Ab'e Roma 16 - Baibuli Ekibono kya Katonda 2014

Okulamusa

¹ Mbandhulira mwanhinaife Foebe omugheereza ow'Ekikunsu eky'Abaikiriza mu Kurisito ekiri mu Kenkerea.

² Mumusangaaze mu liina lya Musengwa ng'abantu ba Katonda bwe basangaaza, era mumuyambe mu kiisi ky'ayenda, kuba ye mwene yayamba abantu kamaala era nga zeena mwe ndi.

³ Muunamukize Purisikilla ni Akwila bakozi banange mu Kurisito Yesu be tugheereza nabo,

⁴ abaikiriza okufa ku lwange. Ti ninze zenka mbeebaza, aye era n'Ebikunsu eby'Abaikiriza mu Kurisito eby'amaghanga agandi byona bibeebaza.

⁵ Muunamukize n'Ekikunsu ky'Abaikiriza mu Kurisito eky'omu ndhu yaibwe. Muunamukize mukagwa wange Epaeneto eyasooka okwikiriza Kurisito mu Asia.

⁶ Muunamukize Maria eyakola einho emirimo mu imwe.

⁷ Muunamukize Anduroniko ni Yunia ab'eighanga lyange be nali nabo mu ikomera. Bano Abatume babaidhi bukalamu era n'abansooka okuba aba Kurisito.

⁸ Mulamuse Ampuliato mukagwa wange bwe twisania mu Musengwa.

⁹ Mulamuse Urubano mukozi munaife mu Kurisito ye tugheereza naye. Mulamuse ni Sitaku mukagwa wange.

¹⁰ Mulamuse Apelle omwesigwa mu Kurisito. Mulamuse ab'omu ndhu ya Arisitobulo.

¹¹ Muunamukize ni Herodioni muganda wange. Mulamuse aboluganda ab'omu ndhu ya Narukisso.

¹² Muunamukize Torufaina ni Tirufosa abakola omulimo gwa Musengwa. Muunamukize ni mukagwa wange Perusi eyakolera Musengwa emirimo ekyodo.

¹³ Mulamuse Rufo eyakola einho omulimo gwa Musengwa, era n'inhina antwala buliidho oti ndi mwana we.

¹⁴ Mulamuse Asunkerito, Filegoni, Heruma, Paturoba, Herume, n'aboluganda be b'aba nabo.

¹⁵ Mulamuse Filologo ni Yulia, Nereo ni mwanhina, ni Olumpa, n'abantu ba Katonda boonaboona be baba nabo.

¹⁶ Mulamusaganie n'okunhwegeragana. Ebikunsu eby'Abaikiriza mu Kurisito byonabyona bibalamwisa.

Ebisembayo

¹⁷ Aboluganda, mbeeghembye mwekuumenga abo abaleeta okwawukana n'okutabuka nga batakania ebyo bye mwayegeresebwa. Mubeeghalenga

¹⁸ kuba abantu abakola ebintu oti n'ebyo tibagheereza Musengwa waife Kurisito aye bakolerera nda dhaibwe. Bakozesa ebibono ebinhoonha era ebisaakiriza, baaguya abantu abazira kabi.

¹⁹ Kuba obuwulize bwaimwe mu kugondera Amawulire Amalungi bumanhiibwa woonawoona, era kyenva nsangaala ku lwaimwe. Nhenda mubenga bagezi mu kukola ekikalamu aye nga timwidhi kukola kibi.

²⁰ Kale ni Katonda ensimuko ey'emiraala gyaife, mangu inho aja kutyankirira Sitaani ghansi gh'ebigere byaimwe. Enkabi dha Musengwa waife Yesu Kurisito dhibenga n'imwe.

²¹ Timotheo mukozi munange abalamwisa, okwo nga kw'otaire Lukio, Yasoni ni Sosipateri ab'eighanga lyange.

²² Nze Terutio omughandiisi w'embaluwa eno mbalamwisa ng'owoluganda mu Musengwa.

²³ Gayo ansuza era nga mu ndhu ye, Ekikunsu eky'Abaikiriza mu Kurisito kyonakyona mwe kyesololeza, abalamwisa. Erasito omukuumi w'endyanga y'ekibuga n'owoluganda Kwaruto babalamwisa. [

²⁴ Enkabi dha Musengwa waife Yesu Kurisito, dhibe n'imwe mwenamwena. Amiina.]

Okusaaka Katonda

²⁵ Ka tusaake Katonda oyo asobola okubagha amaani mu kwikiriza agava mu Mawulire Amalungi agagema ku Yesu Kurisito ge nkobera abantu. Ekyo n'ekyama ekyagisibwa okuva eira n'eira.

²⁶ Aye buti ekyama ekyo kimanhisiibwa mu Byaghandiikibwa abalanzi. Katonda atawaagho yalagira kimanhibwe amaghanga goonagoona, abantu baghange okwikiriza Katonda era n'okumugonderanga.

²⁷ Kale Katonda oyo omulala yenka, ate omugezi, agheebwenga ekitiisa mu Yesu Kurisito ebyanda n'ebyanda. Amiina.