Ab'e Roma 12 - Baibuli Ekibono kya Katonda 2014

Obulamu obuyaaka mu Kurisito

¹ Kale ni aboluganda mbeeghemba olw'ekisa kya Katonda, mwegheeyo ng'omusengo omulamu omutukuvu era ogwikirizibwa Katonda. Okwo n'okumusinza okw'amazima.

² Muteebisanga ng'abantu ab'ensi eno bwe beebisa, aye mukyuse ebirowoozo byaimwe musobolenga okumanha ebyo Katonda by'ayenda ebikalamu, ebiikirizibwa era ebituufu.

³ Olw'ekisa Katonda kye yampa, nkoba kiisi mulala ku imwe obuteetwala nga wa kitalo. Aye yeebisenga bukalamu ng'ajiira ku kigero eky'okwikiriza Katonda kye yamugha.

⁴ Tuli n'omubiri mulala aye nga guli n'ebitundu kamaala, era nga ebitundu ebyo byonabyona tibikola mulimo mulala.

⁵ Twena abaikiriza tutyo bwe tuli. Tuli kamaala, aye tuli mubiri mulala mu Kurisito, era tuyimbibwa ghalala ng'ebitundu eby'omubiri omulala.

⁶ Kale nga bwe tuli n'ebirabo eby'endhawulo olw'ekisa kya Katonda, tubikozesenga. Oba twagheebwa kya bulanzi, tukoberenga abantu ekibono kya Katonda ng'okwikiriza kwaife bwe kuli.

⁷ Oba twagheebwa kugheereza tugheerezenga, oba kwegeresa twegeresenga.

⁸ Oba kulamba tulambenga, oba kugaba tugabenga n'omwoyo mulala; omufuzi abenga munhinkiivu, n'oyo akolera abandi eby'ekisa akolenga atyo nga musangaavu.

⁹ Okugonza kwaimwe kubenga kwa mazima, mulekenga kukola kibi, mukalangukirenga ku kikalamu.

¹⁰ Mugonzanienga ng'aboluganda mu Kurisito. Kiisi mulala afubenga okugha mwine ekitiisa.

¹¹ Mufubenga okukola era mutabanga bagayaavu. Mugheerezenga Musengwa n'omwoyo omumalirivu.

¹² Okusuubira kwaimwe kubakuumenga nga musagamba, mubenga baguminkiriza mu bizibu byaimwe era musabenga buliidho.

¹³ Mutoolenga ku byaimwe mughenga abantu ba Katonda. Musangaalirenga abageni.

¹⁴ Musabirenga ababakiriga aye mutabakolimiranga.

¹⁵ Musagambirenga ghalala n'abo abasagamba, munakughalirenga ghalala n'abo abali mu nnaku.

¹⁶ Mwisanienga mwenamwena. Muteekudumbazanga aye mubitenga n'abaghafu. Mulobe kwetwalanga ng'abagezi.

¹⁷ Mutasasulanga kibi na kibi, aye mukolenga ekyo abantu kye babona nga kikalamu.

¹⁸ Ku luuyi lwaimwe mukolenga kyonakyona ekisoboka mwisanienga n'abantu boonaboona.

¹⁹ Aboluganda, muteesasuulizanga ku muntu. Muleke Katonda mwene yeesasuuzenga, kuba kyaghandiikibwa kiti: “Okulwana enzigu kwange; ndyesasuuza, Musengwa atyo bw'akoba.”

²⁰ Kale ni omuzigu wo endhala bw'emulumanga mughenga eky'okulya, era bw'abanga endiwo mughenga eky'okunhwa; kuba bw'okola otyo olimuswaza.

²¹ Ekibi kitakughangulanga, aye iwe kighangulenga ng'okola ebikalamu.