Ab'e Roma 2 - Baibuli Ekibono kya Katonda 2014

Katonda nga bw'asala omusango

¹ Kale mukagwa wange asalira abandi omusango, ni bw'oba ani ozira kya kwegemya, kuba bw'okola ebintu ng'oti n'abandi bye bakola, weesingisa mwene omusango.

² Twidhi nga Katonda bw'asalira abantu abo abakola ebintu ebyo omusango, aba mutuufu.

³ Kale iwe mukagwa wange asalira abakola ebintu ebyo omusango, aye n'okola ebintu ebifaanana ng'oti n'ebyo bye bakola, odhuuba nga oliwunuka Katonda okukusalira omusango okukusinga?

⁴ Oba, onhooma ekisa kye ekingi, n'okugema empola kwe, n'okuguminkiriza kwe? Toidhi nga ekisa kya Katonda kikuleetera okwenenia?

⁵ Aye nga bw'oli n'omwoyo omukalangufu ogutenda kwenenia, weereeteire mwene omusango n'obukambwe ku lunaku Katonda lw'aliragiraku obusungu bwe, nga asala omusango aghazira kusaliriza.

⁶ Kuba aligha empeera kiisi muntu nga ajiira ku bikolwa bye.

⁷ Abo abanoonia ekitiisa, okusaakibwa n'obutafa nga banhiinkiira okukola obukalamu, alibagha obulamu obutawaagho

⁸ Aye abo ab'entaka era abatenda mazima era abakola ebibi, Katonda alibasungughalira, yaabakambughalira.

⁹ Abantu boonaboona abakola ebibi balifuna okudaagadaaga n'obulumi, okwinhamira ku Bayudaaya memale kwireku abamaghanga agandi.

¹⁰ Aye abo abakola obukalamu Katonda alibagha ekitiisa, okusaakibwa n'emiraala, okwinhamira ku Bayudaaya memale kwireku abamaghanga agandi

¹¹ kuba Katonda taboola bantu.

¹² Abamaghanga agandi abaayonoona nga tibaidhi Mateeka, balizikirira nga tibavunaanibwa Mateeka, ate Abayudaaya abaali nga baidhi Amateeka balizikirira nga bavunaanibwa Amateeka;

¹³ kuba abatuufu n'abo abakola Amateeka bye galagira, aye ti abo abagawulira obuwulire.

¹⁴ Abamaghanga agandi abazira Mateeka ago, bwe bakolera mu kutegeera kwaibwe ni batuusa ebyo Amateeka bye gakoba, beene baba batuuse ku Mateeka, waire baba nga bazira Mateeka gale.

¹⁵ Ebikolwa byaibwe byoleka ng'Amateeka kye galagira kighandiikibwa mu myoyo gyaibwe. Kino emyoyo gyaibwe gyona gikikakasa nga kituufu, kuba ebidhuubo byaibwe, emikuzi egindi bibavunaana omusango ate emikuzi egindi bibawolereza.

¹⁶ Era okusinziira ku Mawulire Amalungi ge nkobera abantu ku lwa Kurisito Yesu, kiti bwe kiriba ku lunaku Katonda lw'alisaliraku abantu omusango olw'ebyo bye bagisa.

Abayudaaya n'Amateeka

¹⁷ Aye iwe weeyeta Omuyudaaya, weesiga Amateeka, era weesuutira mu Katonda.

¹⁸ Oidhi Katonda by'ayenda okole era Amateeka gakwegeresa okumanha ekituufu.

¹⁹ Weidhi ng'oli mukulembeze wa batulu era niiwe omuliikirira abo abali mu nzikiiza.

²⁰ Omugalazi w'abo abazira magezi, era omwegeresa w'abaana abato ali n'Amateeka omuli okumanha n'amazima.

²¹ Kale iwe ayegeresa abandi, lwaki tiweeyegeresa mwene? Iwe akoba abandi obutaibanga, aye iwe mwene toiba?

²² Iwe akoba abandi obutayendanga, iwe mwene toyenda? Iwe okyagha ebisinzibwa ebitali Katonda, tomala n'onhaga bya mu masabo?

²³ Iwe oweesuutira mu Mateeka ga Katonda, tomuswaza ng'omenha Amateeka ge?

²⁴ Kyaghandiikibwa kiti: “Ku lwaimwe Abayudaaya eriina lyange livumibwa abamaghanga agandi.”

²⁵ Okukeketa kukugasa bw'oba ng'ogema Amateeka, aye bw'odheemera Amateeka oba ng'atali mukekete.

²⁶ Kale omuntu oyo atali mukekete bw'agema ebiragiro ebiri mu Mateeka, waire nga ti mukekete, talitwalibwa ng'omukekete?

²⁷ Era oyo ataakeketebwa mu mubiri, aye n'agema Amateeka bye gakoba, talikusingisa musango iwe omumenhi w'Amateeka waire ng'oli n'ebyaghandiikibwa mu Mateeka era ng'oli mukekete?

²⁸ Kuba Omuyudaaya mwene era omukekete naani? Ti n'oyo abonekera ku by'oku ngulu ng'akeketebwa mu mubiri.

²⁹ Aye Omuyudaaya mwene, n'Omuyudaaya munda eyafuna okukeketebwa okw'amazima okutali kwa ku ngulu ku mubiri aye okw'omu mwoyo. Omuntu ng'oyo tasiimibwa bantu aye asiimibwa Katonda.