Ab'e Roma 11 - Baibuli Ekibono kya Katonda 2014

Abaasigalagho mu Isiraeli

¹ Kale ni ka mbabuuze: Katonda yazira abantu be? Busa naire, kuba zeena ndi Muisiraeli, mwidhukulu wa Aburahamu ow'ekika kya Benjamini.

² Katonda taziranga bantu be abo be yamanha eira. Mwidhi ebyaghandiikibwa bwe byogera ku Eliya bwe yasaba Katonda olwa Isiraeli ati:

³ “Musengwa, baise abalanzi bo, baakontakonta alutaari dho. Ninze zenka nsigairegho era zeena bali kundhagala benda kundhita.”

⁴ Aye Katonda yamwiramu atya? Yamwiramu ati: “Neekuumiiregho abasaadha kasanvu (7,000) abatakubirangaku Baali makiryaivu.”

⁵ Kityo bwekiri ni buti. Ghaligho abawonagho ni balondebwamu olw'ekisa kya Katonda.

⁶ Okulondebwamu kwaibwe kujiira ku kisa kya Katonda aye ti ku bikolwa byaibwe. Kuba nguli okulonda kwa Katonda kujiira ku bikolwa byaibwe, ekisa kye tikyandibaire nga kikaali kisa kyene.

⁷ Kale tunaakoba tutya? Abaisiraeli tibaafuna ekyo kye baanuyirira? Abalondemu n'abaakifuna, aye abandi baakalanguka emyoyo,

⁸ nga bwe kyaghandiikibwa kiti: “Katonda yabagha emyoyo emisirusiru, yabagha amaiso agatabona n'amatu agatawulira okutuukiza irala ni ye buli eno.”

⁹ Era Daudi akoba ati: “Ebibigiya byaibwe leka bibafuukire omutego n'eigu ebibagemya; bibafuukire ekitimuguunha, era babonerezebwe.

¹⁰ Amaiso gaibwe gazibibwe balobe kubona; n'emigongo gyaibwe gifunhibwe enaku dhoonadhoona.”

¹¹ Kyenva mbuuza nti: Abaisiraeli beekontola kugwa kuzikirira? Busa naire. Aye bwe baayonoona baaleetera abamaghanga agandi okulokolebwa, baagemya Abaisiraeli ensaalwa.

¹² Oba nga okwonoona okw'Abaisiraeli kwagheesa ensi yoonayoona emikisa, era oba nga obunafu bwaibwe buleetera abamaghanga agandi emikisa mingi, kale boonaboona bwe balingira mu kulokolebwa emikisa giryaga gha!

Okulokolebwa kw'amaghanga agandi

¹³ Mperaano ka mbakobere imwe abamaghanga agandi ekiseera kye nnaamala nga nkaali mutume waimwe ndidha kutanga mu mulimo gwange ekitiisa.

¹⁴ Tomanha mu kukola ekyo bwe ngemya Bayudaaya banange nsaalwa ni ndokolaku abandi

¹⁵ kuba oba nga ekya Katonda okubalekulira agho kyaleetera ensi okwizaagho omukago ni Katonda, memale okwizibwa kwaibwe tikulireeta bulamu okuva mu kufa!

¹⁶ Omugaati gwonagwona guba mutukuvu kasita akatundu kaagwo kagheebwayo ng'ekibala ekisooka. Era emizi egy'omuti bwe giba emitukuvu, n'ensaga dhoona dhiba ntukuvu.

¹⁷ Aye oba nga ensaga edhindi edh'omuti omwoliva ogw'omu nimiro dhaawogolwaku, iwe ng'olusaga olw'omuti omwoliva ogw'omu nsiko, waateebwa mu kifo kyadho okugabana ku bugimu bwa gwo,

¹⁸ kale ni tiweesuutiranga ku nsaga edho. Bw'obanga weesuuta oidhukiranga nga ti niiwe ogemereire ekikolo, aye ekikolo n'ekikugemereire.

¹⁹ Aye oidha kukoba oti, ensaga dhaawogolwaku, nze nteebwe mu kifo kyadho.

²⁰ Kino kituufu. Dhaawogolwaku olw'obutaikiriza bwadho era iwe kwikiriza n'okukubeesiisaagho. Kale oteesuuta, weekuume.

²¹ Kuba oba Katonda tiyasaasira Bayudaaya, ensaga edhaatonderwa ku muti ogwo, olowooza nga iwe alikusaasira?

²² Kale ni weekalirise ekisa n'obukambwe bwa Katonda. Akambughalira abo abaagwa, aye yaasaasira iwe kasita ogumira ku kisa kye. Aye bw'otagumira ku kisa kye, weena alikuwogolaku.

²³ Ate Abayudaaya bwe bava mu butaikiriza bwaibwe baliizibwa ku kikolo, kuba Katonda ali n'obuyinza okubaizaaku.

²⁴ Oba nga iwe olusaga olw'omuti omwoliva ogw'omu nsiko, wawogolwa waateebwa ku muti omwoliva ogw'omu nimiro kw'otaatonderwa, memale ensaga edhaatonderwa ku muti ogwo tidhirisingagho kuba nhangu okwizibwa ku muti gwadho gwene?

Katonda agemerwa abantu boonaboona ekisa

²⁵ Aboluganda, nhenda mumanhe ekyama kino mulobe kwesuuta kuba bagezi, kuba abandi ku Baisiraeli baidha kusigala nga bakalangafu ba myoyo okutuusa omughendo ogw'abamaghanga agandi lwe gulimala okwidha ye Katonda.

²⁶ Olwo ni Isiraeli yeenayeena alirokolebwa nga bwe kyaghandiikibwa kiti: “Omulokozi aliva mu Sioni, oyo n'alitoola baidhukulu ba Yakobo mu kwonoona kwaibwe.

²⁷ Era eno n'eriba endagaano nabo, bwe ndibatoolaku ebibi byaibwe.”

²⁸ Bwe twogera ku by'Amawulire Amalungi, Abaisiraeli baba bazigu ba Katonda imwe musobole okugasibwa, aye bwe twogera ku kulondebwamu, Abaisiraeli baba bagonzi ye Katonda, olwa badhaadha baibwe.

²⁹ Kuba Katonda tiyeidhusa bw'alondamu, oba bw'agabira abantu.

³⁰ Mwena eira mwadheemera Katonda, aye mperaano mwasaasirwa olw'obudheemu obw'Abayudaaya.

³¹ Mu nsambo n'endala, olw'okusaasirwa kwe mwafuna, Abayudaaya boona buti badheemera Katonda basobole okusaasirwa nga imwe;

³² kuba Katonda yaleka abantu boonaboona nga badheemu asobole boonaboona okubasaasira.

Okusaaka Katonda

³³ Bwenebwene ekisa kya Katonda n'amagezi ge, n'okumanha kwe, nga tibikoma! By'asalagho tibirowoozeka! Enkola ye nga temanhikana!

³⁴ Ng'ebyaghandiikibwa bwe bikoba biti: “Naani aidhi Katonda by'alowooza? Naani asobola okuba omuwi w'amagezi y'ali?

³⁵ Naani amughangaku ekirabo, memale amwirizeegho?”

³⁶ Kuba byonabyona n'eyabitonda, n'abibeesaagho, era bibaagho ku lulwe. Agheebwe ekitiisa ebyanda n'ebyanda. Amiina.