Ab'e Roma 4 - Baibuli Ekibono kya Katonda 2014

Aburahamu ng'eky'okuboneraku eky'okwikiriza

¹ Kale tunaakoba ki ku dhaadha waife Aburahamu? Kiki kye tumwegeraku?

² Nguli yafuna obutuukirivu olw'ebikolwa bye yakola, yandibaire ng'agwaine okwesuuta, aye mu maiso ga Katonda azira kye yeesuuta.

³ Ebyaghandiikibwa bikoba biti: “Aburahamu yaikiriza Katonda era olw'okwikiriza, Katonda yaamubala okuba omutuukirivu.”

⁴ Omukozi asasulwa empeera ye, era tetwalibwa ng'ekirabo obulabo, aye aba agikolereire.

⁵ Aye oyo atakola bwa bikolwa, aye n'aikiriza Katonda oyo atukuza aboonooni n'abafuula abatuukirivu, okwikiriza kwe okwo Katonda kw'asinziiraku okumufuula omutuukirivu.

⁶ Kino Daudi kye yali akoba bwe yayogera ku mukisa gw'omuntu Katonda y'abala okuba omutuukirivu nga ghazira ky'akoze, ng'akoba ati:

⁷ “Ba nkabi abo abasoniyibwa ebyonoono byaibwe, era ebibi byaibwe ni bibatoolebwaku.

⁸ Wa nkabi oyo Musengwa y'abala nga aziraku kibi.”

⁹ Kale okuba n'enkabi kuno, kwa bakekete bonka oba n'abatali bakekete boona kwaibwe? Kuba tukoba tuti: “Aburahamu yaikiriza Katonda era olw'ekyo Katonda yaamubala okuba omutuukirivu.”

¹⁰ Kino kyabaagho nga Aburahamu amaze okukeketebwa oba ng'akaali? Tikyaligho ng'amaze okukeketebwa, aye ng'akaali kukeketebwa.

¹¹ Olumaliira yakeketebwa, okukeketebwa kwe kaaba akamanhiso akakakasa obutuukirivu, bwe yagheebwa olw'okwikiriza kwe, ng'akaali kukeketebwa memale yaaba dhaadha w'abo boonaboona abaikiriza Katonda, ababalibwa okuba abatuukirivu ni bwe baba nga ti bakekete.

¹² Ate era oyo ni dhaadha w'abakekete abatakoma ku kya kuba bakekete kyonka, aye abatambulira ni mu bulamu obw'okwikiriza, obuli ng'obwa dhaadha waife Aburahamu bwe yali nabwo ng'akaali kukeketebwa.

Katonda by'asuubiza bifunibwa lwa kwikiriza

¹³ Katonda yasuubiza Aburahamu n'eizaire lye okubagha ensi. Ekisuubizo kino kyagheebwa Aburahamu ti lwa kuba nga yali agema Amateeka, aye olw'okwikiriza, Katonda yamubala okuba omutuukirivu.

¹⁴ Kuba nguli abo abagema Amateeka n'abagheebwa ebyo Katonda bye yasuubiza bonka, okwikiriza kwandibaire kwa busa, n'ebyo Katonda bye yasuubiza tibyandigasiisa.

¹⁵ Amateeka galeeta obusungu bwa Katonda, aye aghazira Mateeka, tighaba kwonoona.

¹⁶ Kale ni ebyo Katonda bye yasuubiza byesigaime ku kwikiriza, bisobole okubonekera irala nga byali kirabo bulabo Katonda kye yagha obughe eizaire lya Aburahamu lyonalyona. Ekirabo kino ti ky'abo bonka abagema Amateeka, aye n'abo boonaboona abali n'okwikiriza nga Aburahamu kwe yali nakwo. Kuba Aburahamu ni dhaadha waife abaikiriza twenatwena

¹⁷ ng'ebyaghandiikibwa bwe bikoba biti: “Nkutairegho obe dhaadha ow'amaghanga kamaala.” Ekisuubizo kino kyali kituufu mu maiso ga Katonda, Katonda oyo azuukiza abafu era alagira ebiziragho ni bibaagho.

¹⁸ Aburahamu yaikiriza era yasuubirira ni gh'atandisuubiriire, kyeyava afuuka dhaadha ow'amaghanga kamaala, kuba era n'ebyaghandiikibwa bikoba biti: “Eizaire lyo lityo bwe liriba.”

¹⁹ Okwikiriza kwe tikwakendeeraku waire yali agheziiza emyaka nga kikumi egy'obukulu, era nga omubiri gwe guboneka ng'oti guzira kye gukaaghanga, era ng'okwo ni kw'otaire n'ekya Sara okuba omugumba.

²⁰ Tiyalekayo kwikiriza era ti yabuusabuusa Katonda kye yamusuubiza. Yeeyongera mu kwikiriza, yaagha Katonda ekitiisa

²¹ ng'akakalisa irala nga Katonda aghanga okukola ekyo kye yasuubiza.

²² Olw'okwikiriza Aburahamu kyeyava abalibwa okuba omutuukirivu.

²³ Aye ebibono ebikoba biti: “Yabalibwa okuba omutuukirivu”, tibyaghandiikibwa ku lulwe yenka,

²⁴ aye era ni ku lwaife abaikiriza mu oyo eyazuukiza Yesu Musengwa waife, tulibalibwa okuba abatuukirivu.

²⁵ Yesu oyo yaitibwa olw'ebibi byaife, yaazuukira tusobole okutoolebwaku omusango.