Ab'e Roma 3 - Baibuli Ekibono kya Katonda 2014

¹ Kale Omuyudaaya asinga ki abamaghanga agandi? Oba okukeketa kuli ni kye kugasa?

² Kugasa inho mu buli nsambo. Ekisooka, Abayudaaya Katonda be yasooka okugemya ekibono kye.

³ Memale bwe kiba ng'abandi ku abo tibaali beesigwa, kitegeeza nti Katonda taliba mwesigwa?

⁴ Busa, ti bwekiri. Katonda asigala nga wa mazima waire buli muntu aba nga muguya nga bwe kyaghandiikibwa kiti: “By'oyogera byoleka nga toguya era bwebakuwozesa niiwe osinga.”

⁵ Aye tunaakoba ki bwe kiba nga ife olw'okuba ababi kyolekera irala nga Katonda bw'asala mu mazima? Ka ndhogere ng'abantu bwe boogera. Tunaakoba tuti Katonda mukyamu bw'atubonereza?

⁶ Busa, ti bwekiri kuba Katonda bw'ataba wa mazima aghanga atya okusalira ensi omusango?

⁷ Aye oba nga obuguya bwange bwongera okwoleka nga Katonda wa mazima era yaagheebwa ekitiisa, lwaki nze mba nga nkaasalirwa omusango ng'omwonooni?

⁸ Kale lwaki titusooka kukola bibi memale ebikalamu biidhe? Kuba era abandi bampaayiriza mbu ntyo bwe nkoba! Abo bagwaine okusalirwa omusango okubasinga.

Ghazira muntu mutuukirivu

⁹ Kale ife Abayudaaya tuli ni kye tusinga abamaghanga agandi? Busa, tuzira kye tubasinga kuba mmaze okubalaga nti Abayudaaya n'abamaghanga agandi boonaboona bafugibwa ekibi,

¹⁰ nga bwe kyaghandiikibwa kiti: “Ghazira mutuukirivu waire mulala.

¹¹ Ghazira ategeera Katonda waire okumusinza.

¹² Boonaboona baaghaba, boonaboona baakola ebitagwana. Ghazira akola bukalamu. Ghazira naire omulala ati.

¹³ Ebibono byaibwe magombe geene. Enimi dhaibwe badhoogeza bya buguya. Ebibono byaibwe bya kabi ng'obusagwa obw'omusota.

¹⁴ Endhegeresa yaibwe eidhwire okufuugha n'ebibono eby'obukambwe.

¹⁵ Bangu mu kuja okwita abantu.

¹⁶ Buli ghe baja baleetera abantu okuzikirira era n'enaku.

¹⁷ Tibaidhi kuleetera bantu miraala,

¹⁸ waire okwega okutya Katonda.”

¹⁹ Twidhi nga buli kyonakyona ekiri mu Mateeka kigema ku abo abafugibwa Amateeka, ghalobe kubaagho eyeewolereza, era abantu ab'omu nsi boonaboona Katonda abasalire omusango.

²⁰ Mu maiso ga Katonda ghazira muntu ni bw'aba mulala ati alibalwa kuba mutuukirivu olw'okukola ebiri mu Mateeka, kuba ku Mateeka abantu kwe bamanhira nga boonooni.

Obutuukirivu buva mu kwikiriza

²¹ Aye mperaano obutuukirivu obuva ewa Katonda nga tibubise mu Mateeka buboneike, waire nga bwakakasibwa Amateeka n'abalanzi

²² buno n'obutuukirivu Katonda bw'agha abantu boonaboona olw'okwikiriza Yesu Kurisito. Kuba mu boonaboona ghazira ndhawulo

²³ boonaboona baayonoona, baalemwa okutuuka ku kitiisa Katonda kye yabategekera.

²⁴ Aye olw'ekisa kya Katonda, baagheebwa obutuukirivu ng'ekirabo mu Kurisito Yesu eyabanunula.

²⁵ Olw'okufa kwe Katonda yamutaagho okuba omutango ogw'ebibi by'abaikiriza. Katonda yakola kino olw'okwoleka obutuufu bwe, kuba olw'okuguminkiriza kwe, ebibi by'abantu eby'eira tiyabiringiriza.

²⁶ Aye mu biseera bino, abonereza abantu olw'ebibi byaibwe olw'okwoleka obutuukirivu bwe era nga bw'agha obutuukirivu buli muntu aikiriza Yesu.

²⁷ Kale ekikuleetera okwesuuta kiri gha? Kiziragho. Lwaki kiziragho? Olw'okuba nga tugema Amateeka? Busa naire, aye lwa kuba twikiriza

²⁸ kuba tukakalisa irala ng'omuntu abalibwa okuba omutuukirivu lwa kwikiriza, ti lwa kugema Mateeka.

²⁹ Koodhi Katonda aba Katonda wa Bayudaaya bonka? Abamaghanga agandi boona taba Katonda waibwe? Bwene, boona waibwe

³⁰ kuba Katonda mulala era Abayudaaya alibagha obutuukirivu ng'ajiira ku kwikiriza kwaibwe, n'abamaghanga agandi alibagha obutuukirivu lwa kwikiriza kwaibwe.

³¹ Mperaano okwikiriza kitegeeza kudibya Mateeka? Busa naire, tugagumya bugumye.