Amainhama 15 - Baibuli Ekibono kya Katonda 2014

Katonda akola endagaano ni Aburamu

¹ Ebyo nga bimaze okubaagho, Aburamu yaawulira Musengwa Katonda mu kirooto, ng'amukoba ati: “Aburamu, otatya. Nze ndidha kubanga ngabo yo nkuwonie ebizibu, era ndidha kukugha empeera nnene.”

² Aye Aburamu yairamu ati: “Wo Musengwa Katonda, kiki ky'onampa ni kingasa nga nkaasigaire nga nziraku mwana era ng'omusika w'endhu yange ni Eliezeri ow'e Damasiko?

³ Bona, tompaire izaire era omwiru eyazaalirwa mu ndhu yange, n'aja okuba omusika wange.”

⁴ Agho yaawulira nga Musengwa Katonda akoba ati: “Omwiru oyo Eliezeri ti n'aidha okuba omusika wo, aye omwana wo mwenemwene n'alikusikira.”

⁵ Yaamufulumya kuliya, yaakoba ati: “Lingirira ku igulu, obale emuunienie edhiriku, oba nga osobola okudhibala.” Agho yaamukoba ati: “N'abaidhukulu bo batyo bwe baliba obungi.”

⁶ Aburamu yaikiriza Musengwa Katonda kye yamukoba, era kino kyaleetera Musengwa Katonda okumutwala nga muntu mutuufu.

⁷ Yaamukoba ati: “Ninze Musengwa eyakutoola mu Uri ensi ey'Abakaladea, naakuleeta okukugha ensi eno.”

⁸ Aye Aburamu yaamubuuza ati: “Wo Musengwa Katonda, nnaamanhira ku ki ng'ensi eno eidha kuba yange?”

⁹ Musengwa Katonda yaamwiramu ati: “Ndeetera ente ey'emyaka esatu, n'embuzi ey'emyaka esatu, n'entaama enume yoona nga ya myaka esatu, era n'enjiibwa, n'eighemba eito.”

¹⁰ Aburamu yaaleeta ensolo edho ye Katonda, yaadhibaagamu ghabiri, yaata ebitundu ebyo ku ndhuyi ibiri ng'abirinzagainia. Aye enhonhi tiyadhibaagamu ghabiri.

¹¹ Ensega dhaidha okugwa ku mamba eyo, aye Aburamu yaadhibinga.

¹² Endhuba bweyali ng'eri kugwa, enzikiiza eri bedimudimu yaagema, endoolo enhingi einho era n'entiisa byamugema.

¹³ Musengwa Katonda yaamukoba ati: “Baidhukulu bo balija mu nsi etali yaibwe, baaba eyo nga bairu, era baanhigirizibwa inho okumala emyaka bikumi bina.

¹⁴ Aye ndibonereza eighanga eryo eriribafuula abairu, era baliva mu ighanga eryo nga bafunie n'ebintu kamaala.

¹⁵ Aye iwe olija eri badhaadha bo ng'oli miraala oliziikibwa ng'oghangaaliire irala bukalamu.

¹⁶ Mu nsi eyo balibaayo ghaabitagho ense ina memale baira ghano, kuba tija kubingagho Bamori okutuusa nga beeyongeire okuba ababi einho okugwanira okubonerezebwa.”

¹⁷ Endhuba bweyamala okugwa enzikiiza ng'egemye, mangu ago agho ghaabonekagho olugyo oluliku amanda nga gali kunioka omwosi, era ghaabonekagho n'engada edhiri kwaka; bino byombi byabita ghagati gh'ebitundu bire eby'ensolo.

¹⁸ Ku lunaku olwo, Musengwa Katonda yaakola endagaano ni Aburamu. Yaakoba ati: “Baidhukulu bo mbaghaire ensi eno yoonayoona okuva ku nsalosalo ya Misiri okutuuka ku mwiga omukologho Eufurate.

¹⁹ Omwo nga mw'otwaliire n'ensi dhino: ey'Abakeni, ey'Abakenizzi, ey'Abakademoni,

²⁰ ey'Abahitti, ey'Abaperizzi, ey'Abarefa,

²¹ ey'Abamori, ey'Abakanaani, ey'Abagirigashi, n'ey'Abayebusi.”