Ab'Efeso 1 - Baibuli Ekibono kya Katonda 2014

¹ Ninze Paulo omutume wa Kurisito Yesu eyafuuka omutume olw'okwenda kwa Katonda. Mpandiikira abatuukirivu boonaboona abali mu Efeso, abaikiriza mu Kurisito Yesu.

² Katonda Iseife ni Musengwa Yesu Kurisito abaghe enkabi n'emiraala.

Emikisa mu Kurisito

³ Katonda era Lata wa Musengwa waife Yesu Kurisito, eyatugha mu Kurisito kiisi mukisa gwa Mwoyo oguva mu igulu, agheebwe ekitiisa.

⁴ Katonda ng'abita mu Kurisito, yali yamala ira okutulonda nga n'ensi ekaali kutondebwa, tube batuukirivu abaziraku musango mu maiso ge.

⁵ Olw'okutugonza, yatufuula baana be ng'abita mu Yesu Kurisito, nga bwe yakitutondera mu kusiima kwe.

⁶ Olwo tumusaake olw'okutwoleka ekisa mu kitiisa kye, kye yatugheera mu Mwana we omugonzi ng'ekirabo.

⁷ Olw'okufa kwa Kurisito ng'omusengo, tufuna okununulwa nga tusoniyibwa ebibi byaife olw'ekisa kya Katonda ekyodo,

⁸ kye yatugemerwa. Katonda mu magezi ge goonagoona ni mu kumanha kwe,

⁹ yatumanhisa ekyama eky'ebyo bye yayenda, bye yali yategeka eira okutuukiririza mu Kurisito.

¹⁰ Entegeka eyo aligituukiriza ng'ekiseera kyayo kituuse, ng'ayimba ghalala mu Kurisito ebintu byonabyona ebiri mu igulu n'ebiri mu nsi.

¹¹ Katonda akola byonabyona nga bw'ayenda ng'ajiira ku ntegeka ye, mu Kurisito oyo

¹² mwe yatulondera. Ife abaasooka okuba n'eisuubi mu Kurisito, tubeegho nga tusaaka ekitiisa kya Katonda.

¹³ Era mu Kurisito oyo, n'imwe mwena abaawulira ekibono eky'amazima eky'Amawulire Amalungi ag'okulokolebwa kwaimwe era ni mwikiriza Kurisito, Katonda yabasibaku akamanhiso ng'abagha Mwoyo Mutukuvu ye yasuubiza.

¹⁴ Mwoyo Mutukuvu oyo n'omusingo okukakasa nga tulifuna ebyo Katonda bye yatusuubiza, tusaake ekitiisa kye.

Paulo asaba Katonda

¹⁵ Olw'ebyo, zeena okuva bwe nawulira nga bwe mwikiriza Musengwa Yesu, era nga bwe mugonza abatuukirivu boonaboona,

¹⁶ tirekeranga kweyanza Katonda ku lwaimwe. Mbaidhukira, naabasabira,

¹⁷ Katonda wa Musengwa waife Yesu Kurisito, Lata ow'ekitiisa, abaghe Mwoyo ow'amagezi era ayoleka, mumumanhe.

¹⁸ Abazibule amaiso ag'omwoyo mubone ebyo bye yasuubiza bwe yabeeta, mumanhe obukombe obuli mu ebyo eby'ekitiisa by'abiikira abatuukirivu.

¹⁹ Era mumanhe amaani ge agataloodheka agakolera mu ife abaikiriza. Amaani ago

²⁰ n'ago geene agaazuukiza Kurisito, ni gamutyamya mu igulu ku mukono omusaadha ogwa Katonda,

²¹ n'afuga obufuzi, n'obukumu, n'amaani eby'omu ibbanga. Era mumanhe ng'ali n'ekitiisa ekisinga ebitiisa byonabyona, ti mu byanda bino byonka aye ni mu biriiragho.

²² Katonda yata ebintu byonabyona mu bufuzi bwa Kurisito, yaamufuula omutwe ogw'ekikunsu eky'abamwikiriza mu byonabyona.

²³ Ekikunsu ekyo n'omubiri gwa Kurisito. Kurisito oyo n'akifuula ekiramba, oyo afuula byonabyona ebiramba buli ghantu woonawoona.