Abalevi 8 - Baibuli Ekibono kya Katonda 2014

Okwawula Aaroni ni batabane be ku bwakabona

¹ Musengwa Katonda yaalagira Musa ati:

² “Twala Aaroni ni batabane be, otwale n'ebivaalo, n'omuzigo ogusiigibwa, n'ente ey'ekigheebwayo olw'ebibi, n'entaama enume eibiri, n'ekiibo ekirimu emigaati egitazimbulukusiibwa.

³ Memale oyete abantu boonaboona baidhe ku mulyango gw'Eweema ey'Okwagaananirangamu ni Musengwa Katonda.”

⁴ Agho Musa yaakola nga Musengwa Katonda bweyamulagira. Abantu beesololeza ku mulyango gwa Weema eyo,

⁵ yaabakoba ati: “Kino Musengwa Katonda ky'andagiire okukola.”

⁶ Agho yaaleeta Aaroni ni batabane be, yaakola omukolo ogw'okubanaaza n'amaadhi.

⁷ Yaavaaza Aaroni esaati n'ekanzu, yaamusiba olukoma mu nkende, yaamuvaaza n'ekivaalo eky'obwakabona, yaakisiba n'olusibiro lwakyo olwalukibwa obukalamu, yaakimunhweza mu nkende.

⁸ Yaamuvaaza ekivaalo eky'omu kifuba, yaakitaamu ebintu ebyetebwa Urimu ni Thummimu.

⁹ Yaamusiba ekitambaala ku mutwe, era agho mu maiso gaakyo yaakisibaku akapande aka zaabu, ng'eyo n'engule entukuvu, nga Musengwa Katonda bweyamulagira.

¹⁰ Agho Musa yaatoola omuzigo ogusiigiibwa, yagusiiga ku Weema ey'Okwagaananirangamu ni Musengwa Katonda, era ni ku bintu byonabyona ebigirimu, olwo yaabitukuza okubyawula bibe ebya Musengwa Katonda.

¹¹ Yaatoola ku muzigo, yaagumansira emikuzi musanvu ku alutaari ni ku bintu byonabyona ebikozesebwa ku alutaari, ni ku benseni ni ku kityamo kyayo, yaabitukuza okubyawula bibe ebya Musengwa Katonda.

¹² Yaasiiga Aaroni omuzigo ku mutwe okumwawula.

¹³ Agho Musa yaaleeta batabane ba Aaroni, yaabavaaza amasaati, yaabasiba enkoma mu nkende, era n'ebitambaala ku mitwe, nga Musengwa bweyamulagira.

¹⁴ Agho Musa yaaleeta ente egheebwayo olw'ebibi, Aaroni ni batabane be baata emikono gyaibwe ku mutwe gwayo.

¹⁵ Musa oyo yaagiita, era yaatoolaku omusaayi ogundi yaagusiigisa olwala lwe ku bintu ebiri ng'oti mayiga ga nsolo ebiri ku alutaari ku ndhuyi dhaayo dhoonadhoona okugyawulira Musengwa Katonda. Omusaayi ogwasigalagho gwonagwona, yaagufuka ku ntobo y'alutaari. Mu nsambo eyo yaagyawula ebe eya Musengwa Katonda era yaaghaayo omusengo olw'okugitukuza.

¹⁶ Musa yaatoola amasavu goonagoona agaali ku byenda, n'ekitundu ekisinga obulungi ku ini, n'ensigo dhombi ghalala n'amasavu agaadhiriku, yaabyokera byonabyona ku alutaari.

¹⁷ Ebyasigalagho byonabyona ku nte eyo: oluwu, emamba, n'obusa, yaabyokya omuliro mu kifo aghazira weema dha bantu, nga Musengwa Katonda bweyamulagira.

¹⁸ Agho Musa yaaleeta entaama enume ey'ekigheebwayo ekyokebwa. Aaroni ni batabane be, baata emikono gyaibwe ku mutwe gwayo.

¹⁹ Musa oyo yaagiita era yaamansira omusaayi ku ndhuyi dhoonadhoona edh'alutaari.

²⁰ Bwe yamala okugitematemamu, yaagyokera ku alutaari ghalala n'omutwe n'amasavu.

