Amainhama 11 - Baibuli Ekibono kya Katonda 2014

Omunaala ogw'e Babeli

¹ Mu mainhama ensi yoonayoona yali n'olulimi lulala, n'endhogera ndala.

² Aye abantu bwe baaja nga batambulatambula eyo batyo mu buvandhuba, baayagaana aghataamuufu baasenga agho.

³ Baakoba bati: “Ka tuwumbe amatoofaali, tugookye bukalamu, gabbalanguke.” Kale baaba n'amatoofaali mu kifo ky'amabaale, era n'eitosi mu kifo kya seminti.

⁴ Agho baakoba bati: “Ka twezimbire ekibuga, twezimbire n'omunaala ogutuuka ku igulu tumanhikane, memale tulobe kusansaanizibwa mu nsi.”

⁵ Agho Musengwa Katonda yaika ghansi okubona ekibuga n'omunaala abantu abo bye baali bazimbye,

⁶ era yaakoba ati: “Abantu bano boonaboona bali muntu mulala, era boogera olulimi lulala! Kino kitoolereiza butoolereze ku ebyo bye baidha okukola ye bwidha baidha kukolanga kyonakyona kye benda!

⁷ Ka twike ghansi tutabuletabule olulimi lwaibwe, buli mulala alobe kutegeera wundi ky'akoba.”

⁸ Kale Musengwa Katonda yaabasansaaniza eyo mu nsi yoonayoona, era baalekera okuzimba ekibuga.

⁹ Ekibuga kyatuumibwa eriina Babeli, kuba eyo Musengwa Katonda ye yatabuliratabulira olulimi olw'ensi yoonayoona. Era eyo ye yatoolera abantu, n'abasansaaniza mu nsi yoonayoona.

Baidhukulu ba Shemu

¹⁰ Bano ni baidhukulu ba Shemu: Nga ghabiseegho emyaka ebiri bukyanga omwidhuzo gubaagho, Shemu yali agheza emyaka kikumi (100) egy'obukulu. Agho yaazaala Aripakishadi.

¹¹ Shemu ng'amaze okuzaala Aripakishadi, yaaghangaala emyaka egindi bikumi bitaanu (500), era yaazaala n'abaana abandi.

¹² Aripakishadi bweyagheza emyaka amakumi asatu n'etaanu (35) egy'obukulu, yaazaala Shela.

¹³ Aripakishadi oyo ng'amaze okuzaala Shela yaaghangaala emyaka egindi bikumi bina n'esatu, era yaazaala n'abaana abandi.

¹⁴ Shela bweyagheza emyaka amakumi asatu (30) egy'obukulu, yaazaala Eberi.

¹⁵ Shela oyo ng'amaze okuzaala Eberi, yaaghangaala emyaka egindi bikumi bina n'esatu, era yaazaala n'abaana abandi.

¹⁶ Eberi bweyagheza emyaka amakumi asatu n'ena (34) egy'obukulu, yazaala Pelegi.

¹⁷ Eberi oyo ng'amaze okuzaala Pelegi, yaaghangaala emyaka egindi bikumi bina n'asatu (430), era yaazaala n'abaana abandi.

¹⁸ Pelegi bweyagheza emyaka amakumi asatu (30) egy'obukulu, yaazaala Reu.

¹⁹ Pelegi oyo ng'amaze okuzaala Reu yaaghangaala emyaka egindi bikumi bibiri na mwenda (209), era yaazaala n'abaana abandi.

²⁰ Reu bweyagheza emyaka amakumi asatu n'ebiri (32) egy'obukulu, yaazaala Serugi.

²¹ Reu oyo ng'amaze okuzaala Serugi yaaghangaala emyaka egindi bikumi bibiri na musanvu (207), era yaazaala n'abaana abandi.

²² Serugi bweyagheza emyaka amakumi asatu (30) egy'obukulu, yaazaala Nahori.

²³ Serugi oyo ng'amaze okuzaala Nahori yaaghangaala emyaka egindi bikumi bibiri (200), era yaazaala n'abaana abandi.

²⁴ Nahori bweyagheza emyaka abiri n'omwenda egy'obukulu (29), yaazaala Tera.

²⁵ Nahori oyo ng'amaze okuzaala Tera yaaghangaala emyaka egindi kikumi na ikumi na mwenda (119), era yaazaala n'abaana abandi.

²⁶ Tera bweyagheza emyaka ensanvu (70) egy'obukulu yazaala Aburamu, Nahori ni Harani.

Baidhukulu ba Tera

²⁷ Bano ni baidhukulu ba Tera: Tera yazaala Aburamu, Nahori ni Harani ate Harani yaazaala Loti.

²⁸ Harani yasooka ise okufa, ng'afiira mu nsi ye yazaalibwamu eyetebwa Uri ey'Abakaladea.

²⁹ Aburamu yaabayiza omukazi eyayetebwanga Sarai; Nahori yaabayiza omukazi eyayetebwanga Milika, mughala wa Harani. Harani oyo era n'eyazaala ni Isika.

³⁰ Sarai yaaba mugumba ng'aziraku mwana.

³¹ Tera yatwala mutabane Aburamu, ni mwidhukulu we Loti, eyali mutabane wa Harani, era yaatwala ni mukaamwana Sarai, eyali muka Aburamu. Yaaja nabo, baava mu Uri ekiri mu nsi ey'Abakaladea, nga baja mu kiketezo eky'e Kanaani. Aye bwe baatuuka mu Harani, baasenga eyo.

³² Tera yaafiira eyo ng'agheza emyaka bikumi bibiri n'etaanu (205) egy'obukulu.