Ab'e Kolosai 3 - Baibuli Ekibono kya Katonda 2014

¹ Oba nga mwazuukizibwa ni Kurisito mudhuube ku bintu ebiri mu igulu, Kurisito y'atyaime ku luuyi lw'omukono omusaadha ogwa Katonda.

² Mulowooze ku bintu ebiri mu igulu, aye ti ku bintu eby'oku nsi.

³ Kuba mwafa era obulamu bwaimwe bwagisibwa ghalala ni Kurisito mu Katonda.

⁴ Kurisito n'obulamu bwaife era bw'aliboneka olwo mwena mulibonekera ghalala naye mu kitiisa.

⁵ Kale mwite okwegomba okubi okuli mu imwe: obwenzi obudankaanu, okwegomba okw'ensoni, okuwugaawugana, obutaiguta, kuba kino kiri ng'oti kusinza ebitali Katonda.

⁶ Kuba olw'ebintu ebyo, obusungu bwa Katonda buli kwidha.

⁷ Eira mwena mwakolanga ebintu oti n'ebyo, era ng'obulamu bwaimwe bubijiiraku inho.

⁸ Aye mperaano muteekwa okulekayo ebintu ebyo byonabyona: obusungu, ekiruyi, enge, okuvuma, era n'okughemula kutabitanga mu kanwa mwaimwe.

⁹ Mutasubaghagananga kuba mwalekayo obulamu obw'eira n'ebikolwa byabwo ebibi.

¹⁰ Mwaira mu bulamu obuyaaka. Buno buja nga bwizibwa buyaaka omutonzi, mughange okumumanhira irala.

¹¹ Olwo ghabe nga tighakaali kuboola oti ono Mugureki, ono Muyudaaya, ono mukekete, ate ono ti mukekete, ono wa ighanga lindi, ono ti mugundhufu, ono mwiru, ate ono ti mwiru. Kurisito n'ali byonabyona era n'ali mu byonabyona.

¹² Kale nga bwe muli abantu ba Katonda be yalondamu era abagonzi, mubenga n'omwoyo ogw'okusaasira, ekisa, obuteekulumbaza, obugonvu n'okuguminkiriza.

¹³ Mutabanga ba ikabyo, buli muntu asonighe mwine bweghabaagho asobiiza. Musonighe oti ni Musengwa bwe yabasonigha.

¹⁴ Ku ebyo muteereku okugonza nga n'okusiba byonabyona aghalala, ni biisania obukalamu.

¹⁵ Era emiraala gya Kurisito Katonda, gye yabeetera okuba aghalala ng'ebitundu eby'omubiri omulala, gifuge emyoyo gyaimwe. Ate era mwoleke okusiima kwaimwe.

¹⁶ Ekibono kya Kurisito n'obukombe bwakyo kibenga mu myoyo gyaimwe. Buli muntu ayegeresenga era agalagirenga mwine mu magezi goonagoona. Mwembenga zabbuli n'enhembo edhisaaka Katonda, n'enhembo edh'omwoyo nga mwoleka okusiima kwaimwe mu myoyo gyaimwe eri Katonda.

¹⁷ Era kiisi kye mukolanga, ka kibe mu bibono oba mu bikolwa, mu kikole mu liina lya Musengwa Yesu, era nga mubita mu oyo okweyanza Katonda Lata nga musiimye.

Bikolwa ebigwaine abali mu bulamu obuyaaka

¹⁸ Abakazi, mugonderenga baibaimwe, kuba abaikiriza mu Musengwa bwe bagwaine okukola.

¹⁹ Abasaadha, mugonzenga bakazi baimwe era ti mubakambughaliranga.

²⁰ Abaana, mugonderenga ababazaala buliidho, kuba ekyo Musengwa ky'asangaalira.

²¹ Abazaire, mutasonsoonianga baana baimwe okubajiirajiiraku n'okubakambughalira, kuba kisobola okubamalamu amaani baabivaaku.

²² Abairu mugonderenga basengwa baimwe ab'oku nsi kuno mu buli kintu. Kino mutakikolanga nga bali kubabona, olw'okwenda okubafunaku obwende. Aye mukikolenga mu mwoyo oguziramu buguya era mu kutya Musengwa.

²³ Kiisi kye mukola mukikole n'omwoyo gwaimwe gwonagwona ng'abakolera Musengwa, ti ng'abakolera abantu,

²⁴ nga mwidhi muti Musengwa n'alibagha empeera, kuba Kurisito ni Musengwa ye mugheereza.

²⁵ Omuntu yeenayeena akola ekibi alisasulwa olw'ekibi kye aghazira kusaliriza.