Ab'Efeso 5 - Baibuli Ekibono kya Katonda 2014

Okuba mu butangaavu

¹ Agho ni, nga bwe muli abaana ba Katonda abagonzi, mugezengaku okumufaanana mu bikolwa.

² Era mugonzanienga nga Kurisito bwe yatugonza ni yeeghaayo ye Katonda ku lwaife ng'ekigheebwayo era ng'omusengo oguwunha akawoowo.

³ Ng'abatuukirivu bwe bandibaire, bino tibigwaine na kwogerebwa mu imwe: okwenda, obudankaanu, n'okwegomba okubi.

⁴ Era timugwaine kwogera bya buwemu, oba bya busiru, oba ebitabisika mu kanwa, aye mweyanzenga Katonda.

⁵ Mumanhire irala kino muti omwenzi, omudankaanu, oba ali n'okwegomba okubi, azira mugabo mu Bwakyabazinga bwa Kurisito era obwa Katonda; kuba okwegomba okubi kwona kuba kusinza bitali Katonda.

⁶ Batabaguyanga na bibono biziramu, kuba byene ebyo n'ebireetera obusungu bwa Katonda okwidha ku batamuwulira.

⁷ Agho ni muteeyimbanga nabo naire

⁸ kuba eira mwali mu nzikiiza, aye okuva lwe muli bantu ba Musengwa, muli ba butangaavu. Kale mutambule ng'abantu abali mu butangaavu,

⁹ omuva ebirungi byonabyona, obutuufu n'amazima.

¹⁰ Mufubenga okumanha ekisangaaza Musengwa.

¹¹ Muteeyimbanga mu kukola bintu bya mu nzikiiza ebiziramu nsa abantu bye bakola, aye mubyatuukirizenga.

¹² Kuba ebyo bye bakola mu ngiso bigemya ensoni n'okubyogeraku.

¹³ Aye ekintu kyonakyona bwe kireetebwa mu butangaavu, kibonekera irala nga bwekiri, kuba ekyo kyonakyona ekiboneka kiba kiri mu butangaavu.

¹⁴ Kyebava bakoba bati: “Zuuka iwe atendwike, zuukira ove mu bafu, Kurisito aidha kukwakira.”

¹⁵ Kale mwegendereze bwe mwebisa mulobe kuba ng'abazira magezi aye mube ng'abagezi.

¹⁶ Buli kaseera ke muli nako mukakozese bukalamu, kuba enaku dhino mbi.

¹⁷ Kale mutabanga basiru aye mumanhenga Musengwa ky'ayenda mukole.

¹⁸ Mutairanga mu kutamiira mwenge ogwidha okubaitaitana, aye mwidhule Mwoyo Mutukuvu.

¹⁹ Mu kughaya mukozesenga Zabbuli, n'enhembo, edhisaaka Katonda, nga mwembera Musengwa n'omwoyo mulala.

²⁰ Buliidho mweyanzenga Katonda Iseife olwa byonabyona, nga mubita mu Musengwa waife Yesu Kurisito.

Abakazi ni baibaibwe

²¹ Buli muntu awulirenga mwine olw'okwisaamu Kurisito ekitiisa.

²² Abakazi muwulirenga baibaimwe ng'oti ni bwe muwulira Musengwa,

²³ kuba omusaadha n'omutwe gwa mukazi we, nga Kurisito bw'ali omutwe ogw'ekikunsu eky'abamwikiriza ekyo n'omubiri gwe, era mwene oyo n'Omulokozi waakyo.

²⁴ Ng'Ekikunsu eky'Abaikiriza mu Kurisito bwe kiwulira Kurisito, n'abakazi bwe bagwaine okuwuliranga baibaibwe mu byonabyona.

²⁵ Imwe abasaadha mugonzenga bakazi baimwe, nga Kurisito bwe yagonza Ekikunsu eky'Abaikiriza mu Kurisito ni yeeghaayo ku lwa kyo.

²⁶ Yaakitukuza ng'akinaaza n'amaadhi n'ekibono,

²⁷ olwo yeefunira Ekikunsu ky'Abaikiriza mu Kurisito eky'ekitiisa ekiri ng'omuntu aziraku kamyamya na nkokyo waire ekintu ekindi ekiri ng'oti n'ebyo, aye ekitukuvu era ekiziraku kikibulaku.

²⁸ N'abasaadha batyo bwe bagwaniire okugonza bakazi baibwe, nga bwe bagonza emibiri gyaibwe. Omusaadha agonza mukazi we aba yeegonza mwene.

²⁹ Kuba ghazira muntu akyagha mubiri gwe, aye aguliisa, agulabirira, nga Kurisito bw'alabirira Ekikunsu eky'Abaikiriza mu Kurisito,

³⁰ kuba tuli bitundu bya mubiri gwe.

³¹ Ng'ebyaghandiikibwa bwe bikoba biti: “Omusaadha ky'anaavanga aleka ise n'inhina n'ayimbibwa ni mukazi we, bombi ni bafuuka muntu mulala.”

³² Ekyama kino kikulu, era nze nkoba nti kyogera ku Kurisito n'Ekikunsu eky'Abaikiriza mu Kurisito.

³³ Aye n'imwe mwena, buli musaadha agonzenga mukazi we, nga bwe yeegonza mwene, era n'omukazi atenga mu iba ekinhagansi.