Ab'e Roma 10 - Baibuli Ekibono kya Katonda 2014

¹ Aboluganda, omwoyo gwange kye gwenda era kye nsabira Abaisiraeli ye Katonda ni kino nti balokoke.

² Nkakasa nti benda inho okukola Katonda by'ayenda aye okwenda kwaibwe kuziramu kumanha kutuufu.

³ Kuba bwe bataamanha nsambo Katonda y'aghaamu abantu obutuukirivu, baagundhagho ensambo eyaibwe ku bwaibwe, baaloba kujiira ku nsambo Katonda y'aghaamu obutuukirivu.

⁴ Kuba Kurisito n'eyadibya Amateeka, olwo kiisi aikiriza aghange okuba omutuukirivu.

Buli muntu asobola okulokolebwa

⁵ Kino Musa kye yaghandiika ku butuukirivu obujiira ku Mateeka ati: “Kiisi akola ebyo Amateeka bye galagira, aliba mulamu.”

⁶ Ebyaghandiikibwa byogera ku butuukirivu obuva mu kwikiriza biti: “Tokoba mu mwoyo gwo oti naani aliniina mu igulu?” Ekitegeeza okwisa Kurisito ku nsi.

⁷ “Waire okukoba oti naani aliika e magombe?” Ekitegeeza okutoola Kurisito mu bafu.

⁸ Aye ebyaghandiikibwa bikoba biti: “Ekibono kya Katonda kiri kumpi n'iwe, mu kanwa mwo ni mu mwoyo gwo.” Kino n'ekibono eky'okwikiriza kye tubakobera.

⁹ Kuba bw'oyatula n'omunwa gwo oti Yesu ni Musengwa, n'oikiriza mu mwoyo gwo nga Katonda yamuzuukiza, olirokolwa.

¹⁰ Kuba omuntu aikiriza na mwoyo gwe okugheebwa obutuukirivu, era ayatula na munwa gwe okulokoka.

¹¹ Ebyaghandiikibwa bwe bikoba biti: “Kiisi amwikiriza taja kugemwa nsoni”,

¹² tibiboola kuba Abayudaaya n'abamaghanga agandi ghazira ndhawulo. Katonda ni Musengwa waibwe boonaboona era agabira abamusaba ebirungi kamaala

¹³ nga bwe kyaghandiikibwa kiti: “Kiisi asaba Katonda alirokoka.”

¹⁴ Aye balisaba batya oyo ye bataikirizanga? Era baliikiriza batya oyo ye batawulirangaku? Era baliwulira batya nga ghazira muntu abakobeire?

¹⁵ Era balikoberwa batya, nga ghazira batumiibwa? Nga bwe kyaghandiikibwa kiti: “Okwidha kw'abo abaleeta Amawulire Amalungi nga kusangaaza!”

¹⁶ Aye ti boonaboona abaikiriza Amawulire Amalungi, kuba Isaia akoba ati: “Musengwa, naani aikiriza obukwenda bwaife?”

¹⁷ Kale ni okwikiriza kuva mu kuwulira bukwenda, era obukwenda buli mu kukobera abantu ebigema ku Kurisito.

¹⁸ Aye mbuuza: Kituufu tibaawulira bukwenda? Bwenebwene baabuwulira, ng'ebyaghandiikibwa bwe bikoba biti: “Amamiro gaibwe gaatuuka mu nsi yoonayoona. Ebibono byaibwe byawulirwa ensi y'ekoma.”

¹⁹ Kabiri ka mbuuze: Abantu Abaisiraeli tibaamanha? Musa n'asooka okukoba ati: “Ndibaleetera okugemerwa ensaalwa abantu abatali ighanga; ndibaleetera okusungughalira eighanga erizira magezi.”

²⁰ Era ni Isaia akana yaakoba ati: “Abataanoonianga bandhagaana; naabonekera abatandhagalanga.”

²¹ Aye ng'ayogera ku Isiraeli akoba ati: “Olunaku lwonalwona nayandhuluza emikono gyange ku lw'abantu abatawulira era abadheemu.”