Amainhama 12 - Baibuli Ekibono kya Katonda 2014

Katonda ayeta Aburamu

¹ Agho Musengwa Katonda yaakoba Aburamu ati: “Va mu nsi yo, oleke ab'ekika kyo n'ab'endhu ya lata wo, oje mu nsi ye naakulaga.

² Ndidha kukugha abaidhukulu kamaala, bafuuke eighanga ery'amaani. Ndidha kukugha enkabi, era ndeetere eriina lyo okumanhikana olwo lighange okugheesanga abandi enkabi.

³ “Abo abakusabira enkabi, nnaabaghanga enkabi, aye abo abakukolimira zeena ndidhanga kubakolimira. Era mu iwe amaghanga goonagoona mwe galigheerwa enkabi.”

⁴ Kale Aburamu yaaja nga Musengwa Katonda bweyamukoba ni Loti yaaja naye. Aburamu ghe yaviira e Harani yali agheza emyaka nsanvu n'etaanu (75) egy'obukulu.

⁵ Yatwala mukazi we Sarai, ni Loti omwana wa muganda we, n'ebintu byaibwe byonabyona bye baali nga bagheziiza, era n'abantu be baali bafuniire e Harani. Kale baatoolera olugendo oluja mu nsi ey'e Kanaani. Bwe baatuuka mu Kanaani,

⁶ Aburamu yaaja ng'atambula mu nsi eyo, yaatuuka ku muti gwa More mu kifo ekitukuvu e Shekemu. Mu biseera ebyo Abakanaani nga n'abali mu nsi eyo.

⁷ Agho Musengwa Katonda yaabonekera Aburamu, yaamukoba ati: “Baidhukulu bo ndibagha ensi eno.” Kale Aburamu yaazimbira agho Musengwa Katonda eyamubonekera, alutaari.

⁸ Olwava agho, yaaja mu kiketezo eky'ensozi e buvandhuba w'e Betheli yaazimba eyo weema ye nga Betheli kimuli e bugwandhuba, ate Ayi kyamuba e buvandhuba. Yaazimbira agho Musengwa Katonda alutaari, era yaamusinza.

⁹ Agho Aburamu yeeyongera okutambula ng'ayolekeire ekiketezo eky'e Kanaani ekikalukalu ekiri ku luuyi olw'omukono omusaadha olw'e buvandhuba.

Aburamu ng'ali mu Misiri

¹⁰ Agho endhala yaagwa mu Kanaani, Aburamu yaaja mu Misiri yaasenga eyo okumala entangama, kuba endhala yali egwire ya maani.

¹¹ Bwe yali ng'ali kumpi okwingira mu Misiri, yaakoba mukazi we Sarai ati: “Bona, ndidhi ng'oli mukazi aboneka obulungi einho.

¹² Era Abamisiri bwe banaakubona baidha kukoba bati ono ni mukazi we olwo nze bandhite, aye iwe bakuleke obeegho.

¹³ Kale iwe oidha kubakoba oti oli mwanhinaze, memale olwo mbisibwe bukalamu era mpone okwitibwa ku lulwo.”

¹⁴ Aburamu bweyaingira mu Misiri, Abamisiri baabona nga bwenebwene omukazi yali mulungi inho.

¹⁵ Era abakungu aba kyabazinga bwe baamubona, baaghayiraku kyabazinga ku bulungi bwe. Olwo Sarai yaatwalibwa mu kisaagaati kya kyabazinga.

¹⁶ Era ku lulwe, kyabazinga yaabisa Aburamu bukalamu yaamugha entaama, n'ente, n'endogoyi enume n'enkazi, n'abairu abasaadha n'abakazi, era n'engamiya.

¹⁷ Aye olw'okuba kyabazinga yatwala Sarai, Musengwa Katonda yaamusindikira endwaire embi einho ghalala n'abantu ab'omu kisaagaati kye.

¹⁸ Agho kyabazinga yaayeta Aburamu, yaamubuuza ati: “Kiki kino ky'onkoze? Lwaki tiwankobeire oti ono mukazi wo?

¹⁹ Lwaki wankobye oti ono mwanhoko, n'ondeka okumutwala nga mukazi wange? Kale ni, mukazi wo wuuyo, mutwale era ogolole.”

²⁰ Agho kyabazinga yaalagira abasaadha be baafulumya Aburamu mu nsi eyo, ghalala ni mukazi we era n'ebintu byonabyona bye yali nabyo.