Ab'e Filippi 4 - Baibuli Ekibono kya Katonda 2014

Okugalaga

¹ Agho ni aboluganda abagonzi era abatanva ku mwoyo, neegomba inho okuba n'imwe aghalala, kuba niimwe eisanhu lyange era niimwe okwenhumiriza kwange. Bakagwa, obwo n'obulamu bwe mube mwekalanguliremu mu Musengwa.

² Ewodia ni Suntuke, mbeeghembye mwisanie mu kuwulira Musengwa.

³ Era weena mukozi munange omwesigwa nkweghemba oyambe abakazi abo, kuba baakola inho ninze mu kusansaania Amawulire Amalungi. Era nga batyo bwe baali ni Kelementi, era ni bakozi banange abandi, beene maina agali mu kitabo kya Katonda eky'obulamu.

⁴ Buliidho musagambirenga mu Musengwa. Era kabiri nkiiramu nti Musagambe!

⁵ Mutabanga baghaaghaavu ya muntu yeenayeena. Musengwa ali kumpi.

⁶ Muteeraliikiriranga olw'ekintu kyonakyona, aye buli lwe musabanga mumanhise Katonda ebyetaago byaimwe byonabyona, era buli kiseera mumusabenga n'emyoyo egisiima.

⁷ Era n'emiraala gya Katonda egiswikiriire okumanha kwonakwona gikuume emyoyo n'amagezi gaimwe mu Kurisito Yesu.

⁸ Ekisembayo, aboluganda, ebidhuubo byaimwe mubite ku bintu ebikalamu era ebigwaine okusaakibwa bino: ebituufu, ebigwaine okugheebwa ekitiisa, ebigwaine okukolebwa, ebitukuvu, ebigonzebwa era ebyegombebwa.

⁹ Era mukolenga ebyo bye nabeegeresa, era ni bye nabagemya mu bibono byange era ni mu bye nakolanga. Era Katonda mwene kugha miraala aidha kubanga n'imwe.

Okusiima

¹⁰ Ndi musangaavu inho mu Musengwa okubona nti olumaliira olw'ekiseera ekireeyi, kabiri mwizeemu okwoleka nga bwe muunumirwa. Ndidhi nti bwene mubaire muunumirwa nga aye muzira bwa kaghagaanhia kakyoleka.

¹¹ Tiri kukoba ntyo lwa kuba ndi mu bwetaavu, kuba kiisi mbeera yoonayoona ye mbaamu, nayega okwenaliza.

¹² Ndidhi okuba omwavu ni ki, era n'okuba omukombe ni ki. Nayega ekyama eky'okwenaliza mu buli kintu era na buli ghantu, ka kube kwiguta oba kulumwa ndhala, kuba na bintu kyodo oba kubula kantu naire.

¹³ Nsobola okugumira byonabyona olw'amaani Kurisito g'ampa.

¹⁴ Aye mwakola bukalamu okundhiruukirira mu bizibu byange.

¹⁵ Era imwe beene ab'e Filippi mukiidhi bukalamu nti bwe nava e Makedonia mu kwinhama okubunia Amawulire Amalungi mu Bikunsu by'Abaikiriza mu Kurisito, ghazira kikunsu kindi kyampa buyambi bwonabwona ni mbufuna, okutoolaku imwe mwenka.

¹⁶ Kuba ni bwe nali mu Thessalonika era mwampeereza obuyambi emikuzi egisinga omulala.

¹⁷ Ekigendererwa kyange ti kya kufuna bwa birabo aye kya kubona ng'ebikalamu bye mukoze byeyongeraku obungi.

¹⁸ Ebintu byonabyona mbifunie mu bwidhuvu, bisingaku ni bye neetaaga. Mperaano buli kintu kye neetaaga ndi nakyo okuva Epafurodito bwe yampa ebyo bye mwantonera nga biri ng'omusengo oguwunhira Katonda akawoowo, gw'asiima era ogumusangaaza.

¹⁹ Era Katonda wange aidha kubagha buli kintu kyonakyona kye mwetaaga, ng'atoola ku bukombe bwe obw'ekitiisa bw'agaba ng'abita mu Kurisito Yesu.

²⁰ Ekitiisa kibenga kya Katonda waife era Lata waife ebyanda n'ebyanda. Amiina.

Okusiibula

²¹ Mulamuse buli mutuukirivu mu Kurisito Yesu. Aboluganda abali ghano ninze babalamwisa.

²² Abatuukirivu boonaboona babalamwisa, okusingira irala abo abali mu kisaagaati kya Kaisari.

²³ Enkabi dha Musengwa Yesu Kurisito dhibe n'imwe.