Ab'e Roma 8 - Baibuli Ekibono kya Katonda 2014

Obulamu bw'abo abali ni Mwoyo

¹ Kale ni abo abali mu Kurisito Yesu tibakaali na musango.

² Eiteeka lya Mwoyo eritugha ife obulamu abali mu Kurisito Yesu, lyamponia eiteeka ery'ekibi era n'okufa.

³ Amateeka kye gataasobola kukola olw'obunafu bw'obuntu Katonda yakikola. Yaasingisa ekibi ekiri mu mubiri omusango, bwe yatuma Omwana we mwene ng'ali n'omubiri ogufaananira irala n'omubiri ogukola ebibi, aidhe aghangule ekibi.

⁴ Katonda yakola kino, ife abatafugibwa mubiri, aye abafugibwa Mwoyo, tughange okutuukiriza eby'obutuufu Amateeka bye gatukoba okukola.

⁵ Abo abafugibwa omubiri, ebidhuubo byaibwe byonabyona biri ku bya mubiri, aye abo abafugibwa Mwoyo, ebidhuubo byaibwe byonabyona biri ku bya Mwoyo.

⁶ Okwemalira ku by'omubiri kuleeta okufa, aye okwemalira ku bya Mwoyo kuleeta obulamu n'emiraala.

⁷ Okwemalira ku by'omubiri kuleetera omuntu okuba omuzigu wa Katonda, nga tawulira mateeka ga Katonda, era bwene taghanga ku gawulira.

⁸ Era abo abafugibwa omubiri, tibaghanga kusiimya Katonda.

⁹ Aye oba nga bwene Mwoyo wa Katonda ali mu imwe timufugibwa mubiri aye mufugibwa Mwoyo. Kiisi azira Mwoyo wa Kurisito ti wa Kurisito.

¹⁰ Aye oba nga Kurisito ali mu imwe, emibiri gyaimwe ni bwe gifa olw'ekibi, emyoyo gyaimwe gisigala nga miramu kuba Katonda yabatukuza ni Mwoyo.

¹¹ Oba nga Mwoyo wa Katonda eyazuukiza Yesu ali mu imwe, kale oyo eyazuukiza Kurisito Yesu, emibiri gyaimwe egifa gyona aligigha obulamu ku bwa Mwoyo we ali mu imwe.

¹² Kale ni aboluganda, tuli n'eibandha. Omubiri ti n'ogutubandha okukola ebyo bye gwenda.

¹³ Kuba bwe mujiira ku mubiri bye gwenda, muja kufa, aye bwe mujiira ku bya Mwoyo n'abayamba okulekerayo irala ebikolwa byaimwe ebibi, muja kuba balamu.

¹⁴ Abo abakolera ku Mwoyo wa Katonda n'ababa abaana ba Katonda.

¹⁵ Katonda ti yabagha Mwoyo wa kubasibira mu bwiru na kubaleetera kutya, aye mwagheebwa mwoyo abafuula abaana ba Katonda abasobola okweta Katonda “Abba”, ekitegeeza kiti “Iseife”.

¹⁶ Mwoyo wa Katonda mwene akakasiza ghalala n'emyoyo gyaife nga tuli baana ba Katonda.

¹⁷ Nga bwe tuli abaana be, tulifuna ebirungi bye yasuubiza abantu be, era tuligabanira ghalala ni Kurisito ebyo Katonda bye yamuterekera. Kuba bwe tudaagiradaagira aghalala ni Kurisito, tulifunira ghalala naye ekitiisa.

Ekitiisa kye tuligheebwa

¹⁸ Tidhuuba nga okudaagadaaga buti kwe tulimu kughanga okwagayaga n'ekitiisa ekiritwolekebwa.

¹⁹ Ebitonde byonabyona birindirira nga byesumba okubona Katonda ng'ayoleka abaana be.

²⁰ Kuba ebitonde ebyo tibyeyendera kufuuka bitali bya mugaso, aye byali bityo ku bw'oyo eyayenda bibe bityo. Aye ghaligho eisuubi,

²¹ nga ebitonde byene biriwona okufugibwa okuvunda, byafuna eidembe ery'ekitiisa eky'abaana ba Katonda.

²² Kuba twidhi nga okutuukiza irala buti, ebitonde byonabyona bisinda era byonabyona birumwa ng'oti n'omukazi alumwa okuzaala.

²³ Aye ti bitonde byonka, aye n'ife beene abali ni Mwoyo ng'ekirabo kya Katonda ekisookera irala mu birabo ebindi, tusinda mu myoyo gyaife nga tuteegerera Katonda okutufuula abaana be n'okununula emibiri gyaife.

²⁴ Kuba twalokolwa lwa kusuubira, aye nguli kye tusuubira tukibonaku, okwo tikuba kusuubira. Kuba naani asuubira ekyo ky'abonaku?

²⁵ Aye bwe tusuubira ekyo kye tutabonaku, tulindirira n'okuguminkiriza.

²⁶ Mu nsambo n'endala Mwoyo atuyamba mu bunafu bwaife, kuba titwidhi kusaba nga bwe kitugwanira, aye Mwoyo mwene atwogererayo mu kusinda okutaloodheka.

²⁷ Era Katonda akebera emyoyo gy'abantu era aidhi Mwoyo ky'adhuuba, kuba Mwoyo n'ayogererayo abantu ba Katonda, nga Katonda bw'asiima.

²⁸ Twidhi nga mu buli kintu Katonda akola olw'obukalamu bw'abo abamugonza, era abaayetebwa nga bwe yayenda.

²⁹ Kuba abo be yalonda yabaawula era yaabategeka okufaanana Omwana we, Omwana we oyo abe omuberi mu baganda be kamaala.

³⁰ Abo Katonda be yategeka, yabeeta, era abo be yayeta be yafuula abatuukirivu era abo be yafuula abatuukirivu, yabagha ekitiisa.

Okugonza kwa Katonda

³¹ Kale ebyo tunaabikobaku ki? Katonda bw'aba ku luuyi lwaife, aghanga okutulwanisa naani?

³² Oyo ataasaasira na mwana we mwene, aye n'amughaayo ku lwaife twenatwena, aliroba atya okutugheera aghalala n'Omwana we oyo ebintu byonabyona?

³³ Naani alivunaana abalondemu ba Katonda, Katonda mwene bw'aba nga tabavunaana?

³⁴ Ghazira aghanga kubasingisa musango, kuba Kurisito Yesu mwene eyafa ate n'azuukira, era atyaime ku mukono omusaadha ogwa Katonda n'atwogererayo.

³⁵ Kale naani asobola okututoola ku kugonza kwa Kurisito? Kudaagadaaga oba bulumi oba kukirigibwa, oba ndhala, oba bwavu, oba kabi, oba kufa?

³⁶ Nga bwe kyaghandiikibwa kiti: “Ku lulwo, tuli mu kabi ak'okufa olunaku lwonalwona. Tutwalibwa ng'entaama edhija okwitibwa.”

³⁷ Aye mu ebyo byonabyona tughangulira irala ku lw'oyo eyatugonza

³⁸ kuba nkakasa nti waire kufa, waire bulamu, waire bamalaika, waire abafuzi n'ab'obukumu obundi, waire ebirigho, waire ebiribaagho,

³⁹ waire obugungumavu, waire okwika ghansi, waire ekitonde ekindi kyonakyona, tibirisobola kututoola ku kugonza kwa Katonda okuli mu Kurisito Yesu Musengwa waife.