Abalevi 7 - Baibuli Ekibono kya Katonda 2014

Ekigheebwayo olw'okusasula

¹ “Gano n'amateeka aganaafuganga ekigheebwayo ng'omutango. Kiba kitukuvu inho.

² Ensolo ey'ekigheebwayo kino enaitirwanga ku luuyi olw'omukono omugooda ng'olingiriire e buvandhuba, agho ghe baitira ensolo edhigheebwayo okwokebwa. Era omusaayi gwayo gunaamansirwanga ku ndhuyi dhoonadhoona edh'alutaari.

³ Amasavu gaayo goonagoona ganaagheerwangayo ku alutaari, n'omukira omusavu, n'amasavu goonagoona agali ku byenda,

⁴ n'ensigo dhombi ghalala n'amasavu agadhiriku, n'ekitundu ekisinga obulungi ku ini.

⁵ Kabona anaayokeranga byonabyona ku alutaari ng'ekigheebwayo ekyokebwa omuliro. Ekyo n'ekigheebwayo ng'omutango.

⁶ Kiisi musaadha ow'oku lulyo lwa bakabona, anaabanga wa idembe okukiryaku. Aye kiteekwa okuliirwa mu kifo ekitukuvu, kuba kitukuvu inho.

⁷ “Eiteeka erifuga ekigheebwayo olw'ebibi era ni lyene eryo erinaafuganga ekigheebwayo ng'omutango: emamba ey'ebigheebwayo ebyo, enaatwalibwanga kabona anaabanga nga n'akoze ku bigheebwayo ebyo.

⁸ Era kabona anaabanga nga n'akoze ku kigheebwayo ekinaaleetebwanga omuntu yeenayeena, anaatwalanga oluwu olw'ekigheebwayo ekyo.

⁹ Buli ekigheebwayo eky'emere ey'empeke, ekifumbibwa nga kiziikibwa mu ziiko, oba ekifumbibwa mu ntamu, oba ekikalangibwa ku lugyo, kinaatwalibwanga kabona akikozeeku.

¹⁰ Aye ebigheebwayo byonabyona eby'emere ey'empeke ebitali bifumbe, ka bibe nga bireeteirwaku omuzigo oba nga tibireeteirwaku, binaabanga bya bakabona boonaboona ab'oku lulyo lwa Aaroni, era banaabigabananga nga baagayaza.

Ekigheebwayo olw'okutabagana

¹¹ “Gano n'amateeka aganaafuganga ekigheebwayo eri Musengwa Katonda olw'okutabagana:

¹² Omuntu bw'anaaghangayo ekigheebwayo ekyo olw'okwebaza Katonda, anaagheerangaku emigaati eminene egitazimbulukusiibwa egitabwirwamu omuzigo, oba emigaati emitono egitazimbulukusiibwa egisiigiibwaku omuzigo, oba emigaati egikoleibwa mu buwunga obuseereibwa obukalamu, obutabwirwamu omuzigo.

¹³ Okwongereza ku kigheebwayo kye eky'okutabagana ky'ali kughaayo olw'okwebaza Katonda, anaaleeterangaku emigaati egizimbulukusiibwa.

¹⁴ Anaaghangayo eri Musengwa Katonda mulala mulala ku buli kika eky'emigaati egyo ogwo gunaabanga gwa kabona amansira omusaayi ogw'ekigheebwayo olw'okutabagana.

¹⁵ Emamba ey'ekigheebwayo ekyo, enaaliibwanga ku olwo lwe kigheereibwayo, tighaabengagho esula.

¹⁶ “Aye ekigheebwayo omuntu ky'aghaayo bwe kinaabanga olw'okutuukiriza obweyamo, oba eky'ekyeyendere, emamba yaakyo enaaliibwanga ku olwo lwe kigheereibwayo ng'omusengo, era esigalagho enaaliibwanga enkyo.

¹⁷ Aye emamba enaasigalangagho n'etuuka ku lunaku olwokusatu, enaayokebwanga omuliro.

¹⁸ Emamba eyo bw'enaaliibwangaku ku lunaku olwokusatu, Musengwa Katonda taasiimenga kigheebwayo ekyo, era n'oyo akighaireyo taasiimibwenga. Emamba eyo enaatwalibwanga okuba ekyenhinhalwa, era kiisi anaagiryangaku, anaabonerezebwanga.

