Ab'e Roma 9 - Baibuli Ekibono kya Katonda 2014

Katonda n'abantu be abalonde

¹ Ndhogera mazima mu Kurisito tiguya, era n'omwoyo gwange gundhulira mu Mwoyo Mutukuvu.

² Ndi n'enaku nnene n'okulumwa kunene mu mwoyo gwange.

³ Kuba kasinga nze mwene Kurisito yandiinaamye olwa baganda bange, ab'eighanga eirala ninze.

⁴ Bano n'Abaisiraeli abaafuna omukisa okufuuka abaana ba Katonda, ni bagabana ku kitiisa kye, n'akola nabo endagaano, n'abagha Amateeka, n'ensambo ey'okusinzangamu, era n'ebisuubizo.

⁵ Abo ni beene badhaadha abakulu era beene ighanga omwava Kurisito ng'omuntu, Katonda afuga byonabyona asaakibwe ebyanda n'ebyanda. Amiina.

⁶ Kino tikitegeeza nti ebisuubizo bya Katonda byalemwa okutuukirizibwa, kuba Abaisiraeli boonaboona ti n'abantu ba Katonda abalonde.

⁷ Waire baidhukulu ba Aburahamu boonaboona, ti n'abaana ba Katonda, aye nga bwe kyaghandiikibwa kiti: “Mu Isaaka n'omuliva abalyetebwa baidhukulu bo.”

⁸ Kino kitegeeza nti abaana abazaalibwa mu mubiri ti n'abaana ba Katonda, aye abo abazaalibwa olw'okusuubiza kwa Katonda n'abatwalibwa okuba baidhukulu ba Aburahamu abatuufu.

⁹ Kuba ekisuubizo kya Katonda kyakoba kiti: “Mu biseera oti ni bino ndiira era Sara aliba aliku omwana omulenzi.”

¹⁰ Era ti n'ekyo kyonka, kuba abaana ba Rebekka bombi, baali ni Iseibwe mulala, Isaaka dhaadha waife.

¹¹ Waire baali nga bakaali na kuzaalibwa era nga bakaali na kukolaku kibi oba kikalamu, aye olw'okutuukiriza entegeka ya Katonda ey'okulondaku omwana omulala, nga tajiira ku bikolwa aye nga ajiira ku kweta kwe mwene,

¹² yaakoba Rebekka ati: “Omukulu aligheereza omuto.” Kino kyali kityo okukakasa nti Katonda alonda y'aba ayese nga tajiira ku bikolwa bya bantu.

¹³ Kuba kyaghandiikibwa kiti: “Nagonza Yakobo aye naakyagha Esau.”

¹⁴ Kale tunaakoba tutya? Tuti Katonda asaliriza? Busa naire

¹⁵ kuba yakoba Musa ati: “Ndisaasira oyo ye nsaasira, ndigemerwa ekivunika oyo ye ngemerwa ekivunika.”

¹⁶ Kale Katonda tajiira ku muntu by'ayenda oba by'akola, aye ku kusaasira kwe mwene kwonka.

¹⁷ Ebyaghandiikibwa bikoba Farao biti: “Nakufuula omukulu, mu iwe obukumu bwange bwolekebwe era eriina lyange limanhibwe mu nsi yoonayoona.”

¹⁸ Kale ni Katonda asaasira oyo y'aba ayenze okusaasira era yaakalangusa omwoyo gw'oyo y'aba ayenze okukalangusa.

Obusungu bwa Katonda era n'ekisa kye

¹⁹ Agho mwidha kunkoba muti, oba nga kiri kityo, lwaki Katonda anenia omuntu? Naani asobola okulobera Katonda ky'ayenda?

²⁰ Aye iwe omuntu niiwe ani atakania Katonda? Ekiwumbe kisobola okukoba eyakiwumba kiti: “Lwaki wampumba oti?”

²¹ Omuwumbi ti wa idembe okukola ky'ayenda mu itosi? Tasobola kutoola ku itosi eirala eryo, erindi n'aliwumbamu ekibya eky'ebbeeyi, n'erindi n'aliwumbamu ekibya ekyabuliidho?

²² N'ekyo Katonda kye yakola kifaananaku ni kino. Yayenda okwoleka obusungu bwe n'okumanhisa obukumu bwe. Kyeyava n'aguminkiriza einho abo be yasungughalira abaali bateegereire okuzikirira.

²³ Era yayenda okwoleka ekitiisa kye ekinene einho y'abo be yagemerwa ekisa, abo be yategekera ekitiisa okuva eira n'eira.

²⁴ Kuba niife be yayeta, ti kuva mu Bayudaaya mwonka aye n'okuva mu bamaghanga agandi,

²⁵ nga bw'akoba mu kitabo kya Hosea ati: “Abantu abataali bange ndibeeta ‘Abantu bange.’ Ye nali tigonza, ndimweta ‘Mukagwa wange.’

²⁶ Mu kifo gheene ghe bayeterwa ‘Abatali bange’, agho gheene ghe balyeterwa abaana ba Katonda omulamu.”

²⁷ Isaia yeena yalangirira ku Isiraeli ati: “Abantu ba Isiraeli ni bwe balyaga omusenho ogw'enhandha obungi, aye batono bati abaliwonagho ni balokolebwa

²⁸ kuba Musengwa taliroba kutuukiriza mangu kye yakoba okukola ku nsi.”

²⁹ Kiri nga Isaia bwe yalanga ati: “Nguli Musengwa Afuga Amagye tiyatulekeragho izaire, twandibaire ng'oti n'ab'e Sodoma, era twafaanana ng'oti n'ab'e Gomorra.”

Paulo asabira Isiraeli

³⁰ Kale tunaakoba tutya? Ka tukobe tuti abamaghanga agandi abataakolerera butuukirivu, baafuna obutuukirivu obuva mu kwikiriza.

³¹ Aye ng'Abaisiraeli abaanoonia obutuukirivu obujiira ku Mateeka, tibaasobola kutuukiriza Mateeka ago.

³² Lwaki? Kuba tibaabunoonia nga bajiira ku kwikiriza, aye nga bajiira ku bikolwa. Beekontola ku ibaale eryo eryekontolwaku,

³³ nga bwe kyaghandiikibwa kiti: “Bona ndi kuta mu Sioni eibaale eryekontolwaku abantu, olubaale olulibagwisa. Aye kiisi aikiriza oyo taliswazibwa.”