Ab'e Roma 7 - Baibuli Ekibono kya Katonda 2014

Obufumbo ng'eky'okuboneraku

¹ Aboluganda, bwenebwene mwidhi kye nja okubakoba, kuba mwenamwena mwidhi ng'amateeka gafuga omuntu ng'akaali mulamu.

² Eky'okuboneraku, omukazi omufumbo eiteeka limusiba ku iba, iba oyo bw'aba ng'akaali mulamu, aye iba bw'afa, omukazi oyo aba nga takaafugibwa iteeka eryo.

³ Kale ni omukazi oyo bw'abayira omusaadha owundi nga iba akaali mulamu ayetebwa mwenzi aye iba bw'afa aba takaasibibwa iteeka eryo, era bw'abayira omusaadha owundi taba mwenzi.

⁴ Kale ni aboluganda, bwekiri kityo ye imwe. Mwafa mwayawukanira irala n'Amateeka kuba muli bitundu bya mubiri gwa Kurisito. Kale ni mperaano muli ba Kurisito oyo eyazuukira tusobole okukola obukalamu mu kugheereza Katonda.

⁵ Bwe twali nga tufugibwa omubiri, Amateeka gaasiikuulanga okwegomba kwaife okubi, okwegomba okwo kwakola mu mibiri gyaife, kwaleeta okufa.

⁶ Aye mperaano titukaafugibwa Mateeka, kuba twafa twayawukana n'Amateeka agaali gatufiire abasibe. Titukaagheereza mu nsambo ey'eira ekolera ku mateeka amaghandiike, aye tugheereza mu nsambo empyaka eya Mwoyo.

Amateeka, n'ekibi

⁷ Kale tukobe tutya? Tukobe tuti Amateeka kibi? Busa naire, kuba Amateeka n'agaamanhisa ekibi. Tyandimanhie ng'okwegomba kubi, ngoli Amateeka tigaakoba gati: “Tiweegombanga.”

⁸ Aye ekibi nga kibita mu kiragiro ekyo, kyandeetera okwegomba okubi okwa buli nsambo, kuba amateeka bwe gatabaagho ekibi kiba kifiire.

⁹ Nze nali mulamu ng'amateeka gaziragho, aye ekiragiro bwe kyaidha, ekibi kyasituka

¹⁰ era kyandeetera okufa. Kale ekiragiro ekyandibaire nga kindeetera obulamu, kyanviiramu kufa.

¹¹ Ekibi bwe kyabita mu kiragiro, kyanguyaguya kyandhita nga kikozesa ekiragiro ekyo.

¹² Kale ni Amateeka ku bwago matukuvu n'ekiragiro kitukuvu kya mazima era kikalamu.

¹³ Olwo kino kitegeeza kiti ekikalamu n'ekyandeetera okufa? Busa naire. Aye ekibi n'ekyandeetera okufa nga kibita mu kikalamu, ekibi kisobole okweyoleka nga bwekiri ekibi era olw'ekiragiro, ekibi kyeyongere okulagira irala obubi bwakyo.

Okusoberwa kw'omuntu

¹⁴ Twidhi nga Amateeka galigho ku lwa bya mwoyo, aye nze nfugibwa mubiri era ndi mwiru wa kibi.

¹⁵ Titegeera kye nkola kuba tikola kye nhenda kukola, kye ntayenda kukola kye nkola.

¹⁶ Bwe nkola kye ntayenda nkakasa nga Amateeka makalamu.

¹⁷ Kale mba nga ti ninze akikoze aye ekibi ekiri mu nze n'ekiba kikikoze.

¹⁸ Ndidhi nga olw'obuntu obuli mu nze ghazira kikalamu kyonakyona ekindimu, kuba ni bwenandyenze okukola ekituufu tighanga kukikola.

¹⁹ Tikola kikalamu kye nhenda kukola, aye ekibi kye ntayenda kukola kye nkola.

²⁰ Bwe nkola kye ntandyenze nkole, ekyo kyoleka nga ti ninze mba nkikoze aye ekibi ekiri mu nze n'ekiba kikikoze.

²¹ Kale kino kyanfuukira iteeka mu nze, bwe nhenda okukola ekituufu ate nnondagho kukola kibi.

²² Mu mwoyo gwange nsangaalira eiteeka lya Katonda.

²³ Aye mu mubiri gwange mulimu eiteeka erindi erirwana n'eiteeka eryo amagezi gange lye gabona nga n'eituufu. Kino kinfuula okuba omusibe w'eiteeka ery'ekibi ekikolera mu mubiri gwange.

²⁴ Ye nze okudaaga! Naani alimponia omubiri guno oguntwala mu kufa?

²⁵ Katonda yeebazibwe, oyo alimponia ng'abita mu Musengwa waife Yesu Kurisito. Nze mu mwoyo mule ndi mugheereza wa mateeka ga Katonda, aye mu buntu ngondera iteeka lya kibi.