Abalevi 9 - Baibuli Ekibono kya Katonda 2014

Aaroni aghaayo Emisengo

¹ Ku lunaku olwairaku ng'emikolo egy'okwawulibwa giwoire, Musa yaayeta Aaroni ni batabane be, n'abakulembeze mu Isiraeli,

² yaakoba Aaroni ati: “Twala ente enume ento, n'entaama enume, dhombi nga dhiziraku kikyamu kyonakyona, oje odhigheeyo eri Musengwa Katonda ente eyo enume ebe ekigheebwayo olw'ebibi, n'entaama eyo enume ebe ekigheebwayo ekyokebwa.

³ Era okobe Abaisiraeli batwale embuzi enume, ebe ekigheebwayo olw'ebibi, n'ente ento ey'omwaka omulala, n'entaama ento ey'omwaka omulala, dhombi nga dhiziraku kikyamu kyonakyona, dhibe ekigheebwayo ekyokebwa,

⁴ n'ente era n'entaama, nga dhombi nume, dhibe ekigheebwayo olw'okutabagana. Bino bali n'okubighaayo ng'omusengo mu maiso ga Musengwa Katonda, aghalala n'ekigheebwayo eky'emere ey'empeke ekitabwirwamu omuzigo. Bali n'okukola batyo, kuba Musengwa Katonda aidha kubabonekera olwaleero.”

⁵ Ebyo byonabyona Musa bye yalagira, baabireeta emberi w'Eweema ey'Okwagaananirangamu ni Musengwa Katonda. Abaisiraeli boonaboona baaseeta, baayemerera mu maiso ga Musengwa Katonda.

⁶ Musa yaakoba ati: “Musengwa Katonda abalagiire okukola kino, memale ekitiisa kye ekimesunkana kibabonekere.”

⁷ Agho yaakoba Aaroni ati: “Ja kumpi n'alutaari, ogheeyo ekigheebwayo olw'ebibi, ogheeyo omusengo olw'ebibi byo n'olw'ebibi eby'abantu. Ghaayo ekigheebwayo eky'abantu, era ogheeyo omusengo olw'ebibi byaibwe, nga Musengwa Katonda bweyalagira.”

⁸ Agho Aaroni yaaja kumpi n'alutaari, yaita ente enume ento, nga n'ekigheebwayo olw'ebibi ebibye.

⁹ Batabane be baamuleetera omusaayi gw'ente eyo, yainhikamu olwala, yaagutoonhia ku bintu ebiri ng'oti mayiga ga nsolo ebiri ku alutaari ogwasigalagho yaagufuka ku ntobo y'alutaari eyo.

¹⁰ Ate amasavu n'ensigo, n'ekitundu ekisinga obulungi ku ini, yaabyokera ku alutaari, nga Musengwa Katonda bweyalagira Musa.

¹¹ Aye emamba n'oluwu, yaabyokera kuliya kw'ekifo abantu kye baasimbamu weema dhaibwe.

¹² Era yaita ensolo ey'ekigheebwayo ekyokebwa. Batabane be baamuleetera omusaayi, yaagumansira ku ndhuyi dhoonadhoona edh'alutaari.

¹³ Baamuleetera omutwe n'ebitundu ebindi eby'ensolo eyo, yaabyokera ku alutaari.

¹⁴ Era yaanaaza ebyenda n'ebibbonge, yaabyokera ku alutaari n'ebitundu ebindi eby'ekigheebwayo ekyokebwa.

¹⁵ Aaroni bweyamala ebyo, yaaleeta ekigheebwayo eky'abantu: yaatoola embuzi ey'ekigheebwayo olw'ebibi, yaagiita era yaagighaayo olw'ebibi by'abantu ng'oti ni bweyakola ng'aghaayo olw'ebibi bye.

¹⁶ Era yaaleeta ensolo ey'ekigheebwayo ekyokebwa, yaagighaayo ng'ajiira ku mateeka bwe gakoba.

¹⁷ Yaaleeta ekigheebwayo eky'emere ey'empeke, yaayoolaku omuganda gw'obuwunga, yaabwokera ku alutaari ng'ayongereza ku kigheebwayo ekyokebwa ekya buli lunaku.

¹⁸ Era yaita ente enume n'entaama enume ku lw'abantu, ng'omusengo ogugheebwayo olw'okutabagana. Batabane be baamuleetera omusaayi, yaagumansira ku ndhuyi dhoonadhoona edh'alutaari.

¹⁹ Aaroni yaatoola amasavu goonagoona, n'ensigo, n'ebitundu ebisinga obulungi eby'ente eyo n'entaama eyo,

²⁰ yaabita ku bifuba eby'ensolo edho, byonabyona yaabitwala ku alutaari. Amasavu yaagookera ku alutaari.

²¹ Aye ebifuba n'ebisambi eby'oku mukono omusaadha eby'ensolo edho, yaabighaayo eri Musengwa Katonda ng'abiwuuba, byaba ekigheebwayo mu maiso ga Musengwa Katonda nga kiwuubibwa ebintu ebyo biba bya bakabona, nga Musa bweyalagira.

²² Aaroni bweyamala okughaayo emisengo egyo, ekigheebwayo olw'ebibi, n'ekigheebwayo ekyokebwa, n'ekigheebwayo olw'okutabagana, yaagololera emikono eri abantu, yaabasabira enkabi. Yaika ghansi ng'ava aghaali ekigheebwayo ekyo.

²³ Musa ni Aaroni baingira mu Weema ey'Okwagaananirangamu ni Musengwa Katonda. Bwe baafuluma, baasabira abantu enkabi, era ekitiisa kya Musengwa Katonda ekimesunkana kyabonekera abantu boonaboona.

²⁴ Amangu ago Musengwa Katonda yaasindika omuliro, gwayokya ekigheebwayo ekyokebwa era n'amasavu ku alutaari. Abantu bwe baagubona, boonaboona baawowoigana, baakutama n'ebyeni byatuuka ku itaka.