yaatoolera okwekuluntaza n'okuunhooma. Musengwa Katonda atusalire omusango nze n'iwe!”

⁶ Aye Aburamu yaakoba Sarai ati: “Bona, omwiru wo omukazi ali mu buyinza bwo, mukole nga bw'oyenda.” Agho Sarai yaabisa bubi inho Hagari, era Hagari yaamulumukaku.

⁷ Malaika wa Musengwa Katonda yaayagaana Hagari mu irungu, ng'ali ku nsulo eri ku ngira eja e Shuri.

⁸ Malaika yaamubuuza ati: “Hagari, omwiru wa Sarai, ova gha era oja gha?” Yairamu ati: “Ndi kulumuka ku musengwa wange Sarai.”

⁹ Malaika wa Musengwa yaamukoba ati: “Irayo ye musengwa wo era omugonderenga.”

¹⁰ Era yaamukoba ati: “Ndidha kukugha abaidhukulu kamaala inho nga tibabalika.”

¹¹ Kabiri yaamukoba ati: “Buti oli nda, oidha kuzaala omwana mulenzi, omutuume eriina Ishimaeli, kuba Musengwa Katonda awuliire okudaazibwadaazibwa kwo.

¹² Omwana oyo aidha kuba ng'oti n'endogoyi ey'omu nsiko ng'alwanisa buli muntu, era nga buli muntu amulwanisa. Era aidha kweyawula ku b'oluganda lwe, abenga yenka.”

¹³ Hagari yaayeta Musengwa Katonda eyali ayogeire naye ati ni “Katonda abona.” Yeebuuza mule ati: “Obwo bwenebwene mboine Katonda era naasigala nga nkaali mulamu?”

¹⁴ Eyo n'ensonga lwaki ensulo eyo eyetebwa Beeri Lahairoi ensulo eyo eri ghagati gha Kadeshi ni Beredi.

¹⁵ Hagari yaazaalira Aburamu omwana omulenzi Aburamu yaamutuuma eriina Ishimaeli.

¹⁶ Hagari ghe yazaalira Ishimaeli, Aburamu yali ng'agheza emyaka kinaana na mukaaga egy'obukulu.