Ab'e Filippi 1 - Baibuli Ekibono kya Katonda 2014

¹ Ninze Paulo ni Timotheo abagheereza ba Kurisito Yesu. Tughandiikiire abatuukirivu boonaboona abaisa ekirala mu Kurisito Yesu abali e Filippi, n'abalabirizi n'abagheereza.

² Katonda Lata waife ni Musengwa Yesu Kurisito abaghe enkabi n'emiraala.

Nsiima era mbasabira

³ Nsiima Katonda wange kiisi lwe mbadhuuba.

⁴ Kiisi lwe mba nga mbasabira mwenamwena, nsaba nga ndi musangaavu

⁵ olw'ensambo ye mumbeeraku mu kukobera abantu Amawulire Amalungi, okuviira irala ku lunaku lwe natoolera, okutuusa ni ye buli eno.

⁶ Era nkakasa bukalamu ng'oyo eyatoolera omulimo guno omukalamu mu imwe aligutuusa ku kumalirizibwa ku lunaku lwa Yesu Kurisito.

⁷ Ndi mutuufu okubalowoozaaku ntyo mwenamwena kuba mundi ku mwoyo, ate era kuba mugabanira ghalala ninze ku kisa kya Katonda, ka kibe mu busibe bwange mu ikomera, oba mu kulwanirira n'okukakasa Amawulire Amalungi.

⁸ Katonda n'omudhulirwa wange akakasa nga bwe mbalumirwa omwoyo mwenamwena mu kugonza kwa Kurisito Yesu.

⁹ Era mbasabira okugonza kwaimwe kuje nga kweyongera, era mube n'amagezi n'okumanha kwonakwona.

¹⁰ Olwo mube nga musobola okulondagho ekyo ekisinga bukalamu, mube abaamufu era abaziraku musango ku lunaku lwa Kurisito.

¹¹ Obulamu bwaimwe bwidhule ebikolwa ebikalamu ebiidha nga bibita mu Yesu Kurisito olw'okugheesa Katonda ekitiisa n'olw'okumusaaka.

Mu kukolera Kurisito n'omuli obulamu

¹² Aboluganda, nhenda mumanhe ng'ebyo ebintuuseeku byongeire okuyamba Amawulire Amalungi okusansaana.

¹³ Kuba abaisirukale boonaboona ab'omu kisaagaati n'abandi boonaboona, kibaleeteire okumanha ng'okusibwa kwange baananga Kurisito.

¹⁴ Era aboluganda kamaala bongeire okwekakasa mu Katonda olw'okusibwa kwange, era beeyongera okuguma okwogera ekibono kya Musengwa nga tibatya.

¹⁵ Mu butuufu ghaligho abakobera abantu ebigema ku Kurisito olw'ensaalwa n'okwenda okusinganwa ninze, aye abandi bakikola mu mwoyo mukalamu.

¹⁶ Bano babikola mu kugonza nga baidhi nga nateebwa ghano lwa kulwanirira Amawulire Amalungi.

¹⁷ Aye bale ab'ensaalwa bakobera abantu ebigema ku Kurisito mu buguya, olw'ebyo bye bafunamu beene nga badhuuba bati baidha kwongera okuunumya mu busibe bwe ndimu.

¹⁸ Aye ekyo tikiinumya! Ndi musangaavu kuba abantu bakoberwa ebigema ku Kurisito mu nsambo yoonayoona ebaagho, k'ebe mu buguya oba mu butuufu.

¹⁹ Era ndidha kuja mu maiso n'okuba omusangaavu, kuba ndidhi nga olw'okusaba kwaimwe n'olw'okuyambibwa kwa Mwoyo wa Yesu Kurisito ndidha kulekulwa.

²⁰ Kye nandyenze einho era kye nsuubira n'ekyo nti ndobe kuswala naire, aye mpeesenga Kurisito ekitiisa mu bulamu bwange nga ndi mugumu inho, mperaano ni buliidho, ni bwe mba omulamu, oba ni bwe nfa.

²¹ Ku lwange, obulamu ni Kurisito, ate okufa gaba magoba.

²² Aye oba nga okuba n'obulamu mu mubiri kitegeeza kwongera kukola mirimo giganhula, agho timanha bukalamu kya kulondaku.

²³ Endhuyi dhombi dhimpaluza. Aye nga kye nhenda einho, n'okuva mu bulamu buno nje mbe ni Kurisito, kuba ekyo n'ekisingira irala bukalamu.

²⁴ Aye okusigala mu mubiri n'ekisinga kuganhula ye imwe.

²⁵ Nga nkakasa nti kino kityo bwekiri, ndidhi nti ndidha kusigala n'imwe mu mubiri mughange okusangaala n'okuja mu maiso mu kwikiriza Kurisito.

²⁶ Bwe ndiba nga ndi n'imwe kabiri, mulighanga okwenhumiriza mu Kurisito Yesu ku lwange.

²⁷ Ekikulu kiri nti mu bulamu bwaimwe mwebise nga bwe kigwaniire ababunia Amawulire Amalungi aga Kurisito. Agho ni oba ndidha okubabona oba tiidha, mbe nga mpulira nti mwekalangwire, muli muntu mulala, era nga kye munuyirira kiri kirala okulwanirira okwikiriza Amawulire Amalungi

²⁸ aghazira kutiisibwa bazigu baimwe mu nsambo yoonayoona. Kano n'akamanhiso ka Katonda akabooleka nga baja kuzikirizibwa, ate akooleka imwe nga muja kulokolebwa.

²⁹ Kuba mwagheebwa enkabi okwikiriza Kurisito era n'okudaagadaaga ku lulwe.

³⁰ Mwena mube ku lutalo n'olulala nga lwe mwambona nga nwana, era lwe muwulira nga nkaaluliku.