Ab'e Roma 14 - Baibuli Ekibono kya Katonda 2014

Obutanenianga bandi

¹ Atali mugumu mu kwikiriza mumusangaazenga, aye mutatakananga naye mu ebyo by'adhuuba.

² Omugumu mu kwikiriza azira ky'atalya, aye atali mugumu mu kwikiriza alya iva lyonka.

³ Oyo alya kiisi kiriibwa kyonakyona atanhoomanga oyo atakirya. Ate oyo atakirya atanenianga ole akirya, kuba n'oyo Katonda yamusangaaza.

⁴ Niiwe ani asalira omusango omugheereza atali wuwo? Musengwa we mwene n'asalagho oba akola bukalamu, oba akola bubi, era aidha kukola bukalamu, kuba Musengwa we n'amwemerezaagho.

⁵ Omuntu owundi akitwala ng'olunaku olundi lusinga edhindi obukulu, ate owundi yaakitwala nga enaku dhoonadhoona dhaagayaga. Kiisi muntu agumirenga ku ky'atwala nga n'ekituufu.

⁶ Kiisi akuza lunaku, akikola lwa kugheesa Musengwa kitiisa. Kiisi alya kiriibwa kyonakyona, akikola lwa kugheesa Musengwa kitiisa, kuba yeeyanza Katonda olw'emere eyo. Kiisi atakirya, akola atyo lwa kugheesa Musengwa kitiisa, era yeeyanza Katonda.

⁷ Ghazira ku ife asobola kuba mulamu ku bubwe yenka, era ghazira afa ku bubwe yenka.

⁸ Bwe tuba abalamu, tuba balamu ku bwa Musengwa era bwe tufa, tufa ku bwa Musengwa. Kale ni oba tuba balamu oba tufa, tusigala nga tuli ba Musengwa

⁹ kuba Kurisito yafa era yaazuukira, olwo ni abe Musengwa w'abalamu era n'abafu.

¹⁰ Kale iwe lwaki onenia mwino? Twenatwena Katonda n'aja okutusalira omusango.

¹¹ Ebyaghandiikibwa bikoba biti: “Musengwa akoba ati nga bwendi omulamu, kiisi muntu alinkubira amakiryaivu. Era kiisi lulimi lulisaaka nze Katonda.”

¹² Kale kiisi muntu ku ife alyeyogeraku mu maiso ga Katonda.

Obutagwisa bandi mu kibi

¹³ Kale ni tukange agho buli muntu okunenianga mwine. Era tutaleeteranga waluganda kugwa mu kibi.

¹⁴ Ndidhi era nkikakasa mu Musengwa waife Yesu, nti ghazira kya kulya kitali kirongoofu, ku bwakyo. Aye omuntu bw'aikiriza nga tiikirongoofu, olwo kifuuka ekitali kirongoofu.

¹⁵ Bw'onakughaza owoluganda olw'eky'okulya, oba nga tokaakolera ku kugonza. Eky'okulya ky'olya kitaleeteranga muntu Kurisito ye yafiirira kuzikirira.

¹⁶ Ekyo kye mweta ekikalamu, kirobenga kuvumibwa

¹⁷ kuba Obwakyabazinga bwa Katonda tibuva mu kulya na kunhwa, aye buva mu butuufu, mu miraala na mu kusangaala, Mwoyo Mutukuvu by'atugha.

¹⁸ Kiisi agheereza Kurisito atyo, asanhusa ni Katonda, era n'abantu bamusiima.

¹⁹ Kale ni tunoonienga ebyo ebireeta emiraala, na kiisi muntu okugumya mwine.

²⁰ Otayonoonanga mulimo gwa Katonda olw'eby'okulya. Kiisi kya kulya kighanga okuliibwa, aye ti kikalamu okulya ekintu kyonakyona ekireetera omuntu owundi okugwa mu kibi.

²¹ Kituufu obutalyanga mamba oba obutanhwanga omwenge ogw'emizabbibu, oba obutakolanga ekintu kyonakyona ekireetera owoluganda okugwa mu kibi.

²² Ky'oikiriza kikuume nga kimanhiibwa iwe wenka ni Katonda wo. Wa nkabi omuntu oyo ateesalira musango kumusinga mu ebyo by'atwala okuba ebituufu.

²³ Aye oyo abuusabuusa ky'alya, Katonda amusalira omusango bw'akirya. Kuba ekikolwa kye tikijiira ku kwikiriza, era kiisi ekitajiira ku kwikiriza kiba kibi.