Ab'e Roma 13 - Baibuli Ekibono kya Katonda 2014

Okugondera abafuzi

¹ Kiisi muntu agonderanga abafuzi, kuba ghazira bufuzi butava wa Katonda era abafuzi abaligho baateebwagho Katonda.

² Kale ni kiisi adheemera abafuzi, aba adheemeire abo Katonda be yataagho, era aba yeereeseeku mwene omusango

³ kuba abafuzi baba babi y'abo abakola ebibi, aye ti y'abo abakola ebikalamu. Oyenda omufuzi obutakutiisa? Kale kola ebikalamu era aidha kukusiima,

⁴ kuba oyo mugheereza wa Katonda olw'okukugasa iwe. Aye bw'okola ebibi, mutye, kuba obufuzi bwe ti bwa busa, mugheereza wa Katonda era abonereza abo abakola ebibi.

⁵ Kale ni mugwaine okugondera abafuzi ti lwa kutya kubonerezebwa kyonka, aye n'olw'okugondera omwoyo gwaimwe.

⁶ Eno n'ensonga lwaki mugha omusolo, kuba abafuzi baba bagheereza ba Katonda bwe batuukiriza emirimo gyaibwe.

⁷ Kale ni boonaboona mubaghenga kye muteekwa okubagha. Asoloza omusolo mugumughenga, asoloza empooza mugimughenga, agwaine okutiibwa mumutyenga, era n'ow'ekitiisa mukimughenga.

Okugonzania

⁸ Timubanga na ibandha lya muntu yeenayeena okutoolaku ery'okugonza, kuba kiisi agonza muntu mwine aba atuukiriiza Amateeka.

⁹ Ebiragiro ebikoba biti: “Otayendanga, otaitanga, otaibanga, otabanga na kwegomba bya beene”, n'ebiragiro ebindi byonabyona biri mu iteeka eirala erikoba liti: “Gonzanga muntu mwino nga bwe weegonza mwene.”

¹⁰ Kiisi agonza muntu mwine tamukola kibi. Kale okugonza kye kuva ni kuba okutuukiriza Amateeka.

¹¹ Ebyo nga bikaali agho, mwidhi nga esaawa n'eno, ekiseera kituuse imwe okuzuuka mu ndoolo. Kuba mperaano okulokolebwa kwaife kutuli kumpi inho okusinga ghe twainhamira okwikiriza.

¹² Obwire bujiire olunaku lunaatera okutuuka. Kale tuve mu bikolwa eby'enzikiiza, tugeme eby'okulwanisa eby'obutangaavu.

¹³ Twebise bukalamu ng'abaana abali mu butangaavu. Tutaja mu binhumo ni mu kutamiira waire mu bwenzi, oba obukaba. Tutasoola oba okuba n'ensaalwa.

¹⁴ Aye tugeme eby'okulwanisa bya Musengwa waife Yesu Kurisito. Mutaganhanga mubiri kukola kye gwenda.