Amainhama 1 - Baibuli Ekibono kya Katonda 2014

Okutondebwa okw'ebitonde

¹ Mu kwinhama Katonda yatonda eigulu n'ensi.

² Ensi yali ndhereere era nga ntabuletabule enzikiiza yali egemye ku nhandha, era ng'omwoyo gwa Katonda gumaamiire amaadhi.

³ Agho Katonda yaakoba ati: “Ghabeegho obutangaavu,” Era obutangaavu bwabaagho.

⁴ Katonda yaabona nga kikalamu okubaagho obutangaavu. Agho yaayawula obutangaavu ku nzikiiza.

⁵ Obutangaavu yaabweta Omusana, ate enzikiiza yaagyeta Obwire. Bwaziba era bwakya olwo lwaba nga n'olunaku olusooka.

⁶ Agho Katonda yaakoba ati: “Ghabeegho ekyawulamu amaadhi, kyawulengamu amaadhi ghabiri.” Era kyaba kityo.

⁷ Katonda yaataagho ekyawulamu amaadhi agali ghaigulu n'ago agali ghansi.

⁸ Ekyawulamu ekyo Katonda yaakyeta Eigulu. Bwaziba era bwakya olwo lwaba nga n'olunaku olwokubiri.

⁹ Agho Katonda yaakoba ati: “Amaadhi agali ghansi gh'eigulu geesololeze ghalala, olwo obukalu buboneke.” Era kyaba kityo.

¹⁰ Obukalu obwo Katonda yaabweta Ensi, ate amaadhi agaali geesoloiza yageeta Enhandha. Katonda yaakibona nga kikalamu.

¹¹ Agho Katonda yaakoba ati: “Ensi eidheku ebimera ebya buli nsambo: ebyo ebitaaku ensigo, n'emiti egitaaku ebibala omuli ensigo dhaagyo.” Era kyaba kityo.

¹² Ensi yaidhaku ebimera ebya buli nsambo ebyo ebitaaku ensigo, n'emiti egitaaku ebibala omuli ensigo dhaagyo. Katonda yaakibona nga kikalamu.

¹³ Bwaziba era bwakya olwo lwaba nga n'olunaku olwokusatu.

¹⁴ Agho Katonda yaakoba ati: “Ghabeegho ebyaka ku igulu, okwawulagho omusana n'obwire bibenga obumanhiso obw'ebiseera, obw'enaku, n'obw'emyaka,

¹⁵ era byakirenga ku igulu okumuliikirira ensi.” Era kyaba kityo.

¹⁶ Katonda yaakola ebyaka ebikologho bibiri ekyaka einho nga kya kufuganga musana, ate ekyaka akatono nga kya kufuganga bwire. Era yaakola n'emuunienie.

¹⁷ Ebyaka ebyo yaabita ku igulu bimuliikirirenga ensi,

¹⁸ bifugenga omusana n'obwire, era byawulengagho obutangaavu ku nzikiiza. Katonda yaakibona nga kikalamu.

¹⁹ Bwaziba era bwakya, olwo lwaba nga n'olunaku olwokuna.

²⁰ Agho Katonda yaakoba ati: “Amaadhi gabeemu ebitonde ebiramu ebya buli nsambo, era mu ibbanga mubeemu enhonhi nga dhiguluka.”

²¹ Agho Katonda yaatonda agasota ag'omu nhandha, n'ebiramu ebindi ebiba mu maadhi ebya buli nsambo era n'enhonhi edha buli nsambo. Katonda yaakibona nga kikalamu.

²² Yaabigha enkabi ati: “Muzaale, mwale, mwidhuze enhandha, era n'enhonhi dhaale ku nsi.”

²³ Bwaziba era bwakya olwo lwaba nga n'olunaku olwokutaanu.

²⁴ Agho Katonda yaakoba ati: “Ensi eidheku ebiramu ebya buli nsambo: ensolo enfuge, n'edh'omu nsiko, n'ebyeghaluliza ku itaka.” Era kyaba kityo.

²⁵ Katonda yaatonda ensolo edh'omu nsiko, n'ensolo enfuge edha buli nsambo. Era yaatonda ebyeghaluliza ku itaka byonabyona. Katonda yaakibona nga kikalamu.

²⁶ Agho Katonda yaakoba ati: “Tukole abantu mu mboneka yaife nga bafaanana ng'oti niife, bafugenga ebyenhandha, n'enhonhi, n'ensolo enfuge n'edh'omu nsiko, era na kiisi kyeghaluliza ku itaka.”

²⁷ Agho Katonda yaatonda abantu mu mboneka ye yeene, yaatonda omusaadha n'omukazi.

²⁸ Era yaabagha enkabi, yaabakoba ati: “Muzaale, mwale, mwidhuze ensi, mugifuge. Mufugenga ebyenhandha n'enhonhi, na kiisi kiramu ekitambula ku nsi.”

²⁹ Katonda yaakoba ati: “Bona eno, mbaghaire kiisi kisimbe ekitaaku ensigo ekiri ku nsi, na kiisi muti ogutaaku ebibala omuli ensigo. Eyo n'enaabanga emere yaimwe.

³⁰ Era kiisi nsolo ey'omu nsiko, na kiisi nhonhi, na kiisi kyeghaluliza ku nsi ekiri n'obulamu, byonabyona mbighaire eisubi n'amakaba ag'ebisimbe nga n'emere yaabyo.” Era kyaba kityo.

³¹ Katonda yaabona bye yakola, byamusangaaza inho. Bwaziba era bwakya olwo lwaba nga n'olunaku olwomukaaga.