Amainhama 10 - Baibuli Ekibono kya Katonda 2014

Baidhukulu ba batabane ba Noa

¹ Bano n'abaidhukulu ba batabane ba Noa: Shemu, Hamu ni Yafethi. Bonsatuli baazaala abaana ng'omwidhuzo gumaze okubaagho.

² Abaana ba Yafethi ni bano: Gomeri, Magogi, Madai, Yavani, Tubali, Mesheki ni Tirasi.

³ Abaana ba Gomeri ni bano: Ashekenazi, Rifathi ni Togaruma.

⁴ Abaana ba Yavani ni bano: Elisha, Tarushishi, Kittimu ni Dodanimu.

⁵ Mu abo n'omwasimuka abantu abali kumpi n'enhandha era ni ku bizinga. Abantu abo, n'abaidhukulu ba Yafethi, nga bali mu bika byaibwe, mu biketezo byaibwe, era nga buli kikunsu kyogera olulimi olwakyo.

⁶ Abaana ba Hamu ni bano: Kushi, Misiraimu, Puti ni Kanaani.

⁷ Abaana ba Kushi ni bano: Seba, Havila, Sabita, Raama ni Sabiteka. Ate aba Raama ni bano: Sheba ni Dedani.

⁸ Kushi yazaala Nimurodi, eyasooka okuba omusaadha ow'amaani agataloodheka ku nsi.

⁹ Yali muyiizi wa maani ku lw'obuyinza bwa Musengwa Katonda, era okwo n'okwava endhogera eti: “Ng'oti ni Nimurodi omuyiizi ow'amaani ku lw'obuyinza bwa Musengwa Katonda.”

¹⁰ Mu kusooka obwakyabazinga bwe bwalimu ebibuga bino: Babeli, Ereki ni Akkadi nga byonsatuli biri mu kiketezo eky'e Shinari.

¹¹ Yava mu kiketezo ekyo yaaja mu Assiria, yaazimba Nineve, Rehobati-Iri, Kala,

¹² ni Reseni, ekiri ghagati gha Nineve ni Kala ekyo n'ekibuga ekikologho.

¹³ Misiraimu yazaala Ludi, Anami, Lehabi, Nafutu,

¹⁴ Pahurusi, Kasulu (omwasimuka Abafilisiti) ni Kafutori.

¹⁵ Kanaani yazaala Sidoni, omwana we omuberi, ni Hethi,

¹⁶ era n'Abayebusi, Abamori, Abagirigashi,

¹⁷ Abahivi, Abariki, Abasini,

¹⁸ Abaruvadi, Abazemari n'Abahamathi. Olumaliira, ebika eby'Abakanaani byasansaanira mu nsi edhindi.

¹⁹ Ekiketezo eky'Abakanaani nga kiva mu Sidoni, kyaja nga kyolekeire e Gerari kyatuuka e Gaza era kyaja nga kyolekeire e Sodoma, Gomorra, Adama ni Zeboiimu, kyatuukira irala e Lasha.

²⁰ Abantu abo, n'abaidhukulu ba Hamu, nga bali mu bika byaibwe, mu biketezo byaibwe, era nga buli kikunsu kyogera olulimi olwakyo.

²¹ Era ni Shemu mukulu wa Yafethi, era dhaadha w'abaana aba Eberi boonaboona, yeena yazaala abaana

²² bano: Elamu, Assihuri, Aripakishadi, Ludi ni Aramu.

²³ Abaana aba Aramu, ni bano: Uzi, Huli, Getheri ni Mashi.

²⁴ Aripakishadi yazaala Shela ate Shela yaazaala Eberi.

²⁵ Eberi yaazaala abaana babiri: owundi nga ni Pelegi, kuba mu biseera bye yabeeragho abantu beeyawulayawulamu; ate muganda we nga ni Yokutani.

²⁶ Yokutani yazaala Alumodadi, ni Shelefu, ni Hazarimavethi, ni Yera,

²⁷ ni Hadoramu, ni Uzali, ni Dikila,

²⁸ ni Obali, ni Abimaeli, ni Sheba,

²⁹ ni Ofiri, ni Havila era ni Yobabu. Abo boonaboona n'abaali abaana ba Yokutani.

³⁰ Ekiketezo mwe baali baba, nga kiva e Mesha kyayolekera e Sefari, kyatuuka ku kiketezo eky'ensozi ekiri mu buvandhuba.

³¹ Abantu abo, n'abaidhukulu ba Shemu, nga bali mu bika byaibwe, mu biketezo byaibwe, era nga buli kikunsu kyogera olulimi olwakyo.

³² Ebyo n'ebika eby'abaana ba Noa, ng'okuzaalibwa kwaibwe bwe kwali, era ng'amaghanga gaibwe bwe gaali. Era mu maghanga ago n'omwasimuka abantu abaasansaanira mu nsi edhindi, ng'omwidhuzo gumaze okubaagho.