Amainhama 14 - Baibuli Ekibono kya Katonda 2014

Aburamu atoola Loti mu bazigu

¹ Bakyabazinga bano: Amurafeli ow'e Shinari, Arioki ow'Ellasari, Kedorilaomeri ow'Elamu, ni Tidali ow'e Goiimu

² baatanula olutalo ku bakyabazinga abandi bano: Bera ow'e Sodoma, Birisha ow'e Gomorra, Shinabi ow'e Adama, Shemeberi ow'e Zeboiimu, ni kyabazinga ow'e Bela ekyo nga ni Zoari.

³ Bakyabazinga bano abataanu abasembyeyo, baayimba ghalala amagye gaibwe mu Kiiko eky'e Siddimu eyo nga n'Enhandha Eyomuunhu.

⁴ Kedorilaomeri yali abafugiire emyaka ikumi n'ebiri, aye mu mwaka ogweikumi n'esatu baamudheemera.

⁵ Mu mwaka ogweikumi n'ena Kedorilaomeri ni bakyabazinga abaali ku luuyi lwe, baidha n'amagye gaibwe baaghangulira Abarefa mu Ashiterothi Karanaimu, n'Abazuzi mu Hamu, n'Ababemi mu Shave Kiriathaimu,

⁶ n'Abahori mu kiketezo kyaibwe Seiri eky'ensozi baababingirira okubatuusa mu Eluparani ku mbali kw'eirungu.

⁷ Agho baakyuka bairayo, baatuuka Enimishipate, ekyo nga ni Kadeshi, baaghangula ensi yoonayoona ey'Abamaleki, era n'ey'Abamori abaabanga mu Hazazoni Tamari.

⁸ Bakyabazinga bano: ow'e Sodoma, n'ow'e Gomorra, n'ow'e Adama, n'ow'e Zeboiimu, era n'ow'e Bela ekyo nga ni Zoari, baaja n'amagye gaibwe okulwana olutalo mu Kiiko eky'e Siddimu.

⁹ Baalwanisa Kedorilaomeri kyabazinga ow'Elamu, ni Tidali kyabazinga ow'e Goiimu, ni Amurafeli kyabazinga ow'e Shinari, era ni Arioki kyabazinga wa Ellasari batyo bakyabazinga abana baalwanisa abataanu.

¹⁰ Mu Kiiko eky'e Siddimu mwali mwidhwire ebiina by'eitosi. Kale kyabazinga ow'e Sodoma n'ow'e Gomorra bwe baalumuka olutalo, baagwa mu biina ebyo, aye bakyabazinga bale abandi abasatu baawona, baalumukira mu nsozi.

¹¹ Abazigu baibwe baanhaga ebintu byonabyona eby'omu Sodoma ni mu Gomorra, n'emere yaibwe yoonayoona.

¹² Era ni Loti omwana wa muganda wa Aburamu, eyali ng'aba mu Sodoma yeena baamutwala nga munhage, baatwala n'ebintu bye, olwamala beejiira.

¹³ Aye omuntu eyawonagho yaidha yaakobera byonabyona Aburamu, Omuheburayi eyali ng'aba kumpi n'emiti gya Mamure Omuamori. Mamure ono ni baganda be, Esikoli ni Aneri, baali ba mukago n'Aburamu.

¹⁴ Aburamu bweyawulira nga batwaire owoluganda lwe nga munhage, yaaja n'abasaadha be abalwani, abaazaalirwa mu ndhu ye, ebikumi bisatu na ikumi na munaana, baabingirira bakyabazinga bale abana okutuuka e Dani.

¹⁵ Yaayawula amagye ge mu bikunsu, baalumba abazigu obwire era baabaghangula. Era baababingirira okubatuusa e Hoba, ekiri ku luuyi olw'omukono omugooda ng'olingiriire e buvandhuba, bw'oba ng'oli e Damasiko.

¹⁶ Kale, yaiza ebintu byonabyona ebyali binhagiibwa. Era yaiza n'owoluganda lwe Loti, ghalala n'ebintu bye, era n'abakazi, n'abantu abandi abanhage.

Melekizedeki asabira Aburamu enkabi

¹⁷ Aburamu bweyaira ng'amaze okughangula Kedorilaomeri ni bakyabazinga be yali yeeyimbye nabo, kyabazinga wa Sodoma yaaja mu Kiiko eky'e Shave era ekyetebwa Ekiiko ekya Kyabazinga okumweisuusaayo.

¹⁸ Era ni Melekizedeki, eyali kyabazinga ow'e Salemu era kabona wa Katonda Ali Ghaigulu Yeene, yaaleetera Aburamu eby'okulya n'omwenge ogw'emizabbibu.

¹⁹ Yaamusabira enkabi ati: “Katonda oyo Ali Ghaigulu Yeene aghenga Aburamu enkabi, oyo Katonda eyakola eigulu n'ensi!

²⁰ Katonda oyo Ali Ghaigulu Yeene asaakibwenga, oyo akuleeteire okughangula abazigu bo!” Agho Aburamu yaagha Melekizedeki ekintu kirala ku buli ikumi, ku bintu byonabyona ebyali binhagiibwa.

²¹ Kyabazinga ow'e Sodoma yaakoba Aburamu ati: “Abantu bampe, aye ebintu obitwale.”

²² Aye Aburamu yairamu kyabazinga oyo ati: “Ndayira mu maiso ga Musengwa Katonda, oyo Katonda Ali Ghaigulu Yeene, eyakola eigulu n'ensi,

²³ nti tija kusigaza kawuuzi, oba akakosi ak'engaito, oba waire ekintu kyonakyona ekikyo olwo olobe kukoba oti, ‘Ninze eyakombaghaza Aburamu.’

²⁴ Tija kutwala kintu naire, okutoolaku ebyo abaisuka bange bye baaliire, era n'omugabo ogw'abasaadha abaaja ninze. Aye leka bakagwa bange, Aneri, ni Eshikoli, era ni Mamure, batwale omugabo gwaibwe.”