²¹ Era bweyamala okunaaza ebyenda n'ebibbonge, yaabyokera ku alutaari ghalala n'ebitundu ebyasigalagho, nga Musengwa Katonda bweyamulagira ekyo nga n'ekigheebwayo eri Musengwa Katonda ekyokebwa, ekiri n'akawoowo akamusangaaza.

²² Agho Musa yaaleeta entaama enume eyokubiri, ey'okwawulibwa kwa bakabona. Aaroni ni batabane be baata emikono gyaibwe ku mutwe gwayo.

²³ Musa oyo yaagiita, yaatoolaku omusaayi ogundi yaagusiiga ku ntobo ya kutu wa Aaroni ow'oku mukono omusaadha, ni ku kyala kye ekisaadha eky'oku mukono omusaadha, ni ku kigere kye ekisaadha eky'oku mukono omusaadha.

²⁴ Agho Musa yaaleeta batabane ba Aaroni, yaasiiga ogundi ku musaayi ku ntobo ya kutu waibwe ow'oku mukono omusaadha, ni ku byala byaibwe ebisaadha eby'oku mukono omusaadha, ni ku bigere byaibwe ebisaadha eby'oku mukono omusaadha. Omusaayi ogwasigalagho yaagumansira ku ndhuyi dhoonadhoona edh'alutaari.

²⁵ Yaatoola amasavu, omukira omusavu, amasavu goonagoona ag'oku byenda, ekitundu ekisinga obulungi ku ini, ensigo dhombi ghalala n'amasavu agadhiriku, n'ekisambi eky'oku mukono omusaadha.

²⁶ Era yaatoola n'omugaati mulala mu kiibo ekirimu emigaati eminene egitazimbulukusiibwa egigheereibwayo eri Musengwa Katonda, n'omugaati mulala ogutabwirwamu omuzigo, n'omugaati omutono mulala, yaagita ku masavu ni ku kisambi eky'oku mukono omusaadha.

²⁷ Ebyo byonabyona yaabigemya Aaroni ni batabane be, era bano baabiwuuba, byaba ekigheebwayo eri Musengwa Katonda nga kiwuubibwa.

²⁸ Agho Musa yaabitoola mu ngalo dhaibwe, yaabyokera ku kigheebwayo ekyokebwa, ekyagheebwayo olw'okwawulibwa kwaibwe. Akawoowo kaakyo kasangaaza Musengwa Katonda.

²⁹ Agho Musa yaagema akafumito, yaakawuuba, kaaba ekigheebwayo eri Musengwa Katonda nga kiwuubibwa. Ogwo n'ogwali omugabo gwa Musa ku ntaama eyagheebwayo olw'okwawulibwa kwaibwe, nga Musengwa Katonda bweyamulagira.

³⁰ Musa yaatoola ku muzigo ogusiigibwa, ni ku musaayi ogwali ku alutaari, yaagumansira ku Aaroni ni ku bivaalo bye, era ni ku batabane be, ni ku bivaalo byaibwe. Mu nsambo eyo yaayawula Aaroni ni batabane be baaba ba Musengwa Katonda, ghalala n'ebivaalo byaibwe.

³¹ Musa yaakoba Aaroni ni batabane be ati: “Mutwale emamba ku mulyango gw'Eweema ey'Okwagaananirangamu ni Musengwa Katonda, mugifumbe era mugiriire eyo, n'emigaati egiri mu kiibo eky'ebigheebwayo olw'okwawulibwa, nga Musengwa Katonda bweyabalagira okugiryanga.

³² Era ekisigalagho ku mamba ni ku migaati, mukyokye bwokye.

³³ Mutava ku mulyango gwa Weema ey'Okwagaananirangamu ni Musengwa Katonda, okumala enaku musanvu, okutuusa emikolo egy'okwawulibwa kwaimwe lwe girimalirizibwa.

³⁴ Musengwa Katonda n'eyatulagira okukola ebyo bye tukoze olwaleero, olw'okutoolagho ebibi byaimwe.

³⁵ Muteekwa okusigala ku mulyango gw'Eweema ey'Okwagaananirangamu ni Musengwa Katonda, okumala enaku musanvu, okutuukiriza ekiragiro kya Musengwa Katonda, memale mulobe kufa, kuba atyo Musengwa Katonda bweyandagira.”

³⁶ Kale, Aaroni ni batabane be baakola byonabyona Musengwa Katonda bye yalagira ng'abita mu Musa.