Ab'e Roma 1 - Baibuli Ekibono kya Katonda 2014

¹ Ninze Paulo omugheereza wa Yesu Kurisito eyayetebwa okuba omutume. Era eyalondebwa Katonda okukobera abantu Amawulire ge Amalungi,

² ge yasuubiza eira ng'abita mu balanzi mu Byaghandiikibwa ebitukuvu.

³ Amawulire Amalungi gano gafa ku Mwana we, Musengwa waife Yesu Kurisito. Mu mubiri yali wa mu luzi lwa Daudi

⁴ aye mu butukuvu obuva mu Bwakatonda bwe, bwe yazuukizibwa mu bafu, yaboneka ng'ali n'amaani mangi ng'Omwana wa Katonda.

⁵ Ku lw'oyo, Katonda yampa omukisa ogw'okuba omutume olwa Kurisito. Nsobole okutuusa abantu abamaghanga goonagoona ku kwikiriza ni ku kuba abagonvu,

⁶ ng'omwo mw'otwaliire n'imwe Katonda be yayeta okuba aba Yesu Kurisito.

⁷ Kale ni mbaghandiikira imwe mwenamwena ab'e Roma, Katonda b'agonza era be yayeta okuba abantu be. Katonda Iseife ni Musengwa waife Yesu Kurisito abaghe enkabi n'emiraala.

Paulo yeegomba okuja e Roma

⁸ Nga ntoolera, neeyanza Katonda wange ku lwaimwe mwenamwena nga mbita mu Yesu Kurisito, kuba okwikiriza kwaimwe kwogerwaku mu nsi yoonayoona.

⁹ Katonda n'omudhulizi nga bye nkoba bituufu, kuba oyo ye mpeereza n'omwoyo gwange gwonagwona nga nkobera abantu Amawulire Amalungi agagema ku Mwana we. Katonda oyo akiidhi nga buliidho mbaidhukira buli lwe nsaba,

¹⁰ nga mmweghemba bw'aba ng'asiimye, nsobole okwidha okubakyalira.

¹¹ Kuba neegomba inho okubabona, mwena mughange okufunaku ekirabo eky'omwoyo okubagumya.

¹² Kye nkoba ni kino, nti imwe ninze tuganhulirwe ghalala; imwe olw'okwikiriza kwange ate nze olw'okwikiriza kwaimwe.

¹³ Nhenda mukimanhe aboluganda, ng'emikuzi kamaala nga ntegeka okwidha eyo okubabona, aye ghaabangagho ekindobera. Nhenda okufuna abaikiriza okuva mu imwe nga bwendi n'abaikiriza okuva mu bamaghanga agandi.

¹⁴ Nvunaanizibwa abantu boonaboona, abagundhufu n'abatali bagundhufu, abeegerese n'abatali beegerese.

¹⁵ Kale ni mwena ab'e Roma, neegomba inho okubakobera Amawulire Amalungi.

Amaani ag'Amawulire Amalungi

¹⁶ Amawulire Amalungi tigangemya nsoni, kuba n'amaani ga Katonda agalokola buli aikiriza, okusookera ku Bayudaaya memale oizeeku abamaghanga agandi.

¹⁷ Kuba mu Mawulire ago obutuufu bwa Katonda mwe bubonekera. Obutuufu obwo Katonda abutugha lwa kwikiriza, era butoolerera mu kwikiriza bweyongerera mu kwikiriza. Era nga bwekyaghandiikibwa kiti: “Omutuufu anaabanga mulamu lwa kwikiriza.”

Abantu boonaboona baayonoona

¹⁸ Katonda alaga obusungu bwe okuva mu igulu ku bantu abatamutya era abakozi b'ebibi abataganha mazima kuboneka olw'ebikolwa byaibwe ebibi.

¹⁹ Ebyo ebisoboka okumanhibwa ku Katonda babibona bukalamu, kuba Katonda mwene yabibooleka.

²⁰ Kasookanga ensi etondebwa, embeera ye etaboneka, era n'obukumu bwe obutawaagho, n'Obwakatonda bwe, bibonekera irala bukalamu nga bimanhikira mu bintu bye yatonda. Kale bazira kya kuwoza naire.

²¹ Waire baamanha Katonda aye tibaamwisaamu kitiisa nga Katonda, oba okumwebaza. Aye baira mu kulowooza bitagasa n'emyoyo gyaibwe egizira kye giidhi gyaidhula enzikiiza.

²² Bwe beeyeta abagezi baafuuka basiru.

²³ Mu kifo eky'okusinza Katonda atawaagho, basinza ebifaananie eby'abantu obuntu, oba eby'enhonhi, oba eby'ensolo, oba ebyekulula.

²⁴ Kale ni kyova Katonda yabalekera okwegomba okw'emyoyo gyaibwe okukola eby'eiko nga baghemula emibiri gyaibwe beene na beene.

²⁵ Baira mu busubayi mu kifo eky'okugema amazima agagema ku Katonda, baasinza era baagheereza ebitonde, mu kifo eky'okugheereza Omutonzi, asaakibwa ebyanda n'ebyanda. Amiina.

²⁶ Kyova Katonda yabaleka okufugibwanga okwegomba kwaibwe okubi. Abakazi baibwe mu kifo eky'okukozesa emibiri gyaibwe ng'obutonde bwe buli, bagikozesa bindi ebitajiira ku butonde.

²⁷ Mu nsambo n'endala abasaadha baalekayo okwebisa n'abakazi ng'obutonde bwe buli, beegombanga basaadha banaibwe era baadankaananga nabo, era beereetaku ekibonerezo ng'okwonoona kwaibwe bwe kwali.

²⁸ Olw'okuba baaloba okumanha Katonda, kyova Katonda yabaleka ni badankaana mu myoyo, ni bakola ebitasaana.

²⁹ Baidhwire obubi obwa buli nsambo: okukola ebibi, obuluvu, n'eitima. Baidhwire ensaalwa, okutemula abantu, okulwana, obuguya, enge, n'okugeya.

³⁰ Batema ku banaibwe ebibono, bakyagha Katonda, bavumagana, ba lunkulu, beesuuta, bayiiya amagezi ag'okukola ebibi, era batengugha abazaire baibwe.

³¹ Basirusiru, tibeesigwa, tibagonzania era bazira kusaasira.

³² Waire nga baidhi nga eiteeka lya Katonda likoba liti abo abakola ebyo bagwaniire kufa, aye babikola. Ate tibakoma ku kubikola, kyonka aye basiima n'abo ababikola.