Ab'e Kolosai 4 - Baibuli Ekibono kya Katonda 2014

¹ Imwe basengwa b'abairu, mubisenga abairu baimwe bukalamu nga bwe kigwaine, nga mwidhukira nga mwena muli ni Musengwa waimwe mu igulu.

Okugalaga

² Mwekalangulenga mu kusaba, era nga mwisangayo omwoyo ku bye musaba, era nga mweyanza.

³ Ate twena mutusabire, Katonda atusobozese okukobera abantu ekibono kye, tubamanhise ekyama ekiri mu Kurisito ekyansibisa mu ikomera.

⁴ Kale munsabirenga nkyogere nga bwe nteekwa, kitegeerekeke bukalamu.

⁵ Mwegenderezenga nga mukolagana n'abo abakaali kwikiriza Kurisito, kiisi kaghagaanhia ke muba nako mukakozese bukalamu.

⁶ Mu kwogera mukozesenga ebibono ebiwooma era ebigwaine, nga kiisi abuuza mwidhi eky'okumwiramu.

Okusiibula

⁷ Tukiko owoluganda waife omugonzi, omukozi wa Kurisito omwesigwa era mugheereza munaife mu mirimo gya Musengwa, aidha kubakobera byonabyona ebinfaaku.

⁸ Era kyenva ndi kumubatumira abakobere twenatwena bwe tuli, mwiremu emyoyo.

⁹ Ali kwidha ni Onesimo, owoluganda omugonzi era omwesigwa, ate nga era w'eyo ewaimwe. Baidha kubakobera byonabyona ebifa eno.

¹⁰ Arisitaruko musibe munange abalamwisa ni Mariko omwiwa wa Barunaba. Mariko ono ni ye nabakoberaku nti bw'aidhanga ye muli mumusangaaliranga.

¹¹ Owundi abalamwisa ni Yesu abandi ye beeta Yusito. Mu bantu be nkola nabo ku lw'Obwakyabazinga bwa Katonda, abo ni bonka abakekete era bandhizaamu inho amaani.

¹² Epafura, owundi ku abo ab'ewaimwe, ate era omugheereza wa Kurisito Yesu, abalamwisa. Buliidho abasabira n'omwoyo gwe gwonagwona mwekalangule ng'abantu abakulu abeekakasa mu ebyo Katonda by'ayenda.

¹³ Nze mwene nkighaaku obudhulirwa nti akoze inho ku lwaimwe ni ku lw'abantu b'e Laodikea n'e Hierapoli.

¹⁴ Mukagwa waife Luka omuyigha ni Dema babalamwisa.

¹⁵ Muunamukize aboluganda abali e Laodikea, muunamukize Nunfa n'Ekikunsu ky'Abaikiriza mu Kurisito abeesololeza mu ndhu ye.

¹⁶ Embaluwa eno bw'emala okubasomerwa, mubone nga esomerwa n'Ekikunsu ky'Abaikiriza mu Kurisito ekiri e Laodikea. Era mwena musome eyo ab'e Laodikea ye balibagheereza.

¹⁷ Mukobere Arikippo muti: “Oteekwa okumaliriza omulimo gwe wagheebwa mu bugheereza bwa Musengwa.”

¹⁸ Ninze Paulo mpandiise okulamusa kuno n'omukono gwange gwene. Mundidhukirenga mu busibe bwange. Enkabi dha Katonda dhibe n'imwe.