Amainhama 13 - Baibuli Ekibono kya Katonda 2014

Aburamu ni Loti baawukana

¹ Kale Aburamu yaava mu Misiri yaira mu kiketezo ky'e Kanaani ekikalukalu ekiri ku luuyi olw'omukono omusaadha olw'e buvandhuba, ni mukazi we, n'ebintu byonabyona bye yali nabyo, era ni Loti ng'ali naye.

² Aburamu yali mukombe inho, ng'ali n'ebyayo, ni feeza, ni zaabu.

³ Agho yeeyongera okutambula okuva mu kiketezo ky'e Kanaani ekyo ekikalukalu ekiri ku luuyi olw'omukono omusaadha olw'e buvandhuba, yatuuka e Betheli mu kifo ye yali asoose okuzimba weema ye, ghagati gha Betheli ni Ayi.

⁴ Ekyo n'ekifo Aburamu kye yali amaze okuzimbamu alutaari mu kusooka. Agho yaasinza Musengwa Katonda.

⁵ Loti yeena yali n'ekighaso eky'entaama n'embuzi, n'olugo olw'ente, era n'abantu ab'omu ndhu ye,

⁶ aye ng'eitaka tiribamala bombi kuba ghalala, olw'okuba ebintu byaibwe byali kamaala inho.

⁷ Kale ghaabangagho okusoola ghagati gh'abaayi ab'ente dha Aburamu n'abo abaayayanga edha Loti. Mu biseera ebyo Abakanaani n'Abaperizzi nga n'abali mu nsi eyo.

⁸ Agho Aburamu yaakoba Loti ati: “Nze n'iwe tuli baaluganda. Ka tulobe kusoola, oba waire abaayi abange okusoola n'ababo.

⁹ Ensi yoonayoona oli kugibona eri bwa agho. Kale leka twawukane. Iwe bw'olondagho okuja ku luuyi olw'omukono omugooda, nze ndidha kuja ku lw'omusaadha ate bw'olondagho okuja ku luuyi olw'omukono omusaadha, nze ndidha kuja ku lw'omugooda.”

¹⁰ Loti yeezunguluza amaiso, yaabona ng'ekiiko eky'e Yorudani kyonakyona okutuukira irala e Zoari, kirimu amaadhi mangi nga kiri ng'oti n'Enimiro ya Musengwa Katonda, oba ng'oti n'ensi ey'e Misiri. Bino byaligho nga Musengwa Katonda akaali kuzikiriza Sodoma ni Gomorra.

¹¹ Kale Loti yaalondagho okutwala ekiiko eky'e Yorudani kyonakyona, era yaaja e buvandhuba baayawukana batyo.

¹² Aburamu yaasigala mu Kanaani, aye Loti yaasenga mu bibuga eby'omu kiiko, era yaazimba weema ye kumpi ni Sodoma.

¹³ Abantu ba Sodoma baali babi, era nga boonooni inho ye Musengwa Katonda.

¹⁴ Loti bweyamala okuja, Musengwa Katonda yakoba Aburamu ati: “Yemerera agho gh'oli, weezunguluze amaiso bukalamu ku ndhuyi dhoonadhoona.

¹⁵ Ensi eyo yoonayoona y'oli kubona ndidha kugikugha iwe ni baidhukulu bo, ebe yaimwe ebyanda n'ebyanda.

¹⁶ Ndidha kufuula baidhukulu bo okuba abangi ng'oti nkungu mu nsi kibe nti ole bw'alisobola okubala enkungu mu nsi, olwo ni baidhukulu bo boona baliba basobola okubalwa.

¹⁷ Mpegaano ja ng'otambula, obone obuleeyi n'obunene obw'ensi, kuba ndidha kugikugha.”

¹⁸ Kale Aburamu yaazimbulagho weema ye, yaaja yaasenga kumpi n'emiti gya Mamure mu Heburoni era eyo yaazimbirayo Musengwa Katonda alutaari.