Ab'e Filippi 3 - Baibuli Ekibono kya Katonda 2014

Okufuna obutuufu kwenekwene

¹ Ekisembayo baganda bange, musagambirenga mu Musengwa. Tifaayo kwiramu kubaghandiikira ku bintu byene ebyo, era muganhulwa bwe nkikola.

² Mwekuume abakozi ab'ebibi abeesala omubiri, edho mbwa dheene.

³ Kuba niife abaafuna okukeketebwa okutuufu, abasinza Katonda nga Mwoyo we bw'atugalagira, abasagambira mu kwisa ekirala mu Kurisito Yesu, era abatata bwesige mu bya mubiri.

⁴ Nze mwene ndi n'ensonga entuufu edhandinteesiiza obwesige mu bikolebwa ku mubiri guno. Oba nga eriyo alowooza okuba n'ensonga edhimuteesa obwesige mu bikolebwa ku mubiri guno, edhange n'edhisinga

⁵ kuba nze nakeketebwa nga naakamala enaku munaana. Ndi Muisiraeli, ndi mu kika kya Benjamini Omuheburayi mwene. Mu kugema amateeka ndi Mufarisaayo.

⁶ Nali nga nhiinkiira okukiriga Ekikunsu ky'Abaikiriza mu Kurisito ate mu butuufu obuva mu kugema amateeka, nga nziraku nsobi.

⁷ Aye oba nga nafunamu eigoba lyonalyona, eigoba eryo buti ndibala nti kwali kufiirwa ku lwa Kurisito.

⁸ Bwenebwene ebintu byonabyona mbibona ng'okufiirwa, olw'omuganhulo ogubisinga einho oguli mu kumanha Kurisito Yesu Musengwa. Ku lulwe naleka ebintu byonabyona, era mbibona ng'ebitagasa olw'okufuna Kurisito ng'empeera yange,

⁹ olwo nsobole okumweyimbiraku irala. Tikaali na butuufu bwange ku bwange obuva mu kugema amateeka. Mperaano ndi n'obutuufu obuva mu kwikiriza Kurisito, obutuufu obuva ye Katonda era obuva mu kwikiriza.

¹⁰ Era nhenda okumumanha amaani ag'okuzuukira kwe, n'okudaazibwadaazibwa nga mwene bwe yadaazibwadaazibwa, era n'okumufaanana mu kufa kwe.

¹¹ Era nga nsuubira zeena okuzuukira mu bafu.

Okwekalangula okutuuka ku kughangula

¹² Tikoba nti naghangula, oba nti namala okutuukirira aye neekalangula okufuna ekyo Kurisito Yesu kye yavaaku okunfuula owuwe.

¹³ Aboluganda, ndidhi nga nkaali kukifuna, aye kye nkola n'okwerabira ebiri einhuma wange naanuyirira ebyo ebindi emberi.

¹⁴ Neekalangula okutuuka ku kigendererwa, nfune ekirabo eky'obulamu obw'omu igulu Katonda kye yandhetera mu Kurisito Yesu.

¹⁵ Twenatwena abakuze mu by'omwoyo tugwaine okuba n'ebidhuubo oti n'ebyo. Aye oba ng'abandi ku imwe muli n'ebidhuubo ebindi, Katonda aja kukibooleka bukalamu.

¹⁶ Aye ekikulu tweyongere okujiira ku nkola ye tubairengaku okutuusa mperaano.

¹⁷ Aboluganda, mukolenga nga nze bwe nkola, era mugenderere abo abajiira ku by'okuboneraku ebituufu bye twabateeragho.

¹⁸ Kuba, nga bwe mbaire ntera okubakoberaku, era ni mperaano ndhiramu okubakobera nga ndira n'amaziga. Ghaligho abantu kamaala abafuuse abazigu ab'okufa kwa Kurisito ku musalaba olw'ensambo ye beebisaamu.

¹⁹ Ekirisembayo eky'abantu abo kuliba kuzikirira, kuba katonda ye basinza, n'enda dhaibwe. Beesaaka olw'ebyo ebyandibaswaziiza era balowooza bya ku nsi kuno byonka.

²⁰ Aye ife obutaka bwaife buli mu igulu, era tulindirira nga twesunga Omulokozi alivaayo, Musengwa Yesu Kurisito.

²¹ Ono n'alikyusa emibiri gyaife eminafu era egifa n'agifuula ng'oti n'ogugwe ogw'ekitiisa, ng'akozesa amaani agamusobozesa okuta ebintu byonabyona mu bufuzi bwe.