¹⁹ Emamba eyo bw'eneekubanga ku kintu ekitali kirongoofu, teeriibwenga, enaayokebwanga bwokebwe. “Kiisi oyo abalibwa okuba omulongoofu n'anaalyanga ku mamba ey'omusengo ogwo.

²⁰ Aye omuntu anaagiryangaku nga tiimulongoofu, anaabanga takaabalirwa mu bantu ba Musengwa Katonda.

²¹ Era omuntu bw'anaagemanga ku kintu ekitali kirongoofu ekiva ku muntu oba ku nsolo, oba ekintu ekindi ekyenhinhalwa, memale n'alya ku mamba y'omusengo ogugheebwayo eri Musengwa Katonda olw'okutabagana, omuntu oyo anaabanga takaabalirwa mu bantu ba Musengwa Katonda.”

²² Musengwa yaalagira Musa,

²³ akobere Abaisiraeli ati: “Mutalyanga masavu ga nte, oba ag'entaama, oba ag'embuzi.

²⁴ Amasavu g'ensolo efiire obufe yeene, n'amasavu ag'eyo eitiibwa ensolo edh'omu nsiko mutagalyanga, aye gasobola okukozesebwa mu migaso egindi.

²⁵ Kiisi anaalyanga amasavu ag'ensolo agagheereibwayo eri Musengwa Katonda ng'ekigheebwayo ekyokebwa, anaabanga takaabalirwa mu bantu ba Musengwa Katonda.

²⁶ Era woonawoona ghe munaabanga, mutalyanga ku musaayi gwonagwona, ka gube gwa nhonhi oba gwa nsolo.

²⁷ Kiisi anaalyanga ku musaayi gwonagwona, anaabanga takaabalirwa mu bantu ba Musengwa Katonda.”

²⁸ Musengwa Katonda yaalagira Musa

²⁹ akobere Abaisiraeli ati: “Kiisi aghaayo omusengo olw'okutabagana, anaatoolangaku ekitundu kyaba ekigheebwayo eky'endhawulo eri Musengwa Katonda.

³⁰ Anaakireetanga mwene mu ngalo dhe, kibe ekigheebwayo ekyokebwa anaaleetanga amasavu n'ekifuba, kibe ekigheebwayo eri Musengwa Katonda nga kiwuubibwa.

³¹ Kabona anaayokeranga amasavu ku alutaari, aye ekifuba tikiiyokebwenga, kinaabanga kya bakabona.

³² Era ekisambi eky'oku luuyi olw'omukono omusaadha kyona munaakighanga kabona, kyaba ekigheebwa kabona oyo nga kitoolebwa ku musengo ogugheebwayo olw'okutabagana.

³³ Kabona oyo ow'oku lulyo lwa Aaroni ow'okwokyanga amasavu era n'okumansiranga omusaayi ogw'ekigheebwayo ekyo, n'anaatwalanga ekisambi ekyo ng'omugabo gwe.

³⁴ Ekifuba ekigheebwayo nga kiwuubibwa n'ekisambi ekigheebwa kabona nga kitoolebwa ku musengo ogugheebwayo olw'okutabagana, mbitoire ku Baisiraeli okuva ku misengo gye baghaayo olw'okutabagana, naabigha Aaroni n'abaana be. Bino Abaisiraeli banaateekwanga okubigha bakabona enaku dhoonadhoona.

³⁵ Ogwo n'omugabo ogutoolebwa ku by'okulya ebigheebwayo eri Musengwa Katonda ebyokebwa, ogwagheebwa Aaroni ni batabane be ku lunaku lwe baasiigibwa omuzigo, ni baawulibwa okugheereza Musengwa Katonda nga bakabona.

³⁶ Ku lunaku olwo Musengwa Katonda yalagira Abaisiraeli okughanga bakabona abo omugabo ogwo. Ekyo Abaisiraeli bali n'okukituukirizanga enaku dhoonadhoona.”

³⁷ Ago n'amateeka agafuga ebigheebwayo ebyokebwa, n'ebigheebwayo eby'emere ey'empeke, n'ebigheebwayo olw'ebibi, n'ebigheebwayo ng'omutango, n'ebigheebwayo olw'okwawulibwa, n'ebigheebwayo olw'okutabagana.

³⁸ Eyo ku lusozi Sinai mu irungu, Musengwa Katonda ye yagheera Musa ebiragiro ebyo, ku lunaku lwe yakoberaku Abaisiraeli okumuleeteranga ebigheebwayo byaibwe.