Ab'e Filippi 2 - Baibuli Ekibono kya Katonda 2014

Okwefeebya kwa Kurisito n'okugheebwa ekitiisa

¹ Okuba mu Kurisito kibagumya? Okugonza kwe kubagha amaani? Mwisa ekirala ni Mwoyo wa Kurisito? Buli muntu agemerwa mwine ekisa era yaamusaasira?

² Agho ni mwidhuulirize irala eisanhu lyange nga mulowooza bulala, nga mugonzania bulala, era mube muntu mulala mu mwoyo ni mubigendererwa.

³ Timukolanga kintu kyonakyona nga mwefaaku mwenka oba olw'okwenda bababone babasaake. Aye mu kwefeebya buli muntu atwale abandi nga n'abamusinga.

⁴ Omuntu tagwaine kukola ku byetaago bibye byonka, aye agwaine akole ni ku by'abandi.

⁵ Mube n'omwoyo ng'oti ni Kurisito Yesu gwe yali nagwo:

⁶ “Mu nkula ye yoonayoona yali Katonda, aye tiyakitwala ng'ateekwa okwekakadika ku kwagayaga ni Katonda.

⁷ Mu kifo ky'ekyo, mwene yeetoolaku ekitiisa kye kyonakyona kyeyendere, yaafuuka mugheereza. yaazaalibwa ng'omuntu, yaaba mu kifaananie eky'omuntu.

⁸ Ng'amaze okufuuka omuntu, yeefeebya era yaaba muwulize okutuuka ku kufa, ate okufiira ku musalaba.

⁹ Katonda kyeyava n'amugha ekitiisa ekya ghaigulu, era n'amugha eriina erisinga amaina goonagoona.

¹⁰ Olwo kiisi kiri mu igulu, ni mu nsi, ni mu itaka, kikubire eriina lya Yesu amakiryaivu.

¹¹ Era kiisi lulimi lwatule luti: Yesu Kurisito ni Musengwa. Olwo Katonda era Lata agheebwe ekitiisa.”

Okwaka mu nsi oti mataala

¹² Agho ni bakagwa, nga bwe mwali abawulize buliidho nga ndi n'imwe, ni mperaano nga tiri n'imwe musingegho okuba abawulize, olwo mube nga mukolerera okulokolebwa kwaimwe nga mutya era nga mudhugumira.

¹³ Kuba Katonda n'akolera mu imwe memale mwaganha era mwasobola okukola by'ayenda.

¹⁴ Buli kye mukola mukikole nga timutolooma oba okutakana,

¹⁵ olwo mubuleku omusango oba ekintu kyonakyona ekiboogezaaku obubi. Mube abaana ba Katonda abatuukiriire nga muli mu bantu ab'oluse luno ababi era abaayonooneka. Mubaakiremu ng'oti mataala mu nsi muno.

¹⁶ Mukalangule ekibono eky'obulamu memale ku lunaku lwa Kurisito nsobole okwenhumiriza nti amaani n'okufaabiikana kwange tibyafa busa.

¹⁷ Omusaayi gwange ni bwe guyuyibwa ni gutabulwa n'omusengo gwe mughaayo olw'okwikiriza kwaimwe, nsangaala era nsagambira ghalala n'imwe mwenamwena.

¹⁸ Mu nsambo n'endala, mwena mugwaine okusangaala n'okusagambira aghalala ninze.

Timotheo ni Epafurodito

¹⁹ Musengwa Yesu bw'aliba ng'ayenze, ndhuuba okutuma Timotheo aidhe ye muli mangu ankobere ebibafaaku, omwoyo guntereere.

²⁰ Oyo ni yenka ali n'omwoyo ng'ogwange, abalumirwa mu buli nsambo.

²¹ Abandi bafa ku byaibwe byonka, tibafa ku bya Yesu Kurisito.

²² Aye omugaso gwa Timotheo mugwidhi bukalamu, mwidhi bwe tubairenga nga tusansaania naye Amawulire Amalungi, ng'oti n'omwana n'ise bwe bandikoze.

²³ Kale kyenva ndi kusuubira okumutuma amangu, nga mmaze okumanha bino bwe binanjiira.

²⁴ Era nga neesiga Musengwa nsuubira nti zeena mwene ndidha kwidha mu ntangama etali ya ghala.

²⁵ Nkiboine nga kyetaagisa okutuma Epafurodito ye muli, muganda wange, mukozi munange era mulwani munange, ye mwampeereza okuunhambangaku mu byetaago byange.

²⁶ Kuba omwoyo gubaire gumuluma inho okubabonaku mwenamwena, era abairenga n'enaku ku mwoyo olw'okuba mwawulira bwe yalwala.

²⁷ Bwenebwene yalwalira irala na kumpi kufa. Aye Katonda yamusaasira ate tiyasaasira mwene yenka aye ninze, kuba enaku yange yandyeyongeireku.

²⁸ Kye nviire ni nhenda einho okumutuma ye muli musobole kabiri okusangaala olw'okumubonaku, ate zeena enaku yange ekendeere.

²⁹ Kale mumusangaalire inho ng'owoluganda mu Musengwa. Era abantu abali ng'oti n'oyo mubatengamu ekinhagansi,

³⁰ kuba yeeghaayo olw'omulimo gwa Kurisito, era kata afe ng'ali kugezaaku okutuukiriza ekyo kye mwamuntumira.